¹ Dano acel acel ma ye ni Yecu en Kricito ma Lubaŋa oyero, dano-nu latin pa Lubaŋa, dok dano mo ma maro ŋat ma onywalo latin, maro latinne bene. ² Ka wamaro Lubaŋa, ma walubo cikke bene, meno miyo waŋeyo ni wamaro litino pa Lubaŋa. ³ Pien maro Lubaŋa en aye gwoko cikke. Dok cikke pe nurowa. ⁴ pien dano acel acel ma Lubaŋa onywalo loyo lobo. Gin ma waloyo kwede lobo en aye niyewa. ⁵ Aŋa mono ma loyo lobo? Pe ŋat ma ye ni, Yecu aye Wod pa Lubaŋa? Caden i kom Yecu. ⁶ Yecu Kricito aye ŋat ma yam obino ki pii ki remo. Pe obino ki pii keken, ento ki pii kacel ki remo bene. ⁷ Cwiny Maleŋ tye macalo cadenne, pien Cwiny aye ada. ⁸ Doŋ tye caden adek: Cwiny Maleŋ, pii ki remo; gin adek-ki ducu lok me cadengi orwatte. ⁹ Wan waye lok me caden ma dano gimiyo, ento caden pa Lubaŋa dit kato megi woko Man aye lok me caden pa Lubaŋa, ma en omiyo i kom Wode. ¹⁰ Doŋ ŋat ma ye Wod pa Lubaŋa tye ki caden i iye kene. ŋat ma pe ye Lubaŋa, noŋo omiyo Lubaŋa odoko lagoba, pien noŋo en pe oye lok me caden ma Lubaŋa omiyo i kom Wode. ¹¹ Caden meno en ene ni, Lubaŋa doŋ omiyowa kwo ma pe tum, dok kwo meno tye i Wode. ¹² ŋat ma tye ki Wod tye ki kwo, ŋat ma pe ki Wod pa Lubaŋa, pe tye ki kwo. Kwo ma pe tum. ¹³ Acoyo lok man botwu, wun jo muye nyiŋ Wod pa Lubaŋa, wek wuŋe ni wutye doŋ ki kwo ma pe tum. ¹⁴ Gin ma miyo wabedo ki gen i kome en ene ni, ka walegge gin mo kun walubo gin ma en mito, ci en winyo legawa. ¹⁵ Doŋ ka waŋeyo ni en winyo legawa, waŋeyo ni doŋ watyeko noŋo gin ma walego bote. ¹⁶ Ka ce dano neno ominne tye ka timo bal mo ma pe tero dano i to, en bilego Lubaŋa, ci Lubaŋa bimiye kwo pi jo-nu ma balgi pe tero dano i to-ni. Tye bal ma tero dano i to; pe awaco ni myero waleg Lubaŋa pi kodi bal macalo meno. ¹⁷ Gin marac ducu ma dano timo, meno doŋ bal, ento tye bal mogo ma pe tero dano i to. ¹⁸ Waŋeyo ni dano ma Lubaŋa onywalo pe dok bedo ka timo bal, ento Wod pa Lubaŋa gwoke maber, miyo Larac pe gude. ¹⁹ Waŋeyo ni wan litino pa Lubaŋa, dok waŋeyo ni lobo ducu tye i te loc pa Larac. ²⁰ Dok waŋeyo ni Wod pa Lubaŋa doŋ obino, ci omiyowa niaŋ me ŋeyo ŋat ma en aye ada. Dok wan wabedo i i ŋat ma tye ada, pien wabedo i i Wode, en aye Yecu Kricito. Man aye Lubaŋa me ada, dok man en kwo ma pe tum. ²¹ Litinona, wugwokke, pe wuwor jogi.