¹ Lok ma dok i kom cam ma gityero bot jogi. Waŋeyo ni, “wan ducu watye ki ŋec.” Kit ŋec meno miyo dano giwakke awaka, ento mar medo tek bot dano. ² Dano ma tamo kekene ni eŋeyo gin mo, noŋo pe ŋeyo gin mo kit ma onoŋo myero eŋe kwede. ³ Ento ka ŋat mo maro Lubaŋa, ci Lubaŋa bene ŋeye. ⁴ Doŋ lok ma dok i kom cam ma gityero bot jogi; waŋeyo ni, “jok pe gin mo i lobo,” dok ni, “Lubaŋa mo mukene pe, kono en Lubaŋa acel-li keken.” ⁵ Kadi bed tye gin mogo ma gilwoŋo ni lubaŋa i polo nyo i lobo, kit macalo tye lwak lubaŋa ki lwak rwodi mapol mapatpat-ti, ⁶ ento ki tuŋ botwa Lubaŋa tye acel, en Lubaŋa Won, ma jami ducu a ki bote, ma wan wabedo tye pire; dok bene tye Rwot acel keken, Yecu Kricito, ma miyo jami ducu bedo tye, wan bene wabedo tye pire. ⁷ Kadi bed kumeno, jo mapol pe gitye ki ŋec macalo meno. Jo mogo doŋ guŋiyo woko i woro jogi nio wa ceŋ tin; gicamo cam ma kun noŋo pud gitamo ni, “Man adada gin ma gityero bot jok,” miyo tam ma tye i igi ma nyuto botgi balgi balle woko. ⁸ Cam pe bimiyo Lubaŋa pwoyowa; pe wabibedo marac ka pe wacamo cam, pe bene wabibedo maber ka wacamo. ⁹ Ento wugwokke, wek twero ma wutye kwede pe odok gin mo ma miyo dano magoro poto i bal. ¹⁰ Pien ka dano mo ma tam ma i iye ma nyutte balle pud goro oneno ni ma itye ki ŋec ibedo ka cam i ot jok, pe bimedo tekcwiny bote me camo riŋo ma gityero bot jogi? ¹¹ Kono en dano ma niye mere goro-ni obedo omeru ma yam Kricito oto pire, en bito pi ŋecci! ¹² Doŋ ka wubalo kit man bot utmegiwu ma niyegi goro, ka dok wubalo tamgi ma nyuto botgi balgi ma pud goro, noŋo wubalo i kom Kricito. ¹³ Pi meno, ka cam aye miyo omera poto i bal, pe doŋ abicamo riŋo matwal, wek pe ami omera opot i bal.