¹ Po wigi ducu me mine kengi i te loc pa luloc, ki wegi twer, me bedo ki winy, ki me yubbe pi tiyo tic mo maber ducu. ² Guwek loko lok marac i kom ŋat mo, guwek da, gubed jo ma lukica, lunyut woro bot dano ducu i kare ducu. ³ Pien wan kikomwa yam koŋ wabedo lumiŋ, jo ma pe luwiny; yam warwenyo woko ata, wabedo opii pa mitiwa ki jami mapatpat ma yomo cwinywa. Wabalo karewa i raccwiny ki mone, dano gukwerowa, ki wan onoŋo wadagge kekenwa. ⁴ Ento i kare ma ber ki mar me kica pa Lubaŋa Lalarwa onen, ⁵ en olarowa woko cut, pe pi tic mo ma wan watiyo i kit ma atir, ento pi kicane gire. Olarowa ki pii ma olwokowa me nywalle tyen me aryo ki me doko jo manyen pi Cwiny Maleŋ, ⁶ ma yam en oonyo i komwa madwoŋ i Lalarwa Yecu Kricito, ⁷ wek doŋ gikwanwa ni kitwa atir pi kicane, wek omi wanoŋ kwo ma pe tum ma genwa tye iye. ⁸ Lok man lok ada. Amito wucuŋ matek i kom lok magi, wek jo ma doŋ guye Lubaŋa gubed ki tam me mine me tiyo tic mogo mabeco; meno aye ber, dok bedo me kony bot jo ducu. ⁹ Kwer pyem mogo me miŋimiŋo, lok i kom nyiŋ kwaro, daa ki laro lok i kom cik; magi ducu pe konyo, dok tyen lokke pe. ¹⁰ Dano ma kelo apokapoka ka doŋ iciko kicel nyo kiryo kwe, weke woko matwal, pe dok iribbe kwede, ¹¹ kun iŋeyo ni, kodi dano-nu doŋ oŋak woko, dok obalo, ki doŋ oŋolo kop woko i kome kene. Cik me agikki. ¹² Ka abioro Artema nyo Tukiko boti, ket tek ibin bota i Nikopoli, pien doŋ atyeko moko tamma me bedo kunnu i kare me koyo. ¹³ Ket tek me konyo Jena ma en dano ma ŋeyo cik, gin ki Apolo, i wotgi, nen ni gin mo pe orem botgi. ¹⁴ Danowa bene myero gummine kengi i tic mabeco wek gubed ki yo me konyo luwotgi ma can mo odiyo; pe gubed macalo yat ma pe nyak. ¹⁵ Jo ducu ma gitye kacel kweda kany gumoti. Mot jo ma marowa i niye. Kica pa Lubaŋa obed kwedwu ducu.