¹ Ká Pául, alá Jááso–dʉŋ Ya̱sʉ́a'ŋ táárídʉŋo aŋ, ta̱rɨ́ gis káwe áláŋ kʉrême eeŋ ásáŋ kwa–sí Wʉ́o'ŋ írsíŋo, in Wʉ́o'ŋ belétullê–ii. ² Asá miǐn tóóríg kwǎ–sí kí dééŋ domoŋ kwǎ'ŋ drá kwǎ, in abá Wʉ́o'ŋ doboreŋa tuyyáŋa'ŋ dɨó rímmeŋ eŋa, ³ Na belé tullê dééŋ kwě dígꞌíŋ–ii alá dʉó eŋa asá Da̱ʉ̂dꞌíŋ atine aáŋá. ⁴ Marraŋ kʉo tiyyáŋa aísa in jɨ́gɨ́e dáíŋ Loŋpii Ya̱sʉ́a ása Wʉ́o'ŋ kwě dee kí kʉrro soŋŋâ–ii dééŋ sállá jeeŋꞌíŋ ʉʉ́ŋ. ⁵ Kí dééŋ dorá na dééŋ ʉʉ́ŋ námás tʉllɨŋ na kʉrɨmɨŋ komé ásáŋ kwa–sí jâra'ŋ dɨó nyét ta̱rɨ́ kâ ná ba̱gɨ–lé kélal alá see–lé ʉ́dʉl. ⁶ Na bɨ́ dog ála kila kwa–lé baŋ asá ta̱rɨ́ káwe áláŋ Ya̱sʉ́a jáásodʉŋo'ŋ ge. ⁷ Na ká in domoŋ áísa bɨŋa–sí rímmeŋ aw alá Rom baiŋ aíla Wʉ́o kôil nâ–ii ta̱rɨ́a áláŋ ta̱gɨŋa beeŋ: kaláŋ tʉllɨŋ na a̱pɨŋ dɨ́e–lé jɨa̱l alá Wʉ́o dáíŋ bâ na Ya̱sʉ́a Jáásodʉŋo–lé ʉ́ndʉl. ⁸ Pául–sís jáwle áláŋ Room jee: Main ká dúíŋ Wʉ́o–sís assó assó ámiŋ kí Ya̱sʉ́a'ŋ dorá, kwa nyét ɨdɨ̂ɨŋ ná kwa da̱lɨŋꞌíŋ dɨó lóó bi lóó–le bá dɨ́eŋ see jâ̱yꞌíŋ kírsiŋa. ⁹ Wá̱o asá ká kú dúíŋ kilmá nyét táárí aw nás kwa–sí dééŋ kwě dee'ŋ belé tullê úlŋíti, Yé dúíŋ nʉ́ŋɨ́ dʉŋo–ii. ¹⁰ Ká ay–ii gîs teb teba kúíŋ jʉ́ma–lé ká kérrég–si ʉ̌mel áláŋ Wʉ́o dééŋ âre tullê–lé mat naa ka̱rɨ́ŋ eré gí síŋ ʉ́dóŋas kullé piá áláŋ dɨ́eŋ ja̱gɨlꞌíŋ oo. ¹¹ Ɨdɨ̂ɨ́ŋ ná ká saa soŋŋá wéel áíláŋ bɨŋa–sí a̱gɨ́l áísáŋ mat bɨŋa koo'ŋ dola dî aŋgar nái–ii ka̱kkɨ́ré pɨ́a̱l. ¹² Dúíŋ belé'ŋ arrá in lóóŋ áláŋ mat kɨŋa kí dʉó bi dʉó see jâ̱yꞌíŋ dorá kʉrro eriŋol, bɨ́ kú dúíŋ see jâ̱y na ká kɨ́ dɨ́eŋ see jâ̱y. ¹³ Kúíŋ bârŋa ká á wéelba áláŋ gi undí ná bɨ́ in ʉʉ–sí ás baluŋba na ká kérrég bás in âre aŋ áláŋ dɨ́elé oo marraŋ Wʉ́o namáis órílíŋí namaŋ naa, ká wéel áláŋ dɨ́eŋ dɨó jáásodʉŋo–sí