¹ Ento lunebi ma lugoba bene yam gunen i kin dano, kit meno bene lupwony ma lugoba gibinen i kinwu. Gibikelo pwony mogo mapat i muŋ ma rwenyo dano, kun gikwero Laditgi woko ma owilogi, ento meno bimiyo gin kikomgi gibirwenyo woko oyotoyot. ² Jo mapol bilubo kitgi me timo tim coco, ci bimiyo dano cayo yo me ada pigi. ³ Pi worogi me lim, miyo gibinoŋo lim ki botwu pi lokgi me goba ma gin guyubo ayuba. Ento lok ma yam giŋolo i komgi doŋ gitye ka yubone, ki to ma myero opot i komgi bene pe onino. ⁴ Pien Lubaŋa yam pe oweko lumalaika ka gubalo, ento obologi woko piny i bur lyel, ocwalogi i bur ka macol, wek gigwokgi kunnu nio ka kare me ŋolo kop doŋ oromo. ⁵ En yam pe oweko lobo i kare macon, ento ogwoko Nua keken, latit lok me kit ma atir, kacel ki jo mukene abiro, i kare ma yam en ocwalo pii aluka wek omwony lobo pa jo ma pe gilworo Lubaŋa woko. ⁶ Owaŋo gaŋigi Codom ki Gomora woko ducu gudoko buru, kun oŋolo kop me tyekogi woko, ci omiyo gubedo lanen bot jo ma pe bilworo Lubaŋa i kare me anyim. ⁷ Ento Lubaŋa olaro Lot, dano ma kite atir, ma yam cwinye ocwer twatwal pi tim kwele pa jo maraco. ⁸ Pien tim maraco ma dano ma kite atir-ru obedo ka nenone ki ka winyone nino ki nino, i kare ma en obedo botgi, omiye waŋcwiny madwoŋ twatwal. ⁹ Kit meno Rwot ŋeyo laro dano ma gilworo Lubaŋa ki i ayelayela ma giomo kwede cwinygi dok ŋeyo gwoko jo ma kitgi pe atir ka ma giketo iye can i komgi nio ka nino me ŋolo kop oromo. ¹⁰ makatone gin jo ma lubo mitigi me kom ma cidogi woko, kun gicayo wegi twero. Cwinygi tek, gicerre woko acera gigi, pe bene gilworo yeto wegi deyo. ¹¹ Ento kadi bed lumalaika giloyogi ki tek ki twero, pe giyetogi ka gukelo lok i komgi i nyim Rwot. ¹² Ento jo-nu gical ki lee ma pe ryek, dok ma lubo kit ma giketogi kwede, ma ginywalogi me amaka ki me aneka; gicayo lok ma gikwiya. Gibinekogi woko calo lee, ¹³ kun gitimogi marac pi gin marac ma gutimo. Cwinygi yom i karama maraco ma gicamo i dyeceŋ. Gikelo lewic ki bal ka guribbe kwedwu i camo karama, pien gimito megi gat me yomcwiny marac keken. ¹⁴ Waŋgi yenyo mon ma myero gitim kwedgi abor, pe giywe ki yenyo yo me timo bal. Giciko owic me mako jo ma cwinygi wirre atata. Cwinygi doŋ opwonnye woko i yo me woro me lim. Gin doŋ jo ma giceno! ¹⁵ Gubwoto yo ma atir, gurwenyo woko ata. Gulubo yo pa Balaam wod pa Beor, ma yam maro lim ma onoŋo pi timo gin marac, ¹⁶ ento yam gijuke pi turo cik. Kana ma pe loko yam oloko ki dwan pa dano, ci ojuko apoya pa lanebi meno woko cut. ¹⁷ Magi gin waŋ it ma pii pe iye, lupu ma yamo kot tero. Gityeko gwoko kabedo macol licuc pigi. ¹⁸ Giloko lok mogo maditodito me wakke ma tere pe, kun gibito ki dano ma pud gibwot abwota ki i kin jo ma kitgi obedo atata, ka giterogi i timo abor-gu kun gilubo mit me kom. ¹⁹ Gin gicikke me miyo jo meno gulone kengi, kun gin kikomgi gibedo opii pa gin ma balogi; pien ka gin mo oloyo kwo pa dano mo, en doŋ noŋo odoko opii pa gin meno. ²⁰ Ka ce dano doŋ gubwot woko ki i cilo me bal me lobo pi ŋeyo Rwotwa ma en Lalarwa Yecu Kricito, ka dok pud gumoko i kom bal meno ci loyogi woko matwal, bimiyo gibedo marac lacenne makato ma yam con. ²¹ Onoŋo twero bedo ber ka kono gin pe guŋeyo yo me kit ma atir, kato ma guŋeyo ka dok giweko cik maleŋ ma gimiyogi woko. ²² Man otimme i komgi calo lok ma carolok me ada oloko ni, “Gwok lokke dok ka naŋo ŋokke,” ki dok ni, “Opego ma gilwoko kome, lokke dok ka nywanne i coto.”