¹ Pi meno, kit macalo gikwanowa ni kitwa atir pi niye, watye doŋ ki kuc i nyim Lubaŋa, pi Rwotwa Yecu Kricito. ² Pire omiyo giyabo botwa yo me limo kica man ma ocuŋ pi niye-ni, kun wabedo ki yomcwiny pi gen ma watye kwede me nywako deyo pa Lubaŋa. ³ Makato meno, wabedo ki yomcwiny i can mogo mapatpat ma opoto i komwa, kun waŋeyo ni bedo ki can kelo diyo cwiny me ciro can, ⁴ diyo cwiny i ciro can weko gipwoyo kitwa, ka doŋ pwoyo kitwa-ni miyowa bedo ki gen. ⁵ Genwa meno pe kelo botwa cwercwiny, pien Cwiny Maleŋ doŋ omiyo gionyo mar pa Lubaŋa woko i cwinywa. ⁶ Pien i kare ma yam pud wagoro, ma kare doŋ oromo, Kricito oto pi dano ma pe gilworo Lubaŋa. ⁷ Kadi pi ŋat ma kite atir, bedo tek twatwal bot dano mo me to pire. Gwok nyo ka obedo dano ma kite ber, ŋat mo twero diyo cwinye me to pire. ⁸ Ento Kricito yam oto piwa i kare ma pud wan lubalo; meno nyuto kit mar ma Lubaŋa marowa kwede. ⁹ Macalo wan i kare man gikwanowa ni kitwa atir pi remone, makato twatwal-le wabilarre pire ki i kom akemo pa Lubaŋa. ¹⁰ I kare ma onoŋo wan pud lukwor pa Lubaŋa, en odwokowa cen bote, pi to pa Wode; ka kit meno, ma gidwokowa cen bote, wabilarre twatwal-le pi kwo pa Wode. ¹¹ Pe meno keken, ento wabibedo ki yomcwiny i Lubaŋa pi Rwotwa Yecu Kricito, pien en aye ma omiyo gidwokowa cen bot Lubaŋa. ¹² Pi meno, kit macalo bal yam obino i lobo kun wok ki i dano acel, ka doŋ to obino pi bal, kit meno bene to onya oromo kin dano ducu, pien dano ducu gubalo. ¹³ Bal onoŋo tye i lobo con ma peya gimiyo cik, ento ka ma cik pe iye, bal bene pe gikwano i wi ŋat mo. ¹⁴ Ento to ocako loc ki i kom Adam oo kwede wa i kom Moses, ci oloyo jo ma yam pe gutimo bal marom ki bal pa Adam, ma yam oturo cik ma gimiye. Adam aye lanyut ma cimo ŋat ma mito bino-ni. ¹⁵ Ento mot me kica ma Lubaŋa omiyo pe rom ki bal pa Adam; pien kadi bed dano mapol yam guto pi bal pa ŋat acel ca, ento kica pa Lubaŋa ki mot me nono ma obino pi kica pa dano acel-li, Yecu Kricito, obedo dit makato, onya oromo lwak dano mapol ata. ¹⁶ Dok mot me nono pe rom ki bal pa dano acel ca, pien pi bal pa ŋat acel ca omiyo giŋolo kop oloyo dano ducu, ento tic me kica ma olubo bal mapol okelo loyo kop. ¹⁷ Ka ce pi bal pa dano acel omiyo to obedo ka loc pi dano acel ca en Adam, makatone jo ma gulimo kica mabup, ki mot me nono ma omiyo gikwanogi ni kitgi atir, gibibedo kwo kun noŋo gitye ka loc, pi dano acel-lu bene, en Yecu Kricito. ¹⁸ Doŋ kit macalo bal pa ŋat acel omiyo kop oloyo dano ducu, kit meno bene tic me kit ma atir pa dano acel okelo loyo kop ki kwo pi jo ducu. ¹⁹ Pien macalo pi dano acel ma pe obedo ki winy omiyo dano mapol ata gudoko lubalo, kit meno bene pi winy pa dano acel jo mapol ata gibikwanogi ni kitgi atir. ²⁰ Cik onoŋo odonyo iye me nyayo bal; ento ka ma bal onya iye, en bene ka ma kica onya iye makato ducu-ni. ²¹ Kit meno, kit macalo bal yam oloyo loc i to, kica bene myero olo loc pi kwano dano ni kitgi atir, wek omi gunoŋ kwo ma pe tum, pi Yecu Kricito Rwotwa.