¹ Kono wudiyo cwinywu manok mo i koma i miŋona-ni. Koŋ wudi cwinywu ba! ² Nyeko omaka piwu ki lakodi nyeko ma Lubaŋa tye kwede bene-ni; pien wucal ki nyako ma ayubo me nyomme ki laco acel, kun ageno ni abitere bot cware, en aye Kricito, kun en nyako maleŋ ma pud pe laco mo obedo kwede. ³ Ento atye ki lworo ni, kit macalo twol yam obwolo Kawa ki ryekone, wun bene dano bibalo tamwu woko, ma miyo pe doŋ wubimaro Kricito ki cwinywu ducu ki mar maleŋ. ⁴ Pien ŋat mo ma obino botwu, ka cako tito botwu pi Yecu mukene mapat ki maca ma watito pire botwu-ni, nyo omiyowu cwiny mapat ma yam pe wutye kwede, nyo otito lok me kwena mo mapat ma yam pe wugamo, meno wudiyo cwinywu iye maber twatwal. ⁵ Ki i tamma, aneno ni lukwena madoŋo ma gukato kare ca pe gikata kadi ki acel. ⁶ Gwok nyo pe aryek i lok, ento aryek i ŋec mada. Meno yam doŋ wanyuto botwu ka maleŋ, i yo ducu ki i kare ducu. ⁷ Yam atimo bal ka mwolle kena wek aket dit i komwu, kun atito botwu lok me kwena maber mua ki bot Lubaŋa nono, laboŋo gamo cul mo? ⁸ Gitwero waco ni yam ayako lwak pa Kricito ka mukene piwu, pien ceŋ agamo lim ki botgi pi ticca botwu. ⁹ Dok bene i kare ma onoŋo atye botwu, ka can jami mo omaka, pe ayelo ŋat mo i kinwu, pien utmego ma gua ki i Makedonia gukelo gin ducu ma mitte pira. Onoŋo abedo ma agwokke, dok bene abigwokke, wek pe amiwu peko mo. ¹⁰ Doŋ awaco botwu ni, macalo ada pa Kricito tye i cwinya, pe gibigeŋo nyattena i lok man i lobo Akaya ducu. ¹¹ Piŋo? Pien ni pe amarowu? Lubaŋa ŋeyo ni amarowu. ¹² Gin ma atiyo abimedde ki tiyone, wek pe ami jo ca gunoŋ kare ma gimito wek gimi onen ni gin girom aroma kwedwa i tic ma ginyatte iye-nu. ¹³ Pien jo-nu pe gin lukwena kikome, gin lutic ma gibwolo dano, ma gilokke woko ginen calo lukwena pa Kricito. ¹⁴ ŋat mo myero pe obed ki ur i lok man, pien kadi Catan kikome bene lokke nen macalo lamalaika ma menyo piny. ¹⁵ Man pe doŋ gin ma pire dit twatwal ka ce lutic pa Catan gilokke ginen calo lutic ma tiyo gin ma atir; agikkigi bibedo rom ki gin ma gutiyo. ¹⁶ Koŋ doki awac ni, ŋat mo pe opar ni an lamiŋ; ka ce onoŋo wutamo kit meno, ci doŋ wujola macalo dano mamiŋ, wek omiya bene anyatte manoknok. ¹⁷ (Gin ma atye ka wacone botwuni pe gin ma Rwot omiya ni awac botwu; aloko calo dano mamiŋ ki gen man ma atye kwede me nyatte. ¹⁸ Macalo jo mapol ginyatte pi gin me lobo i kit me dano, an bene abinyatte ). ¹⁹ Pien wudiyo cwinywu ki yomcwiny i kom jo ma lumiŋ, kun wun jo maryek. ²⁰ Wudiyo cwinywu kadi ka ŋat mo lokowu me doko opiine, nyo camo limwu, nyo buyowu, nyo um i komwu nyo kadi doŋo lemwu. ²¹ Lewic omaka omiyo aye ni wan yam pe wabedo tek i yo meno! Ento gin mo keken ma dano okette me nyatte pire, an bene akette woko me nyatte kit meno, ma onoŋo pud aloko macalo lamiŋ. ²² Gin mono jo Ibru? An bene. Gin jo Icrael? An bene. Gin mono likwayo Abraim? An bene. ²³ Gin lutic pa Kricito? An gira aloko calo dano ma lapoya, awacci, akatogi woko. Atiyo tic aloyogi, ari i mabuc akatogi, gigoya ma wel odoone pe kwanne, abwot ki i lak to tyen mapol. ²⁴ Lujudaya gugoya tyen abic ki del pyeradek wiye aboŋwen. ²⁵ Gigoya ki odoo tyen adek, gicela bene ki got kicel, mel otur woko kweda tyen adek; abuto ari i nam matutu dyeceŋ ki dyewor benebene tyen acel. ²⁶ Ari i wot mapol ma can bene opoto i koma, can mua ki i lwak kulu mupoŋ ki pii, can mua bot luyak, can mua bot lutuwa, can ma lurok guketo i koma, can ma nen i gaŋ, can ma nen i tim, can ma poto i nam, ki can ma a ki bot utmego ma gin lugoba. ²⁷ Acanne twatwal i tic matek; tyen mapol pe anino dyewor. Ari kec ki orwo pii; tyen mapol abedo laboŋo cam mo ma romma, dok abedo i piny maŋic laboŋo ginaruka. ²⁸ Medo i kom gin jami mukene-gu ducu, tye gin acel ma kelo peko bota kare ki kare, en aye par ma atye kwede pi jo muye Kricito i kabedo mapatpat ducu. ²⁹ Tye ŋat mo ma goro ma kun an pe agoro? Tye ŋat mo ma gimiyo opoto i bal ma cwinya pe owaŋ pire? ³⁰ Ka ce onoŋo myero anyatte, abinyatte pi gin ma nyuto gorona. ³¹ Lubaŋa Won Rwotwa Yecu Kricito, ma gipwoyo nakanaka, en ŋeyo ni pe aloko goba. ³² I kare ma onoŋo atye i Damaciko, laloc mo me dul lobo ma tye i te loc pa kabaka Areta obedo ka kiyo gaŋ meno ni wek emaka, ³³ ento gicwala woko ki aduku madit kun gimiyo akato ki i waŋ dirica ma i kom cel, ci omiyo abwot woko ki i ciŋe.