¹ Melkijedek man yam obedo kabaka me Calem, dok bene ajwaka pa Lubaŋa Mamalo Twal. En orwatte ki Abraim i kare ma Abraim onoŋo doŋ dwogo ki ka neko luker ca, ci cut olamo gum i kom Abraim; ² ka doŋ Abraim opokke dul acel me apar me jami ducu ma en onoŋo. Mukwoŋo en kabaka me kit ma atir, man aye te lok me nyiŋe, dok bene en kabaka me Calem, ma te lokke ni, ‘Kabaka me kuc.’ ³ Wonne mo pe, minne-gu pe, kwarine bene pe, acakki me karene, kadi wa agikki me kwone bene pe. En obedo cal ki Wod pa Lubaŋa, obedo ajwaka nakanaka. ⁴ Koŋ wunen kit ma en dit kwede! Abraim, ma en aye kwarowa, yam omiyo bote dul acel me apar me jami ma en oyako. ⁵ Doŋ jo ma i kin likwayo pa Levi ma gubedo ajwagi, cik pa Moses yam ocikogi me jogo dul acel me apar ki bot jo Icrael. Meno onoŋo gijogo ki bot utmegigi, kadi bed gin bene gubedo likwayo pa Abraim. ⁶ Ento danu-nu ma kwarone pat ki megi-ni ogamo dul acel me apar ki bot Abraim, ka dok olamo gum i kom ŋat ma Lubaŋa ocikke bote. ⁷ Pe dok tye kalo akala mo me waco ni, lalam gum dit kato ŋat ma en olamo gum i kome. ⁸ Dok ki tuŋcel waneno ni, jo ma jogo dul acel me apar gin jo ma to woko, ento ki tuŋcel ŋat ma jogo en ŋat ma yam gicoyo lok i kome ni pud kwo. ⁹ ŋat mo twero waco ni, ka Abraim, omiyo dul acel me apar, Levi bene kikome, ma jogo dul acel me apar, yam omiyo mere kun wok ki bot Abraim, ¹⁰ pien i kare ca onoŋo en pud tye i kom Abraim ma kwarone i kare ma Melkijedek rwatte kwede ca. ¹¹ Doŋ ka kono yam gin ducu twero cobbe kakare pi ajwagi ma gin Lulevi, ma jo Icrael yam gunoŋo cik pa Lubaŋa kacel kwedgi-ni, piŋo gimito ni ajwaka mukene dok obin i kit pa Melkijedek, kun pe giwaco ni, i kit pa Aron? ¹² Pi meno ka giloko ajwaka, ci cik bene myero gilok woko. ¹³ Pien Rwotwa ma giloko lok magi i kome-ni obedo dano me kaka mukene, ma ŋat mo i kingi peya otiyo tic mo i kom keno tyer. ¹⁴ ŋene gire maber ni, Rwotwa yam oa ki i kin likwayo pa Juda, dok Moses yam pe oloko lok mo i kom kaka meno ma mako ajwagi. ¹⁵ Lok man doŋ otyeko nen woko ka maleŋ makato ka ajwaka mukene otuc macalo Melkijedek, ¹⁶ ma odoko ajwaka, pe pi cik mo ma lubo kaka, ento pi tek me kwone ma gin mo pe romo tyeko. ¹⁷ Pien coc ma yam gicoyo oloko ni, “En bibedo ajwaka nakanaka, i kit pa Melkijedek.” ¹⁸ Cik macon doŋ gibolo woko, pien onoŋo goro, dok konnye pe, ¹⁹ pien cik pa Moses yam pe ocobo gin mo kakare, ento kombeddi doŋ gikelo gen mo maber makato, ma twero miyo wanyiko cok bot Lubaŋa. ²⁰ Medo i kom meno bene, Lubaŋa yam okwoŋo kwoŋ i kome. Jo mukene ca gudoko ajwagi laboŋo kwoŋ mo, ²¹ ento Yecu odoko ajwaka pi kwoŋ pa Lubaŋa ma yam owacce ni, “Rwot doŋ okwoŋo kwoŋ, pe dok biloko tamme, ‘In ibedo ajwaka nakanaka.’” ²² Meno omiyo gicikke ma Yecu ocuŋ pire obedo ber makato mukene ca. ²³ Ajwagi mukene ca onoŋo yam welgi dwoŋ, pien to onoŋo ogeŋo nyimgi woko wek pe gumedde ki tic, ²⁴ ento Yecu bedo i dog ticce me ajwaka matwal, pien en bedo nakanaka. ²⁵ Mumiyo i kare ducu en tye ki twer me laro jo ma nyiko cok bot Lubaŋa, kun giwok ki bote, pien en bedo kwo kare ducu ka bako doge pigi. ²⁶ Ajwaka madit macalo meno aye ma romo cobo mitiwa. En leŋ, gin mo marac pe i iye, cilo me bal pe ogude. Yam gipoko en woko ki i kom lubalo, gitiŋe malo i wi polo. ²⁷ En pe calo ajwagi mukene madito ca, ma gityero gitum bot lubaŋa jwijwi, mukwoŋo pi balgi kengi, ka lacen doŋ pi bal pa lwak. Yecu otyero gitum kicel keken ma otyeko lok ducu i kare ma omine kene macalo gitum. ²⁸ Adada, cik pa Moses yero jo magoro ketogi bedo ajwagi madito, ento lok me kwoŋ ma gikwoŋo lacen i ŋe cik, oyero Wod pa Lubaŋa oketo obedo muporre matwal.