¹ Waraga man oa ki bot Cimon Petero, latic dok lakwena pa Yecu Kricito. Bot wun jo ma wunoŋo niye ma pire tek ma rom ki mewa pi kit ma atir pa Lubaŋawa ma en Lalarwa Yecu Kricito: ² Kica ki kuc myero onya botwu pi ŋeyo Lubaŋa ki Rwotwa Yecu Kricito. ³ Pi tekone Lubaŋa omiyowa jami ducu ma kelo kwo ki cwiny me lworo en, wek waŋe en mulwoŋowa i deyone ki ditte kikome. ⁴ Pi deyo ki ditte en omiyowa cikke madoŋo twatwal ki me wel madwoŋ, wek ka walimo, wabwot woko ki i balle me kit pa dano ma tye i lobo pi miti marac, ka wek doŋ waribbe i kit pa Lubaŋa. ⁵ Pi lok man, wucukke matek me medo kit maber i kom niyewu; ki bene wumed ŋec i kom kit maber; ⁶ i kom ŋecwu wumed iye gwokke kenwu, ki i kom gwokke kenwu wumed iye diyo cwiny; i kom diyo cwiny wumed iye cwiny me lworo Lubaŋa; ⁷ i kom cwiny me lworo Lubaŋa wumed iye mar me omego; ki i kom mar me omego wumed iye mar. ⁸ Pien ka wutye ki gin magi ducu, ma wutye kwede bene mabup, ci bimiyo wubedo jo ma ŋeyo Rwotwa Yecu Kricito i yo ma konyo, dok ma wunyak nyig mabeco. ⁹ Pien dano ma pe ki gin magi noŋo en latowaŋ, pe neno gin mo ki ka mabor, dok noŋo wiye doŋ owil woko ni yam gilwoke woko i kom balle macon. ¹⁰ Pi meno, utmegina, myero wutemme me medde wek wumok i lwoŋowu matek, ki i yer ma Lubaŋa oyerowu kwde; pien ka wutimo kit meno, pe wubipoto kadi ki acel. ¹¹ Meno bimiyo yo yabbe botwu malac me donyo i ker ma ri nakanaka pa Rwotwa ma en Lalarwa Yecu Kricito. ¹² Meno en gin mumiyo kare ducu amito poyo wiwu i lok magi, kadi bed wuŋeyogi, dok bene wumako matek likiŋ lok ada ma gityeko kelo botwu. ¹³ Atamo ni ber twatwal an me cuko cwinywu kun apoyo wiwu, ma pud atye ki kom me lobo man; ¹⁴ pien aŋeyo ni, kare me weko koma doŋ cok, kit macalo Rwotwa Yecu Kricito yam onyutta kwede. ¹⁵ Dok abiketo tek, wek wubed ki gin ma poyo wiwu i lok magi kare ducu, ka doŋ ato woko. ¹⁶ Pien i kare ma yam watittiwu pi teko pa Rwotwa Yecu Kricito, ki pi dwogone, onoŋo pe walubo lok ododo mogo ma wan wayubo ayuba ki ryekowa, ento wan yam waneno deyo me ditte ki waŋwa. ¹⁷ Yam waneno ka en olimo woro ki deyo ki bot Lubaŋa Won, i kare ma dwan oa ki bot Won Deyo Madit, obino botwa kun waco ni, “Man aye Woda ma amaro, ma cwinya yom i kome.” ¹⁸ Dwan meno yam wawinyo oa ki i polo ada, pien onoŋo wan watye kacel kwede kunnu i wi got maleŋ. ¹⁹ Meno doŋ omoko piwa lok ma yam lunebi guloko. Wun bene myero wuket cwinywu i lokgi, pien lokgi-ni bedo macalo tara ma lyel i latwok bene oryeny, omenyo cwinywu. ²⁰ Mukwoŋo myero wuŋe man ni, pe tye lok mo ma lunebi gucoyo ma ŋat mo twero gonyo pire kene; ²¹ pien pe tye lok pa lanebi mo ma yam obino pi mit pa dano, ento Cwiny Maleŋ aye mumiyo dano guloko lok ma oa ki bot Lubaŋa.