¹ Ento myero iniaŋ man ni, i kare me agikki, piny bibedo marac i kare mogo. ² Pien dano bibedo ka maro komgi kengi kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leŋ. ³ Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, ⁴ luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubaŋa. ⁵ Gibimako dini dok gibilubo i kitgi ma nen ki woko keken, kun gikwero tekone woko. Pokke woko ki i kom jo macalo meno ⁶ Pien tye jo mogo i kingi ma giridde gidonyo i paco pa dano mukene, ci giloyo tam pa mon mogo ma gorogoro, ma peko me bal obwoyogi woko, ma mitgi tye patpat ci bedo ka ywayogi tuŋŋi ki tuŋŋi, ⁷ kun gimito pwonnye i kare ducu, ento pe dok gitwero niaŋ i lok ada. ⁸ Jo meno girom ki Yane ki Yambure ma yam gupyem ki Moses, pien gin bene gitye ka pyem ki lok ada i kit acel-lu; ryekogi doŋ oballe woko, niyegi pe tye kakare. ⁹ Ento pe gibimedde kwede nakanaka, pien miŋoginu biŋene woko bot lwak, calo pa jo aryo ca. ¹⁰ Ento in doŋ iŋiyo kweda woko kun ineno pwonnya, kita ki tam ma aketo i nyima. Ineno niyena, diyo cwinya, mar ma atye kwede, kit ma ayelle kwede kun aciro can. ¹¹ Ineno bene kit ma giuna kwede, ki can ma aneno; dok iŋeyo gin ma otimme i koma i Antiokia, i Ikonio, ki Licitra, kit ayelayela ma yam aciro; ento Rwot olara ki i gin ducu. ¹² Ada, jo ma mito lubo kit pa jo ma lworo Lubaŋa, kun gibedo i Kricito Yecu, gibiunogi. ¹³ kun jo maraco ki jo ma lugoba gibimedde ki bedo marac makato kare, kun gibwolo dano, gin bene gibibwologi. ¹⁴ Ento in myero imedde i gin ma ipwonyo, ki ma doŋ iye adada, kun iŋeyo jo ma yam gupwonyi iye. ¹⁵ Iŋeyo bene ni, cakke i tinoni iŋeyo coc maleŋ ma yam gicoyo ma twero pwonyi i yo me larre pi ye Kricito Yecu. ¹⁶ Ginacoya ducu ma yam gicoyo, gicoyo pi teko pa Cwiny pa Lubaŋa. Konyo me pwony, me juko dano, me tiro kit pa dano, me nyebo dano wek gulub kit ma atir, ¹⁷ wek dano pa Lubaŋa obed muteggi, ma bene oyubbe i yo ducu, ma romo tiyo kit tic mo maber ducu.