¹ Inyong na, iwonatha ara ohoithethemak h'Ojok, iring oduri homunoi bebe. ² karik odahathi ditha h'amuno, karik dang iring namunorik ohothai Kristo, aye th'ohothai, ehuma nangwo kudaar karik angongohina ethathacana th'arami thoh'Ojok. ³ Arami hamok hamonyo thaang holeyoro dihiji hothai d'arwanga n'obusuha h'angorwo. dia arami hebot, dia h'agaganghu. Awang asang hune osiruni d'ohothing hodwa h'Ojok. ⁴ Amuyahi, ocamitha h'ananga, obalitha homonyo - isong hulo fodok awang hoyiji dothai dihandyo. Kombwo aning nera iwonan dihiji hothai, afuryo n'ahinywarang. ⁵ Otehatha arami hune tuhudi, hijan awang othulo lelangorwo, loibot oisukaitha dia logaganghu, othulo laang otek Ojok, horimak aning nabo d'ohobye lo Kristo hol'Ojok. ⁶ Othulo lobo thaang hoithatumye ithai th'ocamitha thahaang aning nabo thiya. Th'arami thohune, engere n'Ojok naindu d'oduri homesyo. ⁷ Hoijingahina d'elulung nasong. ⁸ Ditha omudwe nya isuka ithai, ti, th'orii lya ne, ithai afangan ditha ho Kristo. Isukathi iring okalifinok h'afangan, ⁹ (ahayo h'afangan isong: ayiji, Abisan karik eladiri) ¹⁰ karik orimahina ainyong ithamunoyo Ohobu. ¹¹ Hoithajingak ahwan nahoi ditha egyemathik h'omudwe haang ithai irimak aning nabo thiya, ti ithalyehina asang hamonyo hune dindak. ¹² Iyanu ajwon n'ahu elecyo asang hehandyo isong hedima hune. ¹³ Ti, ara asang fodok hainwahye, otehunai. ¹⁴ Asang fodok hatehunu isong afangan. Ojo ajaran, "Odothoi, ohojothoni, odothoi th'ohoyak, inwaha de Kristo dohoi." ¹⁵ Omijethe tuhudi angai isuka ithai - hoisukathi iring ohothing haang otek aning naboling, ¹⁶ isukathi ara ahongok. ¹⁷ Hoidudufothi, otehatha tui ainyong owak Ohobu. ¹⁸ Hoibothothik obalu. Isarak ithai esuka caa. Kombwo, ithai thoifutha th'Ohoile Lodwa, ¹⁹ Ocamahunethek th'oyendok thoh'Ohoile. Idolothi d'Ohobu th'othaji tholothai fodok, ²⁰ Ofurahina ahinywarang juii th'asang fodok th'ofure thol'Ohobu lohothai Yesu Kristo d'Ojok Omonye, ²¹ Olwahathik ahwandek th'abongi thono Kristo. ²² Afuretho, iruhotho arami h'ondehio hothai, iring neruhorik ithai d'Ohobu. ²³ Onde ahu n'afure, iring nawondere Kristo ara ahu n'ekklesia, Kristo th'ahwan inyong ohoithalwahani lonyong h'ekklesia. ²⁴ Ti, iring neruhorik ekklesia arami ho Kristo, afuretho dang thoithsningye arami h'obusuha hosong d'asang fodok. ²⁵ Ithai Ondehio, omunothi henethefure, iring namunorik Kristo ekklesia, aye thonyong. ²⁶ Esarak Kristo ahwan nanyong d'ekklesia dodwa. Athuhon nanyong ethaliboryo ekklesia th'elalayo th' ahari karik ocame, ²⁷ dohu diwonderek ara nayong, kwong ebothi dia asang karik egilitha hamok hamonyo, arahari adwaran kwong epal. ²⁸ Iring ne, ondehio thomunoi afuretho hasong iring namunorik isong ahwandek hasong. Lomuno athulo nanyong omuno ahwan nanyong. ²⁹ Awang othulo loman ahwan nanyong, ti, ithanyo endafaitho ahwan nanyong tuhudi iring nethanyerek endafaitho Kristo ekklesia tuhudi, ³⁰ anyo, ohothai okangi h'ahwan nanyong. ³¹ "Th'ahu than'arami hune, idehi de othulo omonye h'ahathingi, athunahunai, awoni ara ahwan aboithe." ³² Arami hadiri hedima hune obolori - ti, nang lacama tho Kristo karik ekklesia. ³³ Ti, dothai fodok abok abok ajo nang, omunothi henethefure iring nemunorik ithai ahwandek hathai, karik athulo nangorwo thobanga onde.