¹ Pi meno, koŋ waweku lok mukwoŋo i kom Kricito, ento wamedde anyim ki pwony pa jo muteggi, kun pe dok wanwoyo keto te gutine, ma en aye ŋut i kom tic ducu ma yam kwo pe iye, ki moko niyewa i kom Lubaŋa, ² ki dok me pwonnye i kom lok magi: kit batija mapatpat, keto ciŋ i wi dano, cer pa jo muto, ki kop ma giŋolo matwal. ³ Wabitiyo man giwa ka Lubaŋa oye. ⁴ Jo ma doŋ koŋ ceŋ omenyogi kicel, ma gubilo mot ma oa ki i polo, kun gibedo i kin jo mulimo Cwiny Maleŋ, ⁵ ma bene doŋ gutyeko bilo lok pa Lubaŋa kit ma mit kwede dok gubilo gin ma bitimme i kare ma bibino i anyim, kit jo meno ka guŋak woko, pe dok gitwero rocogi wek gudok manyen ka doŋ guŋuti. ⁶ Ka doŋ guŋak woko, meno gitye ka guro Wod pa Lubaŋa i kom yatariya pigi kengi, kun giketo lewic i kome i nyim lwak. ⁷ Pien Lubaŋa miyo gum i kom lobo ma mato kot ma cwer i kome kare ki kare, ka dok ceko ginapita ma konyo jo ma gipuro pigi. ⁸ Ento ka ce onyayo okuto ki ocok, konnye noŋo doŋ pe, kuro mere ka cen pa Lubaŋa keken, agikkine en aye mac ma gibiwaŋo kwede woko. ⁹ Ento wun, luwota, kadi bed waloko kit man, wageno ni wutye maber ma wukato jo meno i lok ma dok i larre. ¹⁰ Pien Lubaŋa gire pe ye gin ma pe tye kakare, wiye pe biwil i kom tic ma yam wutiyo, kadi ki mar ma wunyuto pire ki konyo jo pa Lubaŋa, ma pud wutye ka konyogi bene wa i kare-ni. ¹¹ Doŋ wamito ŋat acel acel i kinwu oket cwinye nio wa agikki, wek omi gin ma wuketo iye genwu-ni ocobbe kakare. ¹² Pe wudok luwackom, ento wulub kit pa jo ma pi niyegi, ki pi diyo cwinygi, gitye ka noŋo gin ma yam Lubaŋa ociko pire. ¹³ I kare ma Lubaŋa cikke bot Abraim, kit macalo pe tye ŋat mo ma kate-ni ki dit ma myero en okwoŋ ki nyiŋe, en okwoŋo ki nyiŋe kekene, ¹⁴ kun waco ni, “Adada abimii gum, dok abimiyo likwayu ginya gidoko mapol.” ¹⁵ Doŋ Abraim pi diyo cwinye omiyo en onoŋo gin ma yam Lubaŋa ociko pire. ¹⁶ Ka dano mo kwoŋo kwoŋ ci kwoŋo ki nyiŋ ŋat madit loye, dok ka pyem mo tye i kin dano, lok ma gimoko ki kwoŋ aye ma tyeko pyem meno. ¹⁷ En gin mumiyo Lubaŋa omoko cikkene ki kwoŋ, pien onoŋo mito nyuto maber twatwal bot jo ma myero gunoŋ gin ma giciko pire ni, gin ma en doŋ etyeko yubo, pe dok ebiloko woko. ¹⁸ Tye doŋ jami aryo ma pe dok lokke, ma Lubaŋa pe twero bwolo iye dano. Pi man, wan jo ma wariŋo walaro bote watye ki gin ma cuko cwinywa matek wek wamak gen ma giketo i nyimwa. ¹⁹ Watye ki gen man macalo lajuk me mel, ma cwinywa cuŋ iye matek, ma pe wawirre atata. Gen meno donyo wa i kabedo maleŋ i ot pa Lubaŋa, i ŋe boŋo kicika, ²⁰ ka ma Yecu otelo yo odonyo iye piwa, kun doŋ odoko ajwaka madit ma bedo nakanaka i kit pa Melkijedek.