¹ Waraga man oa ki bot Paulo gin ki Silvano ka Temceo. Bot jo muye Kricito ma gibedo i Tecalonika ma gitye i Lubaŋa Won ki Rwotwa Yecu Kricito: Kica ki kuc obed botwu. ² Wapwoyo Lubaŋa jwijwi piwu ducu kun walwoŋo nyiŋwu i legawa me kare ducu, ³ kun wapo i nyim Lubaŋa Wonwa i kit ma wuketo kwede niyewu i tic, ki kit ma wucanne kwede pi mar, dok ki kit ma wudiyo kwede cwinywu pi gen ma wutye kwede i Rwotwa Yecu Kricito. ⁴ Utmegiwa ma Lubaŋa maro, waŋeyo ni Lubaŋa doŋ otyeko yerowu, ⁵ pien lok me kwena maber ma watito botwu yam pe obino botwu i lok keken, ento obino ki teko, ki i Cwiny Maleŋ kun onoŋo lok meno odonyo matut i cwinywu. Wuŋeyo maber kit ma wan wabedo kwede i kinwu kun wakonyowu. ⁶ Wun bene yam wucako poro kitwa ki kit pa Rwot, pien wuye lokke i kare ma onoŋo giunowu matek ma wubedo ki yomcwiny ma Cwiny Maleŋ miyo. ⁷ Man omiyo wudoko lanen bot jo ducu muye Yecu ma gitye i Makedonia ki Akaya. ⁸ Pien wumiyo lok pa Rwot owinnye, pe i Makedonia ki Akaya keken, ento lok pi niyewu i kom Lubaŋa doŋ oywek oromo kabedo ducu, ma wan kikomwa dok pe waromo loko iye gin mo. ⁹ Pien gin kikomgi aye gitito lok mukemowa, kit macalo yam wujolowa kwede, kadi wa kit ma wulokke kwede bot Lubaŋa, kun wubwoto woro jogi pi woro Lubaŋa makwo, dok me ada, ¹⁰ dok wutye ka kuro Wode ma bidwogo ki i polo, ma yam en ocero woko ki i kin jo muto, en aye Yecu ma olarowa ki i akemo pa Lubaŋa ma bibino.