¹ Paulo, ohifak - ikara ohifak th'ohothing, ikara th'asuduhe n'ohothing, ti, tholo Yesu Kristo karik Ojok Omonye, lethabuhu inyong th'ohoyak. ² Karik olarok fodok howoni ho nang, karik d'ekklesiahio ho Galasia. ³ Alwahio n'Ojok thoiwona dothai karik elik n'ahwandek th'Ojok Omonye lohothai, karik th'Ohobu Yesu Kristo, ⁴ loilahi ahwan nanyong th'eyatha thahahothai diduhuna ohothai adi th'oper l'ahanana lomonyong, iring nawahari Ojok karik Omonye lohothai, ⁵ ethahabuyo thoiwona donyong mak. Amen. ⁶ Afalanga nang, ithai hengero kwak adi th'othulo lelongo ithai th'alwahio thono Kristo. Afalanga nang, ithai heloyithoro d'evanjelio nekela. ⁷ Awang nang ajyo owon nabo evanjelio, ti, owoni ohothing homok howak adyahuna obafu. Owahi eloyicyo evanjelio no Kristo. ⁸ Ti, juk dia ohothai dia anjelo loindu thohide onyahi dothai evanjelio nekela tha nethuk ohoi anyahina, inyong thofyethak. ⁹ Iring nadwo ajarik nang na, nang ikoti thoyinyorye ajaran, "Ara inyahi ithai othulo lobo evanjelio nekela thethuk ithai efothuna ne, inyong thofyethahini." ¹⁰ Ainyong atahitha nang eruhohina n'othulo dia n'Ojok? Awak nang ethamunoyo ohothing? Ara nang lowak ethamunoyo ohothing, awang nang hawon ara ohoigyemani lo Kristo. ¹¹ Awak nang ithai thoteha, olarok, evanjelio nathuk nang elolongohina ikara evanjelio n'othulo. ¹² Ikara th'othulo loboling efothu nang. Kabong nang dang hoityenie inyong. Kombwo, Yesu Kristo nya ithalyehi do nang. ¹³ Ethairu ithai omanyitha hundang ohoithemok h'Elajudei. Ethaningu ithai angai awak nang aryehina ahu n'ekklesia n'Ojok dihap. Itek ithai hijan ajahitha nang nya othulo lowak ethalithohina ekklesia n'Ojok adi. ¹⁴ Ethalangyo nya Elajudei hindang n'aper hindang fodok ditha h'ohothing hundang holefeng. Oyihoi lya nya lamunorik nang bebe egyemathik h'omanyitha thohonya halalamonye. ¹⁵ Ti, ajara nya Ojok, lonya isarak nang arakang hara thohohie hananahathingi, karik lonya ilongo nang th'alwahio thananyong, ¹⁶ amuno, ethalyehina oitho lonyong donang, d'elolongok nang inyong d'ohothing hoikela th'Ojudei, Kabong nang idwong difiyo elathulo. ¹⁷ Kabong nang alo di Yerusalem d'ohotto honya icyak awonan ara ohifak dihithemi honang hulo. Kombwo alo nang d'Arabiya karik thiya nang anyahu di Damaskus. ¹⁸ Thiya, diholu h'oyingathik aunihoi nang alo di Yerusalem. Nang arimak Cefas diya. Ara ohoi isuka honyong diya operok tomon namiyet. ¹⁹ Ti, kabong nang atehu lobo th'ohifak arahari Yakobo lolai Ohobu. ²⁰ Ditha h'arami h'egero nang dothai, otehatha hijan owon Ojok dihthemi hothai. Awang adwala. ²¹ Thiya nang alo d'abothok ho Syria karik ho Cecilia. ²² Kabong nang nya th'ahwan hatehu d'ekklesiahio ho Judea hawoni ara ho Kristo. ²³ Ithaningu isong ocame lya ahibu inyong ocama hijan, ocame lo, lo: "Ojo othulo lonya owak aryehina ohothai dihap dolitho ekklesia adi lo lelolongok eruk nanya owak inyong ethalicyo na lya?" ²⁴ Thiya ohothing ethahuyo Ojok thonang.