¹ Caulo bene opwoyo tone apwoya. I kare meno ayelayela madwoŋ opoto i kom jo muye Yecu ma i Jerucalem; ci gin ducu guket woko ata i lobo ducu me Judaya ki Camaria, lukwena keken aye gudoŋ. ² Jo ma giworo Lubaŋa aye guyiko Citefano, kun gikoke matek twatwal. ³ Ento Caulo onoŋo mito ni etyek lwak jo muye Kricito woko ducu; donyo i ot ki ot ci ywayo co wa ki mon ka tweyogi i mabuc. ⁴ Jo ducu ma guket ata guwoto kun gitito lok me kwena maber. ⁵ Pilipo ocito i gaŋ mo me lobo Camaria ci otuco botgi pi Kricito ma Lubaŋa oyero. ⁶ Ci lwak ma gucokke gujolo lok ma Pilipo otito botgi ki cwiny acel i kare ma guwinyo, kun gineno bene lanyut ma en otiyo. ⁷ Pien jo mapol ma cen marac omakogi, cen oa woko ki i komgi kun gidaŋŋe ki koko matek; ki lwak lutwo akweya ki lugoro bene gucaŋ woko. ⁸ Kit meno yomcwiny obedo dwoŋ i gaŋ meno. ⁹ Ento yam onoŋo tye dano mo i gaŋ meno ma nyiŋe Cimon ma en lajok. En miyo rok pa jo Camaria giuro mada kun en wacce kekene ni en e dano madit. ¹⁰ Gin ducu giketo cwinygi i lok ma en waco, litino wa ludito bene, kun giwaco ni, “Man aye dano ma tye ki tek pa Lubaŋa ma gilwoŋo ni Madit-ti” ¹¹ Gibedo ka keto cwinygi ka winyo lokke, pien obedo kwedgi pi kare malac kun miyo giuro tim jokjokke. ¹² Ento ka guye lok me kwena maber ma Pilipo otito i kom ker pa Lubaŋa ki i kom Yecu Kricito, ci gibatijagi, co wa ki mon. ¹³ Kadi wa Cimon bene oye, ka gibatija en ci omedde obedo kacel ki Pilipo kun neno lanyut ki taŋo madito ma en tiyo, ci ouro mada. ¹⁴ Ka lukwena ma gitye i Jerucalem guwinyo ni Lucamaria guye lok pa Lubaŋa, ci gucwalo botgi Petero ki Jon. ¹⁵ Gin bene ka gucito kunnu, ci gulego pigi wek gulim Cwiny Maleŋ; ¹⁶ pien onoŋo peya obino i kom ŋat mo i kingi, ento yam gibatijagi i nyiŋ Yecu keken. ¹⁷ Ka guketo ciŋgi i komgi, ci gulimo Cwiny Maleŋ. ¹⁸ Ka Cimon oneno ni gulimo Cwiny Maleŋ pi keto bad pa lukwena, ci okelo lim botgi ¹⁹ kun waco ni, “Wumiya tek man bene, wek an bene ka aketo ciŋa i kom dano mo olim Cwiny Maleŋ.” ²⁰ Ento Petero owacce ni, “Centeni myero orweny woko matwal, kacel ki in, pien itamo pi wilo mot pa Lubaŋa ki lim! ²¹ In pe itye ki gin mo nyo dul mo i lok man, pien cwinyi pe leŋ i nyim Lubaŋa. ²² Doŋ iŋut i kom balli man, dok ileg Rwot, wek ka twerre lok ma tye i cwinyi gitimi iye kica. ²³ Pien aneno cwinyi kec calo keda, bal otweyi woko idoko lamabucce.” ²⁴ Ci Cimon odok iye ni, “Wuleg Rwot pira wek gin ma wuwaconi pe opot i koma.” ²⁵ Ka gutyeko tito lok me caden ki tuco lok pa Rwot, ci gudok i Jerucalem, kun gitito lok me kwena maber i paco mapol ma i Camaria. ²⁶ Ento lamalaika pa Rwot owaco ki Pilipo ni, “A iwot idok tuŋ acuc i yo ma a Jerucalem dok piny i Gaja.” Yo ma kunnu wok ki i tim. ²⁷ Ci oa ocito. Nen, laco mo Laetiopia, ma gikolo, oa ka woro Lubaŋa i Jerucalem. En onoŋo latic madit pa Kandake, kabaka ma dako me lobo Etiopia, ladit ma lakan jamine ducu. ²⁸ I kare ma dok i lobogi, obedo i gadigadine kun kwano buk pa lanebi Icaya. ²⁹ Cwiny Maleŋ owaco bot Pilipo ni, “Nyik cok, irwatte ki gadigadi man.” ³⁰ Ka Pilipo oriŋo bote, ci owinyo en ka kwano buk pa lanebi Icaya, ci openye ni, “In iniaŋ lok ma ikwano-ni?” ³¹ En ogamo ni, “Aniaŋ niŋniŋ kono, ka ŋat mo pe okonya?” Ci olwoŋo Pilipo ni obed kwede kacel. ³² Dul ma en obedo ka kwanone obedo kit man: “Calo romo ma gitero ka nekone, nyo latin romo ma oliŋ i nyim lanyar yerre, kit meno en pe oŋamo doge ka lok. ³³ Pi mwolo mere pe giŋolle kop ma atir. Aŋa ma twero yeko kit likwaye? Pien kwone doŋ gikwanyo woko ki i lobo.” ³⁴ Ci laco ma gikolo owaco bot Pilipo ni, “Alegi, titta, lanebi oloko lok man i kom aŋa, i kome kene nyo i kom ŋat mukene?” ³⁵ Ci Pilipo ocako lok; ocako ki lok man ma yam gicoyo kun tito lok me kwena maber i kom Yecu. ³⁶ Ka guwoto kacel i yo, ci guo ka ma pii tye iye. Laco ma gikolo owacci, “Nen pii doŋ ene! Gin aŋo ma geŋa limo batija?” ³⁷ Ci Pilipo owacce ni, “Ka iye ki cwinyi ducu ci itwero.” En odok iye ni, “An aye Yecu Kricito, ni en Wod pa Lubaŋa.” ³⁸ Ci ociko ni gadigadi myero ocuŋ; gin ducu gulor i pii, Pilipo ki laco ma gikolo, ci Pilipo obatija en. ³⁹ Ka gukatti woko ki i pii, Cwiny pa Rwot otiŋo Pilipo, otero woko, laco ma gikolo-ni pe dok onene, ci owoto wotte ki yomcwiny. ⁴⁰ Ento Pilipo otuc wa i Ajota kun wirre ka tuco lok me kwena maber i gaŋi ducu nio ka obino wa i Cecaria.