¹ Ithai okalifinok, iruhotho arami helethemonye karik henethehathingi ditha Ohobu, obiai arami hune. ² "Ithahabuye le monye hanehathingi" (Efahit ethaboithe h'eruhuna ainyong owon mwai), ³ "Doyyu dothai disuka omiru hohodo dihap." ⁴ Ithai omonyehio, hoihandyethek arami hesarak okalifinok hothai thoingereja. Kombwo, iyanethe isong dihide th'osaritha thoh'Ohobu. ⁵ Ithai ongacani, ithaningyethe ara ithai iruk arami h'ohothing hoindefaitho ithai th'abangi karik th'ehihira thanabolo th'eladiri thonoth'othaja hothai. Ithaningyethe arami hasong iring n'era ithai ithaningyerek arami ho Kristo. ⁶ Awang ithai ira ohoindefak hothai thotehu ara ithai iruhok karik ara ithai ithaningyo arami hasong dithamunoyere isong. Kombwo ithairyethe arami iring ongacani ho Kristo, lehandyo ainyong owak Ojok thothaja hothai. ⁷ Olwahyethe th'othaja thohothai fodok iring negyemarik ithai d'Ohobu ikara d'ohothing, ⁸ anyo, etek ithai hijan aning nayyu nehandyo othulo, owon h'esorio th'Ohobu, dia inyong ongaca dia ikara ongaca. ⁹ Ithai ohoindefak h'ohothing, indafaithethe ongacani dang tuhudi. Hoithabangyethe isong. Itek ithai hijan ohoindefani lothai hosong lodihide. Awang inyong lo ikelyo. ¹⁰ Di cuhi, ithakolyethe ahwandek d'Ohobu karik d'akolon n'abolori nanyong. ¹¹ Iyofohina dihwandek akolon n'Ojok, docohi dothai atehan ainyong owak Sitan ehandyo. ¹² Angalafa nahothai ikara h'ahwan h'ahotho. Kombwo, Angalafa nahothai hoindefitha, h'ohoindefak h'ohoile, ohoiriringak h'ohobyethik homonyo h'omudwe lomonyo.Eribo nahothai h'ohoilehio homonyon d'amasok hothohide. ¹³ Iyofohina dihwandek akolon n'Ojok dithakolyo ithai d'omiru homonyo karik diholu hothai ehandyo asang fodok. Owethathik ara hoko. ¹⁴ Owethathik tuhudi, ara ithai hethuk efithahina erohit n'arami hadiri karik abuhu n'arami h'abisan. ¹⁵ Thiya, iring han'ahamuha hotho hejek na, iyofohina ara ithai ira anyahina n'evanjelio n'elik n'ahap karik ahwandek. ¹⁶ D'oriihio fodok iyofohina abuhu n'eruk, nesarak ithai de ekauna ohwani ho Sitan. ¹⁷ Karik iyofohina alohuluk n'alwahuna karik odemi l'Ohoile Lodwa, lowon ara ocame l'Ojok lo. ¹⁸ Th'amojo karik th'efiyo, omojothi th'oriihio fodok d'Ohoile Lodwa. Thoisukaitha thohulya, omijethe tuhudi angai efwo ahithemi ahibu ohothai isarak d'ohothing fodok hodwa h'Ojok. ¹⁹ Karik omojothi tho nang, dofuni arami do nang ara nang labucyo ahuthuk. Omojothi tho nang d'atek nang akolon n'arami hadiri hedima h'evanjilio. ²⁰ Th'arami thah'evanjelio awon nang ara ohifak lefitha, dacama nang dindak kwong abangi, iring nera nang icamarik. ²¹ Onyahi ithai de Tycikus, olai lomunoi karik ohoigyemani ladiri l'Ohobu, onyahi ithai de asang karik arami fodok, ditek ithai ainyong ehandyo nang dini. ²² Asulak nang inyong dothai th'arami thohune, ditek ithai angai isuka ohoi dini. Isulak ohoi inyong dothai dithakolyo othaja hothai. ²³ Elik n'ahwandek thoiwona d'olarok. Amuno n'eruk th'Ojok Omonye karik Ohobu Yesu Kristo. ²⁴ Alwahio n'Ojok thoiwona d'ohothing homuno Ohobu lohothai Yesu Kristo th'amuno thanaang oye.