¹ Pi meno, wan ma doŋ giorowa i tic man pi kica pa Lubaŋa cwinywa pe dok tye ka dok cen. ² Wan doŋ wadag kit ducu ma gikano, ki kit me lewic; dok bene watyeko kwero tic me bwolo woko ki nyobo lok pa Lubaŋa, ento pi loko lok ada ka maleŋ wageno ni ŋec ma tye i cwiny dano acel acel ma nyutte balle bipwoyowa. ³ Ka ce lok me kwena maber ma wan wakelo oumme woko, noŋo oumme ki tuŋ bot dano ma gitye ka rwenyo woko arwenya. ⁴ Gin jo ma pe giye-nu, lubaŋa me lobo man doŋ oumo tamgi woko wek pe gunen leŋo me lok me kwena maber i kom deyo pa Kricito, ma en cal pa Lubaŋa kikome. ⁵ Wan pe watito lok i komwa kenwa, ento i kom Yecu Kricito, ma en aye obedo Rwot, ma wan kikomwa wadoko luticwu pi Yecu. ⁶ Pien Lubaŋa ma yam owaco ni, “Leŋo myero oryeny kun a i colpiny,” en aye ma doŋ oryeny i cwinywa, omiyowa leŋo me ŋeyo deyo pa Lubaŋa ma oryeny i waŋ Kricito. ⁷ Ento watye ki lonyo man i atabo ma gicweyo ki lobo, me nyuto ni tek madwoŋ me twero obedo gire pa Lubaŋa, pe oa ki botwa. ⁸ Gidiyowa woko tuŋŋi ki tuŋŋi, ento pe giridowa ma okato kare; tamwa ocuŋ woko, ento genwa pe oballe; ⁹ giunowa, ento pe giwekowa ata; gibolowa piny i ŋom ligwek, pe bene wato. ¹⁰ Nino ducu watiŋo to pa Yecu i komwa, wek kwo pa Yecu bene onen woko ka maleŋ i komwa-ni. ¹¹ Pien nino ducu wan ma wakwo wamine me to pi Yecu, wek omi kwo pa Yecu onen woko ka maleŋ i komwa ma to-ni. ¹² Mumiyo to tye ka tic i komwa, ento kwo tye ka tic i komwu. ¹³ Wan watye ki kit cwiny acel-lu me niye ma yam omiyo gicoyo ni, “Aye, en mumiyo aloko.” Wan bene waye, mumiyo watye ka lok. ¹⁴ Waŋeyo ni, ŋat mucero Rwotwa Yecu bicerowa bene kacel ki Yecu, ci bikelowa i nyime kacel kwedwu. ¹⁵ Pien meno ducu otimme piwu, wek kica pa Lubaŋa omedde bot jo mapol, wek gin bene gumedde ki pwoc madwoŋ ma kelo deyo bot Lubaŋa. ¹⁶ En aye gin mumiyo cwinywa dok pe tye ka dok cen. Kadi bed kwowa ma woko tye ka balle, ento kwo ma i iwa tye ka roc, doko nyen nino ki nino. ¹⁷ Pien un ma giunowa kwede pe pek, bedo pi kare manok mo keken, dok bene tye ka yubo botwa deyo mapek ma pe tum, ma dit matek makato; ¹⁸ pien pe waciko waŋwa i kom gin ma nen, ento i kom gin ma pe nen. Gin ma nen bedo pi kare manok mo keken, ento gin ma pe nen ri nakanaka.