¹ I kare meno ka lupwonnye welgi omedde, ci Lujudaya ma giloko leb Grik gubedo ki ŋuro i kom Lujudaya ma giloko leb Ibru, ni pien nino ducu ka gipoko lim pe giparo pi mon togi. ² Ka lukwena apar wiye aryo gulwoŋo lwak lupwonnye kacel ci guwaco botgi ni, “Pe myero wabwot tito lok pa Lubaŋa pi tic i kom meja. ³ Pienno, utmego, wuyer i kinwu jo ma giloko nyiŋgi maber, jo ma gupoŋ ki Cwiny Maleŋ ki ryeko, ma myero waketgi i dog tic man. ⁴ Ento wan wabimine ka lega ki tito lok.” ⁵ Lokgi oyomo cwiny lwak ducu, ci guyero Citefano, en dano ma opoŋ ki niye ki Cwiny Maleŋ, ki Pilipo, ki Porokulo, ki Nikanori, ki Timon, ki Parmena, ki Nikolao ma en aye dano me Antiokia ma doŋ gigamo i dini pa Lujudaya. ⁶ Ci giketogi i nyim lukwena, ka gulego ci guketo ciŋgi i komgi. ⁷ Ci lok pa Lubaŋa omedde; ki wel lupwonnye bene omedde madwoŋ twatwal i Jerucalem, ki lwak ajwagi pa Lubaŋa mapol bene gujolo niye. ⁸ Ka Citefano opoŋ ki kica pa Lubaŋa ki tek, ci obedo ka tiyo taŋo ki lanyut i kin lwak. ⁹ Ci jo mogo ma gua ki i kacokke ma gilwoŋo ni kacokke pa jo ma gigonyogi ki i opii, kacel ki jo mogo me Cirene ki me Alegijanderia, ki jo ma gua Cilicia ki Acia, gubedo ka pyem ki Citefano. ¹⁰ Ento ryekone oloyogi, ki Cwiny Maleŋ ma en loko kwede. ¹¹ Ci gupiyo dano i muŋ kun giwaco ni, “Wawinyo en ka loko kun yeto Moses ki Lubaŋa.” ¹² Ci gutugo lwak ki ludoŋo ki lupwony-cik, ka gubino gumake ci gutere i nyim Lukiko, ¹³ kun gikelo lucaden me goba ma giwaco ni, “Laco man pe weko loko lok marac ma kemo kabedo man maleŋ ki cik pa Moses, ¹⁴ pien wabedo ka winyo en ka loko ni Yecu man me Najaret bimuko ot man woko, ka dok biloko kit ma yam Moses omiyowa me aluba.” ¹⁵ Jo ducu ma gubedo i Lukiko guciko waŋgi i kome, ci guneno waŋe calo wan lamalaika.