¹ Wan dok wacako pakke kenwa? Nyo wamito waraga me pakowa botwu, macalo jo mogo gitye kwede, nyo waraga ma wun kikomwu aye wucoyo? ² Wun kikomwu aye doŋ wubedo waraga me pakowa, ma gicoyo i cwinywa, ma dano ducu gitwero ŋeyo dok gikwano. ³ Doŋ wutyeko nyuto ka maleŋ ni wun wubedo waraga ma oa ki bot Kricito, ma wan wakelo. Pe gicoyo ki vino, pe gicoyo i kom got; ento ma ka got, Kricito ocoyo i cwiny dano kun coyo ki Cwiny pa Lubaŋa makwo. ⁴ Gin mumiyo aloko kit meno, pien wacuŋ matek i kom Lubaŋa pi Kricito. ⁵ Wan kikomwa pe waromo loko ni gin mo oa ki botwa; tekwa ducu oa ki bot Lubaŋa. ⁶ En bene mumiyo waromo bedo lutic me gicikkene manyen, pe lutic me cik ma gicoyo acoya, ento me Cwiny Maleŋ; pien gin ma gicoyo acoya kelo to, ento Cwiny Maleŋ kelo kwo. ⁷ Cik ma yam gigoro ki nukuta i kom got apaya ma ticce me kelo to, onoŋo obino ki deyo, omiyo neno waŋ Moses oloyo jo Icrael pi nyim Moses muryeny ocaro waŋgi woko, ma ryeny i tur nyime-nu otugi rwenyo woko. ⁸ Iyo, tic pa Cwiny pa Lubaŋa deyone pe bikato maca matek twatwal? ⁹ Pien ka tic ma miyo kop loyo dano tye ki deyo, ci tic ma miyo gikwano dano ni kitgi atir deyone pe doŋ kato maca woko? ¹⁰ Kombeddi doŋ gin ma yam tye ki deyo doŋ odoko gin ma pe ki deyo kadi ki acel mo, pi deyo mukene ca ma doŋ kate matek twatwal-li. ¹¹ Pien ka gin ma yam orwenyo woko obino ki deyo, gin ma ri myero doŋ obed ki deyo makato. ¹² Pien wan watye ki kodi gen man, en mumiyo waloko ki tekcwiny. ¹³ Pe dok wacal ki Moses ma yam oumo waŋe ki boŋo, wek jo Icrael pe gunen kit ma ryeny mucaro waŋgi-ni tye ka rwenyo woko kwede i tur nyime, ci otum woko. ¹⁴ Ento onoŋo tamgi yam oumme woko; nio wa tin tamgi pud oumme i kite acel-lu ka gikwano botgi gicikke macon, pien laum ca twero kwannye pi Kricito keken. ¹⁵ Kadi wa i kare-ni ka gikwano botgi cik pa Moses, laum pud bedo kakare, umo tamgi woko. ¹⁶ Ento ka dano mo olokke bot Rwot, laum meno kwannye woko matwal. ¹⁷ Rwot ma waloko pire kany-nyi en Cwiny Maleŋ; ka ma Cwiny pa Rwot tye iye, kunnu kuc bene tye iye. ¹⁸ Ki wan ducu ma doŋ gikwanyo laum woko ki i waŋwa watye macalo kiyo ma miyo deyo pa Rwot nen macalo ryeny ceŋ, mumiyo watye ka lokke me doko calo en, kun deyone medde ameda i komwa; meno aye tic pa Rwot, ma en Cwiny Maleŋ.