¹ An Paulo akok botwu kun abako doga, an ma giwaco ni amwol dok awor bene ka atye kacel kwedwu, ento abedo ger ka atye woko cen. Alegowu i lok man pi mwolo dok pi kica pa Kricito. ² Alegowu ni ka abino botwu, pe wumiya abed ki kit gero ki tekcwiny ma ageno ni atwero bedo kwede i kom jo mogo ma gitamo ni wan walubo kit me lobo man. ³ adane wan wabedo i lobo, ento pe watye ka lweny ki jami lweny me lobo. ⁴ Jami lweny ma watiyo kwedgi me lwenywa pe obedo jami lweny me lobo man, ento gubedo jami lweny me tek pa Lubaŋa, ma turo cel gogo pa lumerokwa woko. ⁵ Waturo kwede tam ma pe atir, ki kit wakke ducu ma tiŋŋe me pyem, ma geŋo dano miyo pe giŋeyo Lubaŋa, kun wamako tam acel acel macalo opii, waketo i te loc pa Kricito. ⁶ Dok bene wayubbe me keto can i kom dano ducu ma gipe ki winy, ka onoŋo wun doŋ wutyeko mine kenwu i te locwa. ⁷ Wunen gin ma tye i nyimwu. Ka ce dano mo genne kekene ni en dano pa Kricito, koŋ myero otam bene ni, macalo en dano pa Kricito, wan bene watye kit meno. ⁸ Pien kadi bed anyatte matek twatwal pi twero ma Rwot omiyo botwa, lewic pe bimaka; twero meno en omiyo botwa me konyowu, pi doŋowu, ento pe me dwokowu cen. ⁹ Pe amito anen botwu macalo ŋat ma tye ka burowu ki waraga ma acoyogu. ¹⁰ Pien dano gitye ka waco ni waragana pek dok gwa, ento ka ao botwu koma nen goro, dok bene gin mo pe i lokka ma aloko botwu. ¹¹ Jo macalo meno myero guniaŋ ni, pe tye apokapoka mo i lok ma wacoyo i waragawa ka watye cen ka mabor, ki gin ma wabitimo ka watye kacel kwedwu. ¹² Pe watiŋŋe me kette kenwa i rwom acel ki dano mogo ma i kin jo ma gimaro korre kengi, nyo me porre kenwa kwedgi. Kit ma gitye ka pimme kwede i kingi kekengi, dok bene giporre kengi ki gin me porregi ma ginoŋo i kingi kengi, kit jo macalo meno gin lumiŋ. ¹³ Ento wan giwa pe wabinyatte makato kare; wabigik mewa ka ma yam Lubaŋa opoko botwa, ma wun bene wutye iye. ¹⁴ Wan pe wamedo ka gikwa, calo pe gipoko botwa me o botwu, pien wan aye ma yam wakwoŋo bino botwu me tito lok me kwena maber i kom Kricito. ¹⁵ Pe wanyatte ma okato kare i kom tic ma jo mukene aye guyelle iye; ento watye ki gen ni ka niyewu doŋ omedde, ticwa bene bimedde matek i kinwu, kun lubo ka ma yam gityeko poko botwa. ¹⁶ Man bimiyo watito lok me kwena maber i lobo ma tye yo tuŋ i ŋewu kuca, kun pe wanyatte pi tic ma jo mukene gutiyo i ka tic pa ŋat mukene. ¹⁷ “ŋat ma nyatte myero onyatte pi Rwot,” macalo yam gicoyo. ¹⁸ Pien pe ŋat ma pakke kekene en aye ma Lubaŋa pwoyo, ento dano ma Rwot dworo.