¹ Lurema, pe wuye kit cwiny ducu, ento koŋ wutemgi, wunen ka gin cwiny mua ki bot Lubaŋa, pien lunebi mapol ma lugoba doŋ guket gucito woko i lobo. ² Wubiŋeyo Cwiny pa Lubaŋa kit man: cwiny ducu ma tuco ni Yecu Kricito yam obino kun tye ki kom dano, meno Cwiny pa Lubaŋa; ³ ento cwiny ma pe tuco Yecu kit meno, pe oa ki bot Lubaŋa. Meno cwiny pa lakwor pa Kricito ma yam wuwinyo pire, ni tye ka bino, kombeddi doŋ tye i lobo. ⁴ Litinona, wun litino pa Lubaŋa, doŋ wutyeko loyogi woko; pien ŋat ma tye i iwu-ni dit kato ŋat ma tye i lobo. ⁵ Jo meno gin dano me lobo, en mumiyo gin ma giloko obedo me lobo, lobo bene winyogi. ⁶ Wan jo pa Lubaŋa; ŋat ma ŋeyo Lubaŋa winyo lokwa, ento ŋat ma pe en dano pa Lubaŋa pe winyo lokwa. Meno aye gin ma miyo waŋeyo poko cwiny me ada ki cwiny me goba. Lubaŋa aye mar. ⁷ Lurema, myero wamarre kekenwa, pien mar a ki bot Lubaŋa, ŋat ma maro noŋo en latin pa Lubaŋa, dok ŋeyo Lubaŋa. ⁸ ŋat ma pe ki mar, noŋo en pe ŋeyo Lubaŋa, pien Lubaŋa aye mar. ⁹ Gin ma yam onyuto marre botwa en ene, Lubaŋa ocwalo Wode acel keken i lobo wek omi wabed kwo pire. ¹⁰ Man en aye mar, pe ni wan wamaro Lubaŋa, ento en aye omarowa, ci ocwalo Wode me bedo gin me kwanyo bal woko ki i komwa. ¹¹ Lurema, ka Lubaŋa doŋ omarowa kit man, wan bene myero wamarre kekenwa. ¹² Pe tye dano mo ma yam oneno Lubaŋa; ka wamarre kekenwa, ci Lubaŋa bedo i iwa, marre bene bedo muteggi i iwa. ¹³ Gin ma miyo waŋeyo ni wabedo i iye, ki en i iwa, pien omiyowa Cwiny mere. ¹⁴ Wan doŋ bene waneno, dok wamiyo caden ni, Lubaŋa Won ocwalo Wode me bedo Lalar me lobo. ¹⁵ Dano ma tuco ni Yecu en Wod pa Lubaŋa, Lubaŋa bedo i iye, ki en bene bedo i i Lubaŋa. ¹⁶ Man omiyo waŋeyo mar ma Lubaŋa tye kwede i komwa, dok waye ni marowa. Lubaŋa aye mar, ŋat ma bedo i mar bedo i Lubaŋa, Lubaŋa bene bedo i iye. ¹⁷ Ka marwa doŋ oteggi, wabibedo ki tekcwiny i nino me ŋolo kop, pien kit macalo Yecu obedo kwede, meno bene en aye kit macalo wan watye kwede i lobo man. ¹⁸ Lworo mo pe i mar, ento mar ka doŋ oteggi ryemo lworo woko; pien lworo bino pi kuro keto can, doŋ dano ma lwor, noŋo marre pud peya oteggi. ¹⁹ Gin mumiyo wabedo ki mar, pien en okwoŋo marowa. ²⁰ Ka ce dano mo waco ni emaro Lubaŋa, kun dag ominne, noŋo en lagoba; pien ŋat ma pe maro ominne ma en oneno kome, pe twero maro Lubaŋa ma pe oneno kome. ²¹ Cik man wanoŋo ki bote ni, dano ma maro Lubaŋa myero omar ominne bene.