¹ Wan mono wabiwaco lok aŋo i kom Abraim, ma en aye kwarowa i kit me kom-mi? ² Kono yam gikwano Abraim ni kite atir pi tic ma en otiyo, kono en tye ki gin mo ma en otiyo, kono en tye ki gin mo ma en nyatte pire, ento pe i nyim Lubaŋa. ³ Doŋ coc ma yam gicoyo i ginacoya waco lok aŋo? Ginacoya waco ni, “Abraim onoŋo oye Lubaŋa, mumiyo kikwane ni en dano ma kite atir.” ⁴ Dano ma tiyo tic pe gimiye mucarane macalo mot, ento gimiye macalo jami ma en otiyo pire. ⁵ Ento dano ma pe tiyo, ma ye ŋat ma kwano jo ma pe lworo Lubaŋa ni kitgi atir, kit dano macalo meno gikwano ni kite atir pi niyene. ⁶ I kit acel-lu, Daudi bene yam oloko pi gum ma dano tye kwede, ka Lubaŋa okwane ni en dano ma kite atir laboŋo tic mo ma en otiyo, macalo yam gicoyo ni, ⁷ “Jo ma doŋ giweko balgi gitye ki gum, ma balgi bene doŋ gikwanyo woko; ⁸ dano ma Rwot doŋ pe kwano bal mo i kome tye ki yomcwiny.” ⁹ Gum man mono tye pi jo ma gilirogi, nyo pi jo ma pe gilirogi bene? Wawaco ni, pi niye omiyo gikwano Abraim ni kite atir. ¹⁰ Onoŋo mono yam gikwano i kome niŋniŋ? Onoŋo gikwane ma pud pe gilire, nyo lacen ma onoŋo doŋ gityeko lire woko? Pe ma doŋ gityeko lire, ento ma pud peya gilire. ¹¹ Gimiye lirre macalo lanyut anyo lanen ma nyuto ni gikwano ni kite atir pi niyene ma onoŋo peya gilire. Meno miyo Abraim bedo kwaro dano ducu ma giye ma peya gilirogi, wek gin bene gikwangi ni kitgi atir, ¹² dok bene en kwaro pa jo ma gilirogi bene, pe pa dano ma gilirogi alira keken, ento pa jo ma gilirogi ma gilubo bene niye ma yam kwarowa Abraim obedo kwede ma onoŋo pud pe gilire. ¹³ Cikke ma onoŋo yam Lubaŋa ociko bot Abraim ki likwaye, ni, wi lobo ducu bibedo megi, gin mumiyo ociko, pe ni Abraim yam ocobo cik, ento pein en onoŋo oye Lubaŋa, ka doŋ gikwane ni kite atir. ¹⁴ Ka ce jo ma cobo cik gin aye jo ma wi lobo-ni ducu bedo megi, kono niye doŋ konnye pe, ki cikke bene kono konnye pe. ¹⁵ Pien cik miyo akemo mako Lubaŋa i kom dano, ento ka ma cik pe iye, turo cik bene pe. ¹⁶ Meno aye gin mumiyo cikke pa Lubaŋa ocuŋ i kom niye, wek obed me kica, dok pi moko cikkene bot likwayo pa Abraim ducu, pe bot jo ma lubo cik keken, ento kadi wa bot jo ma gibedo ki niye macalo Abraim. Pien en kwarowa ducu, ¹⁷ macalo yam gicoyo ni, “Doŋ aketi wek ibed kwaro rok mapol.” Cikke man doŋ gimoko i nyim Lubaŋa ma yam Abraim oye-ni, en Lubaŋa ma miyo kwo i kom jo muto, dok bene ma lwoŋo gin mogo ma yam komgi pe gibedo tye. ¹⁸ Abraim yam oye, kun onoŋo oketo genne i kom gin ma nen calo pe gitwero geno, omiyo en odoko kwaro rok mapol, kit macalo yam gicoyo ni, “Likwayu bibedo kit meno.” ¹⁹ En pe obedo nyap i niye i kare ma obedo ka paro pi kome kekene, ma onoŋo yam rom aroma ki gin ma oto, pien mwaka me ditte onoŋo doŋ cok romo miya acel kulu, dok bene medo i kom meno, dakone Cara onoŋo lalur. ²⁰ Niyene pe odok cen, pe obedo ka cabbe acaba i tamme i kom cikke pa Lubaŋa, ento niyene omedde ameda odoko matek, kun en miyo deyo bot Lubaŋa, ²¹ ma onoŋo lok donyo matut i cwinye ni, Lubaŋa twero tiyo gin ma ocikke pire. ²² “Pi niyene omiyo gikwane ni en dano ma kite atir.” ²³ Ento lok man ni, “Yam gikwane” onoŋo pe gicoyo pi en kene, ²⁴ ento gicoyo pi wan bene. Wan bene gibikwanowa ni kitwa atir, wan jo ma doŋ waye Lubaŋa ma yam ocero Rwotwa Yecu Kricito ki i kin jo muto-ni, ²⁵ en ŋat ma yam gineko pi balwa, ci Lubaŋa ocere woko wek gikwanwa ni kitwa atir.