¹ An pe alone kena? An pe lakwena? Yam pe aneno Rwotwa Yecu Kricito? Wun pe adwoggi me ticca i Rwot? ² Kadi bed jo mogo pe giye ni an lakwena, ento ki tuŋ botwu an lakwena, pien wun kikomwu aye wubedo lanyut me kwenana i Rwot. ³ Meno aye pidona bot jo ma giroka ki peny. ⁴ Pe watye ki twero me noŋo cam ki mat ma iwa mito? ⁵ Pe atye ki twero me tero dako ma Lakricitayo kacel kweda i wotta, macalo lukwena mukene, ki omego pa Rwot, ki Kepa? ⁶ Nyo wan ki Barnaba keken aye myero wati pi camwa piwa kenwa? ⁷ Aŋa ma cito i mony, ci cako culo mucarane pire kene? Aŋa ma pito olok i potone ma pe camo nyig olok mucek iye? Lakwat mene ma pe mato cak ma a i kom lim ma en kwayo. ⁸ Atye ka loko lok man i kit pa dano keken? Cik kono pe loko lok ma rom ki man? ⁹ Pien i cik pa Moses gicoyo ni, “Pe itwe dog twon ka tye ka nyono bel.” Lubaŋa mono tamme tye twatwal pi dyaŋ? ¹⁰ En pe oloko lok meno piwa? I adane lokke yam gicoyo piwa, pien lapur myero opur pur kun noŋo tye ki gen, ŋat ma dino bel bene myero odin kun tye ki gen me noŋo dul mo iye. ¹¹ Ka wacoyo kodi me cwiny i kinwu, meno lokke bedo lok madit twatwal ka wakayo jami mogo me kom ki botwu? ¹² Ka jo mukene gitye ki twero meno i komwu, ci wan doŋ pe wakatogi kwede woko? Ento kadi bed twero meno tye botwa, pe watiyo kwede; wadiyo cwinywa i lok ducu wek pe omi waket ariya mo ma geŋo tito lok me kwena maber i kom Kricito. ¹³ Pe wuŋeyo ni, jo ma gitiyo tic i ot pa Lubaŋa ginoŋo camgi ki i ot pa Lubaŋa, dok jo ma gitiyo i kom keno tyer gipoko botgi gitum ma gityero? ¹⁴ Rwot bene yam ociko i kit yo acel-lu ni, jo ma tito lok me kwena maber myero gunoŋ gin ma gikwo kwede pi tito lok me kwena maber-ri. ¹⁵ Ento an pe atiyo ki twero macalo meno wacel. Dok bene pe acoyo lok man ni kono wutima kit meno. Bedo ber ka ato, kato ma dano mo loko wakkena doko gin ma ka cuŋone pe. ¹⁶ Ka atito lok me kwena maber, myero pe awakke pire, pien gidiya iye adiya. Ka pe atito lok me kwena maber, ci abineno can. ¹⁷ Ka atimo man pi twerona kena, abinoŋo bakacic, ento ka atimo ma kun pe amito, noŋo atye ka cobo tic ma gimiya. ¹⁸ Abinoŋo kit bakacic aŋo? Bakacicca en aye yomcwiny ma anoŋo i tito lok me kwena maber, laboŋo ŋolo kit cul mo iye bot dano ma giwinyo, kun bene pe atiyo ki twero ma atye kwede wek anoŋ kony mo ki bot jo ma atito botgi lok me kwena maber. ¹⁹ Kadi bed alone kena i nyim dano ducu, ento doŋ atyeko mine me bedo opii pa jo ducu, wek anoŋgi mapol. ²⁰ Ka abedo bot Lujudaya alokke abedo macalo Lujudaya, wek anoŋ Lujudaya mogo; bot jo ma tye i te cik pa Moses abedo bene macalo ŋat ma tye i te cik, kadi bed an kikoma pe atye i te cik, wek anoŋ jo ma tye i te cik. ²¹ Bot Lurok ma pe i te cik pa Moses abedo macalo ŋat ma pe i te cik, kun noŋo pe atye laboŋo cik pa Lubaŋa, ento abedo i te cik pa Kricito. ²² Bot jo ma gigoro i niyegi, alokke adoko dano magoro bene, wek anoŋ jo magoro. Alubo kit ducu ma dano gitye kwede, wek omiya alar jo mogo i yo ducu. ²³ Meno ducu atiyo pi lok me kwena maber, wek an bene anywak gum mo ma a iye kacel kwedgi. ²⁴ Pe wuŋeyo ni, jo ma gipyem i ŋwec ducu giriŋo, ento dano acel keken aye ma limo mot me pwoc? Wun bene wuriŋ kumeno wek wunoŋ mot me pwoc. ²⁵ Dano acel acel ma pyem i tuko myero ogwokke kene i yo ducu. Gitimo meno wek ginoŋ lalukana ma balle woko, ento wan watimo pi noŋo lalukana ma pe ballene. ²⁶ An mera ariŋo atir ma pe acabbe atata; ka awacci atye i tuko me doŋŋe, pe adoŋo piny macalo ŋat ma doŋo yamo ata. ²⁷ Acano koma, kun bene aloye calo opiina, wek ka doŋ atyeko tito lok bot jo mukene, pe abed ŋat ma pe gipwoyo.