ka̱rɨ jʉ́lo kwǎ dîi ʉmmóŋ. ¹⁴ nás kôs éla inná asá jâra kerŋa'ŋ dɨó ʉmmó'ŋ deem kwǎ na juta kwǎa̱w dog–si dúíŋ taála–lé kééli na kwa alá riyáŋa gé na alá ula gé. ¹⁵ Namá iláiŋi náis ka–sí surma–ii, áísáŋ bɨŋa belé tullê áwli ǎl Room baiŋ. ¹⁶ Kwa wá̱rɨga báŋ kí see jâ̱yiŋ dorá ka̱ɨŋ, ka–síbelé tullê'ŋ ʉʉ ta̱bʉ áis tʉ́ɨ́tɨba, ɨdɨ̂ɨŋ ná yé Wʉ́o'ŋ kʉrro–ii asá dʉó bi dʉó–sí jopó ʉ́ndʉl alá see tɨél main námás Ya̱ʉ́da kopoŋol la námás lia gal Jâra kopoŋl. ¹⁷ Ɨdɨ̂ɨŋ ná belé tullê–lé lóóŋóla Wʉ́o kwa–sí ay–ii wá̱rɨg jáwíti kí see jâ̱yꞌíŋ dorá miín juuŋ–lé namaŋ dééŋ jágíŋi–lé, in ná alá Wʉ́o'ŋ domboreŋa toyya–lé rímmeŋ eŋa, "dʉó–sí alá Wʉ́o wá̱rɨg jáwí báŋ kí see jâ̱yꞌíŋ dorá kee." ¹⁸ Wʉ́o'ŋ gabbîn kwa korroŋa'ŋ írí: kwa'ŋ tááríŋá jɨttɨŋa na ʉ́dóŋá korroŋa'ŋ gîrꞌíŋ Wʉ́o'ŋ gabbîn miín jaawíl lóóŋóla, na kí kɨ́eŋ ʉ́dóŋá korroŋ ʉʉ́'ŋ see sís kawríŋíe ásáŋ ɨwɨ́ŋɨ́. ¹⁹ Wʉ́o yeeŋa–sí mííneŋ piá ɨdɨ̂ɨŋ ná a̱rɨ ásáŋ Wʉ́o'ŋ eré ɨwɨ́ŋɨ́ yeeŋa–sí dééŋ–si arrá táráásiŋ kórél. iláiŋ ná Wʉ́o yeeŋa–sí dééŋ–si arrá táráásiŋ rááŋá. ²⁰ Miín ila dɨo alá da̱ldɨŋ–sí kewe, Wʉ́o'ŋ sebaŋa alá álóŋítíaba kila alá kééŋ kʉrro na lʉʉta na ʉʉŋɨ'ŋ géása táráásiŋ pulŋíe, na dog Wʉ́o'ŋ sebaŋa alá á lóŋítíaba dééŋ arrá kila lótáŋále kórél alá Yé tewa. Na naa kin kwa péllét gabala ás ka̱ɨŋba. ²¹ Nás dog ʉ́o–sí kalŋa walá dog mʉjjé ás kaweba ála wʉ́o–ii walá assó assó ás kámiŋaba. mǎŋ kɨ́eŋ járriŋa alá ʉ́dóŋá jʉ́rʉsa ɨŋɨ na kɨ́eŋ kilmaŋa asá ja̱ɨm á ka̱ɨŋba kila, tóíŋá áláŋ dééŋ arrá rá̱ʉl. ²² Yeeŋ kɨ́eŋ ta̱bʉŋa–lé in kawrítíya ála riyáge, marraŋ ála ulla kallíŋá. ²³ Mááŋ áláŋ Wʉ́o galaŋân na alá á wa̱ytelba–sí ba̱gɨ káwa yeeŋ namá jaluŋa kila–sí ba̱gɨ káwe asá in lóŋítíya niná dʉldɨ'ŋ kwě alá