¹ Lurema, man doŋ waraga me aryo ma acoyo botwu. I gin aryo ducu acuko iye cwinywu wek wutam tam ma atir, kun apoyo wiwu bene, ² wek wupo i kom lok ma lunebi maleŋ yam guloko con, ki i kom cik pa Rwot ma en lalar, ma lukwenawu yam gukelo botwu. ³ Mukwoŋo myero wuniaŋ man ni, i kare me agikki jo ma luŋala gibituc ki ŋalagi, kun gilubo mitigi kengi, ⁴ kun gipenyo peny bene ni, “Cikke me dwogone ma gitito pire-ni tye kwene? Pien cakke ma kwarowa guto woko, jami ducu tye i kit ma yam gitye kwede i acakki keto lobo.” ⁵ Gimiyo wigi wil woko akaka i lok man ni, polo yam onoŋo obedo tye con, ki lobo bene ma giketo ki pii mua ki i pii, pi lok ma lubaŋa oloko. ⁶ Pii bene aye ma yam otyeko lobo me kare maca ka pii aluka ocorre omwonyo woko. ⁷ Pi lok pa Lubaŋa acel-lu bene, polo ki lobo me kare man doŋ gikano pi kuro mac; ma gitye ka gwokone nio ka nino me ŋolo kop ki tyeko dano ma pe gilworo Lubaŋa oromo. ⁸ Ento pe wiwu owil, lurema, i lok acel-li, ni, ki bot Rwot nino acel rom ki mwaka alip acel, mwaka alip bene rom ki nino acel. ⁹ Rwot pe galle agala ka cobo cikkene kit macalo jo mogo gitamo kwede, ento en pud tye ka diyo cwinye i komwu, pien en pe mito ni ŋat mo orweny woko matwal, ento mito ni jo ducu guo i niŋut. ¹⁰ Ento nino pa Rwot bibino macalo lakwo, ka doŋ polo birwenyo woko ki mor madwoŋ, lakalatwe bileny woko i mac, lobo ki jami ducu ma tye iye biwaŋ woko. ¹¹ Kit macalo jami magi ducu bitum woko kit meno-ni, myero wubed jo ma cal niŋniŋ, kun wulubo kit kwo maleŋ ki me woro lubaŋa? ¹² Myero wukur nino pa Lubaŋa, wuket cwinywu iye wek ninone oo oyotoyot. I nino meno polo bilyel, leny woko, ki lakalatwe bene bileny woko i mac. ¹³ Ento macalo en yam ociko, watye ka kuro polo manyen ki lobo manyen, ka ma kit ma atir bedo iye. ¹⁴ Pi meno, lurema, ka wutye ka kuro man, wuket tek wek Lubaŋa pe onoŋ roc mo nyo bal mo i komwu, ento onoŋ wutye ki kuc. ¹⁵ Wutam ni, diyo cwiny pa Rwot aye larrewa ennu. Ominwa Paulo ma wamaro ocoyo botwu bene kit meno, pi ryeko ma gimiye. ¹⁶ kun loko lok pi lok man macalo en loko pire i waragane ducu. I waragane tye lok mogo ma niaŋ iye tek, ma jo ma pe gupwonnye, ki jo ma pe gucuŋ matek, gidwalo tere woko, macalo gutimo bene ki coc mukene ma yam gicoyo, ma omiyo gin kikomgi gurwenyo woko matwal. ¹⁷ Pi meno, lurema, kit ma doŋ onoŋo wuŋeyo man con, wugwokke pe wuwek jo ma pe giworo cik mo gubwolwu, dok pe guŋakwu woko i tamwu, miyo wupoto woko ki ka ma wucuŋ iye matek. ¹⁸ Wumedde ki doŋo i kica pa Rwotwa, ma en Lalarwa Yecu Kricito, kun wumedde ka ŋeye bene. Deyo obed bote kombeddi ki nakanaka. Amen.