¹ Latinna, in doŋ itim tek i kica ma gimiyowa i Kricito. ² Gin ma doŋ ityeko winyo ki bota i nyim lucaden mapol, in bene myero itit bot jo ma genne ma giromo pwonyo ki jo mukene. ³ Cir arem me gin marac ma gitimo i komi, kit macalo askari maber pa Yecu Kricito. ⁴ Pe tye askari mo ma ka tye i dog tic dok rwakke i tiyo tic ma woko, pien tamme tye ni myero eyom cwiny ŋat ma ocoye i mony. ⁵ Lapyem i tuko pe twero loyo tuko ka pe olubo cik me tuko meno kikome. ⁶ Lapur ma en latic matek i potone en aye ma myero okwoŋ camo gin ma ocek iye. ⁷ Tam gin ma aloko, pien Rwot bimiyo iniaŋ i jami ducu. ⁸ Po i kom Yecu Kricito, ma ocer ki i kin jo muto, en lakwar Daudi, kit macalo an atito kwede lok me kwena maber. ⁹ Lok meno me kwena maber en aye gin ma atye ka ciro can pire, kun gitweya woko ki nyor calo gitweyo labalo! Ento lok pa Lubaŋa gire pe gitweyo ki nyor. ¹⁰ Meno en gin mumiyo atye ka ciro arem kare ducu, pi jo ma giyero, wek gin bene gunoŋ larre ma tye i Kricito Yecu, kacel ki deyo ma pe gik. ¹¹ Lok man lok ada, ni, “Ka wato kwede, wabikwo kwede bene, ¹² ka waciro can, wabibedo ka loc kacel kwede; ka wakwere, en bene bikwerowa; ¹³ ka wan jo ma pe genne, en gire genne nakanaka, pien en pe twero kwerre kene.” ¹⁴ Po wigi i kom lok man, dok icikgi i nyim Rwot ni gin guwek pyem i te lok mapatpat, pien meno pe konyo gin mo, ento dok medde me balo jo ma winyo abala. ¹⁵ Ket tek kit macalo itwero pi mine keni bot lubaŋa macalo ŋat ma gipwoyo, latic ma pe ki gin mo ma lewic myero omake iye, ma tero lok me ada i yo atir. ¹⁶ Kwer boko lok ma pe me woro Lubaŋa, pien lok ma kit meno medde ki rwenyo dano arwenya i woro Lubaŋa, ¹⁷ dok bene lokgi bituco yone calo bur ma camo kom dano oyotoyot. Kumenayo gin ki Pileto gitye i kin jo meno. ¹⁸ Doŋ guŋak woko ki i lok ada kun giwaco ni wan doŋ wacer con. Man gitye ka balo kwede niye pa jo mogo. ¹⁹ Ento guti me ot ma Lubaŋa oketo doŋ tye ma ocuŋ woko matek likiŋ, ma bene tye ki coc man i kome ni, “Rwot ŋeyo jo ma gin jone kikome,” dok ni, “Dano acel acel ma lwoŋo nyiŋ Rwot myero opokke woko ki i bal.” ²⁰ I ot mo madit, pe bedo iye jami me jabu ki ryal keken, ento bedo iye bene jami mogo ma gitiyo ki bao ki ma gitiyo ki lobo; mogo gitiyo kwedgi i kare me deyo keken, ento mukene-gu gitiyo kwedgi i kare ducu. ²¹ Ka ce ŋat mo olonnye kekene, kun oweko bedo ki kit marac woko, en bibedo atabo ma gitiyo kwede i kare me deyo, ma bedo maleŋ, ma konyo won ot, ma oyubbe pi tic ducu maber. ²² Wek miti me awobi obedi, ento ket tammi i bedo ki kit ma atir, niye, mar ki kuc, kacel ki jo ducu ma kok bot Rwot kun igi leŋ. ²³ Kwer pyem me miŋomiŋo ma bino pi kwiya piny-gu woko; in iŋeyo kodi pyem macalo meno kelo daa. ²⁴ Latic pa Rwot myero obed ŋat ma pe da atata, myero obed ŋat ma lakica bot dano ducu, lapwony ma ladiro, ŋat ma diyo cwinye, ²⁵ ŋat ma tiro jo ma pyem kwede ki mwolo. Gwok nyo Lubaŋa bimiyogi cwiny me ŋut, ka wek doŋ guniaŋ maber i kom lok ada, ²⁶ miyo ryekogi dwogo, ci gibwot ki i owic pa Catan ma onoŋo yam omakogi, omiyo gutiyo gin ma en mito.