¹ Ento in, pwony gin ma rwatte ki lok ada. ² Lok bot jo madoŋo ni gubed jo ma gwokke kengi, jo ma romo awora, jo ma loyo tamgi kengi, jo ma niyegi ki margi tye kakare kun gicuŋ iye matek. ³ Kit meno bene wac ki mon madito ni gin myero gubed ki woro i kit bedogi ducu, pe gucok dog jo mukene, pe gubed jo ma doŋ gudoko opii pa koŋo. Myero gubed jo ma pwonyo gin maber, ⁴ ka doŋ gucak pwonyo mon matino me maro coggi ki litinogi, ⁵ dok gubed mon ma loyo tamgi kengi, mon maleŋ ma pe gitye ki tam mo me caro caro, ma gigwoko pacogi, mon ma lukica kun giworo coggi bene, wek pe omi jo mukene guyet lok pa Lubaŋa. ⁶ Kit meno bene, cuk cwiny awobe ni myero gugwokke kengi. ⁷ In kikomi nyutte macalo lanen me tic maber i yo ducu. Mi pwonnyi obed mapek laboŋo gin mo marac iye, ⁸ kun iloko lok ada ma pe gitwero noŋo roc mo iye, wek omi lewic omak ŋat mo ma mito pyem kwedwa, pien pe neno gin mo marac ma myero ewac i komwa. ⁹ Wac ki opii ni guwor luditogi, guyom cwinygi i yo ducu. Pe gubed lupyem, ¹⁰ kadi kwanyo gin mogo, ento myero gunyut ni gin jo ma genne maber twatwal, wek i gin ducu gumi pwony pa Lubaŋa Lalarwa onen ma mwonya. ¹¹ Pien kica pa Lubaŋa doŋ onen pi laro dano ducu. ¹² Kica meno pwonyowa me kwero lubo kit pa jo ma pe lworo Lubaŋa, kacel ki miti ducu me lobo man, dok pwonyowa me gwokke kenwa wek wabed ma cwinywa atir, kun walworo Lubaŋa, ¹³ kun wakuro gum ma genwa ocuŋ iye, en aye me neno Yecu Kricito, Lubaŋawa madit ki Lalarwa, ka odwogo ki deyo. ¹⁴ En yam omine kene piwa me kokowa woko ki i bal ducu, ki me lonyowa wabed jone kikome, ma watye ki miti madwoŋ me tiyo tic mabeco. ¹⁵ Tit botgi lok magi; cuk cwinygi dok ijukgi ki twer ducu ma itye kwede. Pe imi ŋat mo ocayi.