wa̱ytel, walagal inná kíyaŋa, walagal inná karába, karába–kosood kwǎ. ²⁴ Na naa Wʉ́o kila kwa–lé ka̱rɨŋa kellonamá júndí áláŋ kɨ́eŋ kilmaŋa'ŋ ŋa̱a̱nyɨŋa jɨttɨŋa–sí ka̱a̱rɨ kʉ́lal ásáŋ kɨ́eŋ suúrŋá–sí dɨ́eŋ tâs–lé ôraŋa káwal. ²⁵ Yeeŋ ʉʉ́'ŋ see alá Wʉ́o'ŋꞌíŋ risíŋ–le ka̱rɨŋa kɨllʉl, namá a̱rɨ ɨd–sí see kééli alá pɨyé–ii, namá jetéríŋá–sí ba̱gɨ kawe, áláŋ jetéré dʉŋo–sí ba̱gɨ káwa, alá in lóŋ ásáŋ mʉjjé kawe namaŋ níŋ kee. Ee yáa. ²⁶ Na in nîŋ ʉʉʉ́'ŋ Wʉ́o namá jʉ́ndɨ áláŋ kɨ́eŋ ôraŋa'ŋ surma ka̱rɨ kʉ́lɨ́ tɨ́ya, namaŋ kɨ́eŋ yáaŋa jâ–sí ila ǎl dééŋ lóó–ii kí ilas ka̱ɨŋʉl alá dééŋ lóo áiba. ²⁷ Na kí in dorá kwa keya namá yáaŋa'ŋ jâ ser–sí kundíe ná kawŋíe nás suúrŋâ–sí kʉŋɨ. Kwa keya suúr ôraŋa kawe namá iláiŋ–ii ná suur kɨ́eŋ koroŋa'ŋ ʉʉ́ŋ nyálnyíleŋ kʉ́ndʉla. ²⁸ Ɨdɨ̂ɨ́ŋ ná kila kwa kaareli áláŋ Wʉ́o'ŋ jɨ́wɨ see kʉŋo–sí kɨ́eŋ ta̱bʉŋa–lé kaye yé namá yeeŋa soor íní namá júndí ásáŋ ta̱bʉŋa urruŋol, ná ʉ́dóŋá kila kawe ná jâ'ŋ á geba. ²⁹ Namás kɨ́eŋ ta̱bʉŋa–lé kí ótáŋá jɨttɨŋa'ŋ nyét pis kɨŋɨ, inná ótáŋá korroŋa na jɨttɨŋa na kilmá'ŋ kʉrrɨŋ na jananꞌíŋ ja̱ɨmola. Na yeeŋ kwa nyét namás kí kilmáꞌŋ pʉkkɨŋ na wayí na kóórŋá na júleŋ jâ, na jarbasa pis kɨŋɨ. ³⁰ Naŋ–si kwa–sí kéndéli na suúr ʉ́dóŋá kerŋa kírsiŋa na Wʉ́o–sí kí seéŋ see kanane na suúr tartasa na kalbata kawe na kandakána gé na doŋ górés kɨndeli naŋ koraŋa soŋŋâ kôili álá ʉ́dóŋá jɨttɨŋa kawe naŋ kɨ́eŋ wa̱lɨŋa–sí ba̱gɨ á kaweba. ³¹ Na yeeŋ gal ulla gé na kɨ́eŋ beléŋá'ŋ wʉoŋa á–geba. ³² Na kwa kerŋa'ŋ ere awaí wal gal urma ás ka̱ɨŋba yeeŋ kalŋas Wʉ́o'ŋ dáálí âl in belé'ŋ kwa ǎl kí in dorá ka̱ɨŋ âl wǎyyiŋ gé, yeeŋ délliŋ á ká̱wɨba ná kin ʉ́dóŋá jɨttɨŋa kawe marraŋ dog ása kwa kerŋa–sí kɨɨneli ǎl ʉ́dóŋá jɨttɨŋa kawe.