¹ Mooŋa'ŋ soogꞌíŋ Loŋpii: Kí soog díg Îsa bá kééŋá ná kaaŋꞌíŋ rǎ̱ytá'ŋ dɨó dúítíeŋ–ii, kééŋ majira namás kayé ná kaaŋꞌíŋ ta̱bʉŋa kureli, namás kila kaaŋꞌíŋ ta̱bʉŋa–sí táwáŋá–le kawse nás kééŋ rusa kaame. ² Parasîŋa dî namá in kɨ́ɨ́ŋʉl, "A̱rɨ ɨd kaáŋ baw asá á kɨɨnelba áláŋ kí mooŋa'ŋ soog baw?" ³ Îsa namá in jáwí, "Bɨ́ bála ila ʉʉ–sí árden á bâba alá Da̱ʉ̂d piyá ila tin–lé ǎl yé na kééŋ rapaga duur ka̱ɨ́ŋ. ⁴ Yé Wʉ́o'ŋ tóŋ ká̱rɨ́ namá karaŋa tiyyáŋa baw ná amí, naŋ dî bawa ná kééŋ rapaga–sí íní ná kámmíe, na kila karaŋa–sí bás Mûsa'ŋ dáálí'ŋ pá̱gɨŋa–sí kɨɨneli áláŋ kaame." ⁵ Lia Îsa namás kila parasîŋa–sí namás in kwǎ, "Dʉldɨ'ŋ kwě ǎl mooŋa'ŋ soogꞌíŋ Loŋpi–ii." ⁶ Kí mooŋa'ŋ soog keer namás dog ya̱ʉ̂da'ŋ dáárá nyáŋa nás kwa–sí gʉʉdpáálíti. Ɨ́de namá ila dʉó kééŋá ǎl ila dóŋá súru kʉŋo pʉllo. ⁷ Parasîŋa na dáálí'ŋ gʉʉdpáálíŋá namá mʉ́ʉ́rʉ́ díg kôili ásáŋ Îsa–sí kulíya, namá ka̱ɨ́ŋ nás nʉ́ŋɨ́ keneliŋi–ii, ǎ̱yɨ́ kí mooŋa'ŋ soog dʉó–sí dááweŋ láŋ piá. ⁸ Marraŋ Îsabás ɨwo a̱rɨ ɨd ǎl yeeŋ kɨ́eŋ ta̱bʉŋa–lé kawrítíeŋinamás dʉó–sí alá dóŋá pʉllo in kwǎ. "Jawlas ná kwa nyéttin ta̱bʉ'ŋ eré jaari." Yé gal namás jáwla ná nyáŋa ná dii keera. ⁹ Lia Îsa namás yeeŋa–sí in kwǎ, "Ká bɨŋa gî ɨɨ̌lel Mûsa'ŋ dáálí ǎ̱y–ii kʉŋo sís tɨɨnel kí mooŋa'ŋ soog áláŋ ʉʉ tullê jâ, wala áláŋ ʉʉ jɨttɨ jâ, ásáŋ dʉó'ŋ kuy–ii joppó, wala áláŋ jaw. ¹⁰ Yé namá yeeŋa–sítúllén já̱gɨ́la, namás ila dʉó–sí in kwǎ, "Dɨ́ɨ́ŋ dóŋá tílgeŋ jâ ila dʉó namá innálaŋ piyá, lia dééŋ dóŋá namá dééŋ lóó–le táráásiŋ píŋí. ¹¹ Lia yeeŋa–sí namá kilmaŋa puyyá ɨŋɨ, namá kayé ná suur–sí in kámiŋa, "Îsa–sí kaa síŋ kâ. ¹² Îsa kʉrémeŋa weyye na a̱w jááŋó: Kila sooga–lé Îsa namá pʉ́go nyáŋa áláŋ jʉ̂m. Namás kí luul nyét óóŋá nás Wʉ́o–sí jʉ́ma. ¹³ Ǎlbá dʉlé koro namá kééŋ majira–sí ta̱rɨ́ piá namá dééŋ dɨó weyye na a̱w jááŋó ná kʉrémeŋa jáwí. ¹⁴ Kin kwa namá aniŋ ka̱ɨ́ŋ Sɨmon (asá dog kona Patoro íní) na dééŋ bára Andoro namaŋ kin kwa kerŋa Ya̱gʉ́ba, Yáaye, Pilip, Barasolomi, ¹⁵ Masiyo, Tôm, na Ya̱gʉ́ba Alipesꞌíŋ kwě, na Sɨmon alá yʉ̂dɨya'ŋ daara'ŋ kwa'ŋ magaga–lé kéŋá ǎl in ka̱rɨ̂ŋɨ Zelût. ¹⁶ Na Ya̱gʉ̂ba'ŋ kwě Yudes, na Yudes Iskiriyût, alá lia ka̱rɨŋa bootódʉŋo eŋa. ¹⁷ Bora pattá'ŋ jâ na miineŋa: Îsa namá kíeŋ arrá débbé ka̱ɨ́ŋ ná kʉpʉŋʉl ná arrá tawrá kááréa kééŋ majira'ŋ dáldá ná kíeŋ ka̱ɨ́ŋ na kwa'ŋ kwa alá Yʉ̂dɨya'ŋ daaraŋa nyét–le na Jʉrɨsalam ka̱ɨ́ŋ na Tira na Sidon alá juó ka̱ɨ́ŋ. ¹⁸ Namá kéle ásáŋ dééŋ belé kel kámmíya na áláŋ kɨ́eŋ wajaŋa–lé dááweŋ kɨŋɨ na kila alá ârid bɨ́ɨ́leŋ pɨ́eŋɨ namá dááweŋ kɨŋɨ. ¹⁹ Na kwa nyét bá kôili áláŋ yee kúral, ɨdɨ̂ŋ ná dê–lé kʉrro kúréliŋi–ii ná yeeŋ–sí nyét dááweŋ pieŋi–ii. ²⁰ Îsa namá nʉ́ŋɨ́ írí jáwí namá kééŋ majira–sí já̱gɨ́la namás in kwǎ, "Bora pattá dɨ́eŋ–ii alá pa̱gɨrɨŋa baŋ, ɨdɨ̂ŋ ná Wʉ́oŋ kʉrɨŋ dɨ́eŋ–ii. ²¹ Bora pattá dɨ́eŋ–iialá ássâ durŋa baŋ, ɨdɨ̂ŋ ná lia básíŋ pis beeŋ. Bora pattá dɨ́eŋ–ii alá ássâ baiŋ ná boom, ɨdɨ̂ŋ ná bɨ́ lia básíŋ bálla. ²² Bora pattá dɨ́eŋ–ii áila kwa kanane, na ǎl gís túgga kéndéli, na kányiŋa gî na kɨ́eŋ kona–sí in kaareeli ása jɨttɨ gé, Dʉldɨ'ŋ kwě'ŋ ʉʉ́ŋ. ²³ Kí ila soog bá kilmaŋa attá bâ̱y na kí kilmaŋa sɨmmó báálo, iláiŋ ná a̱rɨ appâ bá kɨ́eŋ dʉléŋá ge áíláŋ jawíl kawíya, ɨdɨ̂ɨŋ ná ila dorá–ii aláŋ kɨ́eŋ Wʉ́o'ŋ domoŋkwǎ–sí innálaŋ kééli. ²⁴ Marraŋ miine dɨ́elé níŋ jee ǎl kawája baŋ, ɨdɨ̂ɨ̌ŋ nás bɨ́ a̱rɨ ɨd bummó áila kilmaŋa lúllá pii–ii. ²⁵ Miine dɨ́e–lé níŋ jee ǎlsi assá pis tɨ́rrɨŋ baŋ. ɨdɨ̂ɨ̌ŋ ná jaató báŋ durŋa baŋ. Miine dɨ́e–lé níŋ jee ǎl ássâ baiŋ nás béllél, ɨdɨ̂ɨ̌ŋ ná bɨ́ básíŋ mʉʉnɨŋ baiŋ, naŋ níŋ bomola. ²⁶ Mʉʉnɨŋ dɨ́e–lé níŋ jee kwa nyét ǎl kwa dɨ́eŋꞌíŋ kí tʉllɨŋ kírsiŋa, ɨdɨ̂ɨ̌ŋ ná kɨ́eŋ Wʉ́oŋa domoŋ kwǎ pɨé káwe kwa–sí innálaŋ kééli. ²⁷ Gârima'ŋ joiŋí : Marraŋ ká naa bɨŋa–sí gis in ámiŋ ǎl baiŋ náis kaa kel baam, kɨ́eŋ gârima–sí boiŋí na kila kwa sís údóŋá tulléŋa bâ aíla bɨŋa kaareli. ²⁸ Na kila kwa sís bora pattá bâ áila bɨŋa nááleŋ kawe, na kila sís bʉ̂m aíla bɨŋa kányiŋa. ²⁹ Abá gi dʉó pula dííg–lé taan, bá dog ila keer kʉŋo–sí janí. na abá dʉó dɨ́ɨ́ŋ mulpa bawa as jaaríŋíba áláŋ dɨ́ɨ́ŋ jebbe bǎw. ³⁰ Na abá dʉó dɨ́ɨ́ŋ a̱rɨ kóíŋí as jaaríŋíba na abá dʉó dɨ́ɨ́ŋ a̱rɨ ɨd bawa ǎl dɨ́ɨ́ŋɨ–ii ka̱rɨ'ŋ ajawláŋaba. ³¹ Kwa–sí in bâ̱y–ii niná ǎl bɨ́ bóil áíláŋ bɨŋa kíyal. ³² Na abá kila kwa–sí in bóil áláŋ gî bɨŋa kôila kaa síŋ tʉllɨŋ boomé, ɨdɨ̂ɨ̌ŋ ná ka̱ttɨ́eŋa kwǎ kila kwǎ–sí dog kôili ǎl yeeŋa–sí kôili. ³³ Na abá bɨ́ kila kwa kɨd–sí ʉ́dóŋá tulléŋa baw ǎl ʉ́tóŋá tulléŋa ge kaa síŋ tʉllɨŋ boomé? ila–sí ná dog ka̱ttɨ́eŋa kwǎ dog kawe. ³⁴ Na abá kila kwa dɨ́e–lé kɨwo kéé ǎlsi baluŋ áláŋ gi kawíya kaa síŋ tʉllɨŋ boomé, na ka̱tɨ́eŋa kwǎ dog si ka̱tɨ́eŋa kwǎ–sí kɨwo kanníya, na kɨ́eŋ ta̱bʉŋa–lé in kawrítíya áláŋ sírrííjiŋ kawíya. ³⁵ Marraŋ ǎ̱yɨ́ ǎ̱w ná kɨ́eŋ gáárima–sí in bóil, marraŋ ʉ́tóŋá tulléŋas baw. Na kɨwo baní na kɨ́eŋ ta̱bʉŋa–lé in abaaba áláŋ gi kawíya, Liya dɨ́eŋ aílakawítíyá báŋ saa appâ–ii, na laa bɨ́ báŋ–si appâdʉŋo'ŋ dogólá baŋ, iláiŋ ná yé a̱dʉ kí jʉrɨŋa na jɨttɨŋa–sí tʉllɨŋ paalíti. ³⁶ Urma kwǎ beeŋ inná ǎlbá dɨ́eŋ bâ urma dʉŋo–ii. ³⁷ Kwa kerŋa'ŋ jandi: Kwa–sí as béndélba, áísáŋ bɨŋa áis kandeba, kwa–sí ja̱nɨ írí aba̱bɨ́tiba áíláŋ bɨŋa ái ka̱bɨ́yalba. Kwa–sí áápeŋ bâ áíláŋ bɨŋa áápeŋ káwa. ³⁸ kwa–sí baní áíláŋ kaníya. Tullé barri na dûs bɨgé ná lóó tog–si bʉ́sko ásáŋ teljek–pɨ́yal namaŋ nîŋ kɨwɨlta'ŋ írí bʉ́nynyáal, iláiŋ ná jarri ila ásá kwa–sí bɨ́ kíe bérrél báŋ gí síŋ bɨŋa kí kíe karre. ³⁹ Îsa namás dog yeeŋa–sí in mitíl taan namás in kwǎ, "kʉrʉ dééŋ bára kʉrʉ–sí taga kellel–lá? Yeeŋ kwa a̱w dog dʉ́lo áŋ káwyâbâ? ⁴⁰ Na majir á keba ná dééŋ gʉʉdpáálí'ŋ íríeré–ii, marraŋ majir ɨd asá gʉʉd tullê ɨwɨ́ báŋ ɨd eeŋ niná dééŋ gʉʉdpáálí–sí. ⁴¹ Na kaáŋ ʉʉ́ŋ–ii ná dɨ́ɨ́ŋ bára'ŋ nʉ́ŋɨ wasag ja̱lʉ na dɨ́ɨ́ŋ nʉ́ŋɨ balda'ŋ appâ–sí á ja̱lʉba? ⁴² Dɨ́ɨ́ŋ bára–sí taga ay–iisíŋ jwa, 'Bára ǎ̱yɨ́ jaaríŋ náis wasag nʉ́ŋɨ aráŋ, na jɨ́ dog jotóíŋ áláŋ dɨ́ɨ́ŋ nʉ́ŋɨ dá̱á̱rɨ́ tog ja̱gɨ́l? Jɨ́ dû júndúŋodʉŋo ǎ̱yɨ́ min dɨ́ɨ́ŋ nʉ́ŋɨ sá̱á̱rɨ́ jaráŋ, áláŋ liya lóó taraas ja̱gɨ́l, nás lia dɨ́ɨ́ŋ bára–sí dééŋ nʉ́ŋɨ wasag jaráŋ, ⁴³ Kurú–sí kí kééŋ si kwǎ kalŋa: Kurú tullê á keba ná kwǎ jɨttɨŋa kirel, walagal kurú jɨttɨ á keba ná kwǎ tulléŋa kirel. ⁴⁴ Kurú bi kurú–síkwa bás kí kééŋ kwǎ kalŋa. kwa aldaŋa'ŋ kwǎ–sí buuru–lé ás kúndaba, walá ínaba'ŋ kwǎ–sí sa̱yɨ́ŋá–le ás kǔndaba. ⁴⁵ Dʉó tullé ótá tulléŋa rá̱ɨ́ŋél ǎldééŋ kilmá'ŋ gʉ́bʉ́l jáá, na dʉó jɨtɨ ótá jɨttɨŋa rá̱ɨ́ŋél ǎl dééŋ kilmá'ŋ gʉ́bʉ́l jáá, ila asá dééŋ kilmá sálgeŋ pii bá yé–ii ná dééŋ uto kíe risíŋ. ⁴⁶ Jʉtʉ́mó kwǎ riyyáŋa na ulla: Ka–sí Loŋpii, Loŋ pii, kaáŋ gi ba̱rɨ̂ŋ, 'ná a̱rɨ ɨd á bawba ǎl ká ámiŋ ? ⁴⁷ Ká áwligísíŋ ila dʉ́ó ay–ii lóŋ ǎl dúi–lé ʉ́ndʉl nás kúíŋ ʉʉŋ kel aam nas kíeŋas táárí pii–ii, ⁴⁸ Yé bá in lóŋ ná ila dʉó ǎl toŋ tʉʉm, yé dʉó ila–ii ǎl taaru–lé dʉ́ló kurrâ kʉrto ná dêlé toŋꞌíŋ edeba já̱bɨ́. Namá koro'ŋ koléŋa éle ná toŋ–sí tʉʉrʉl, marraŋ toŋ–sí á ɨrtʉlba, iláiŋ ná taraas kʉtʉmʉl. ⁴⁹ Marraŋ dʉó asá dúíŋ belé kelaam na kíes táárí ás piiba, bá in lóŋ niná ǎ dʉó toŋ sʉʉrʉ hô'ŋírí tʉʉm nás edebe á keba. Na abá roo'ŋ koléŋa éle ná tʉʉrʉl báŋ jáwyíya jɨttɨ'ŋ jɨttɨ kʉŋo póyyâ.