¹ Thiya nang atehu anjelo oindu dihap thohide. Owon inyong lo h’ongayit l’agulume naang amukok karik owon heririk nahittok dihinang honyong. ² Endefu oicang loyaa caa lo, amunu nemarwo, ohoile omonyoroni dia Sitan. Efithahini inyong oyingathik esihe aboithe. ³ Amirohini ditha h’agulume naang amukok. Ehyenok karik aduniehi tholohu honyong. Ihandye nya ahanya, tek ethadwalyo ikoti, tok oyingathik esihe aboithe engahunu. Engohunu n’oyingathik hulya, inyong toburahini diholu h’omiru tiibai ⁴ Thiya nang atehu okani. Ohothing honya owoniari dihide hosong nya ohothing hesarahini akolon nakanyo n’arami. Atehu nang dang ohoilehio h’ohothing honya abongye ahosi d’eruhon thanasong do Yesu karik ocame l’Ojok. Kabong isong omojyo d’oicang karik arijori nanyong; edari efothuna ohoforoi dihomong karik dihinang hosong. Esuji karik awoniari dikara ho Yesu oyingathik esihe aboithe. ⁵ Kabong ohothing homok honya aye ofuni ibuhuna, lwai oyingathik esihe aboithe engohunu. Ebuhuna ehethemoni ne. ⁶ Othulo lowon ditha hebuhuna ethaboithe, thomunoi karik thodwara! Tholohide arami hune, aang aye etharehe owon h’akolon. Ofuni de iwonan ara ho fadiri h’Ojok karik ho Kristo; ofuni de isuka honyong oyingathik esihe aboithe. ⁷ Ara oyingathik esihe aboithe hengohun, ofuni de iburahina Sitan thoifitha honyong. ⁸ Oindu de inden dithadwalyo amisok ditha h’oyirihi arangwan h’ahap – Gog karik Magog – diyanu isong amaji aboithe d’aremi. Ofuni de ilwari iring akujo h’ahari nahittok. ⁹ Afwoi d’amaji nahittok narii see n’ahap; amaji nehuhumye ara nesukarik ohothing h’Ojok hodwa – abore namunoi. Ti, aindu ahimang dihap thohide, adiloro isong. ¹⁰ Sitan lethadwalyo isong, amirohini ditha hajor n’ahimang nawulo ara ahimang, amaji nanya omirohinerek oicang karik ohocoroni lonya aang owon ara ohocorni ladiri. Ithagyemye de isong th’afaning karik th’aharie, mak. ¹¹ Thiya nang atehu okara obong, holobo othulo lowoni dihide honyong. Angerori ahap karik ahide adi thohithemi honyong. Ti, awang inya amaji nangerorik isong. ¹² Atehu nang ohoyak – hokoli karik haang okoli – owethi dihithemi h’okara; angaye nya amaninihio. Thiya, angaye nya amanini nabo – amanini n’esu. Ohoyak nya akanye arami hasong, th’arami thahegero ditha hamaninihio, iring th’egyemitha thahasong. ¹³ Ahari nahittok aburak ohoyak honya owoni ditha honyong. ¹⁴ Aye karik amuno, alengan, nya amirohini ditha h’ajor n’ahimang nawulo. Aye ne etharehe – ajor n’ahimang. ¹⁵ Ara kabong nya orimahini ofure lolobo igero ditha h’amanini n’esu, athuhi amirohina inyong ditha h’ajor n’ahimang.