¹ Jo bá to gerasenos ki goj vanhzyl ti jog tanh ki jul óg mu. ² Aglẽnẽ ji, ti tõ kanũ bág ki ta kũ todẽ mũ, dén jógdẽn tẽ vũ góde ki ta ku ta dén ku kónhgá ũ ki la mũ ku ta ti kó to te mũ ³ Kónhkág te vũ góde a me ta kana tẽ ké ke mũ. Óg vatxej bag vẽ tõ ti ve ján txul vã a jãg ló ti jãn ke tu tẽ. ⁴ óg to ti txég gé ke te jógy kó, vatxej bag ti tõ vatxej ti óg tó ti nẽga ti txe kuta tó blónh ké gé, ke ta mũ, óg vũ ti to jungé mũ. ⁵ Kyty blé kulag mũ jag ló gáde ble klẽ ka ta jaggé ke mũ, kyl ku ta kózy, gogkel to ta vãnh klég ké ke ta mũ. ⁶ Ag mõ ta Aglẽnẽ ji te vég mũ, ku ta tikó tõ lálá te mũ, kũ,ta ti a mõ ẽ jóklẽ zõg mũ. ⁷ Jómãli ta vẽ mũ: "De nũ a mõ hog mũ Aglẽnẽ ji? Aglẽnẽ ẽntxó a mõ vẽ mã ku ẽ txo vanh ló". ⁸ Aglẽnẽ ji ti, mõ ta vẽ jó tã te:"kónhkóg tóg ti ki ma ku ta dẽn dén jógdẽn". ⁹ Ti jãnhkle ke ta mũ: "ãlike a jyjy ti te?" ẽn jyjy te vu kábag, ag kabág ti jó ky kó tóg ti mẽ ". ¹⁰ Aglẽnẽ ji ẽntxo a mo vẽ ti mã kũ ẽ jagnã tũ, jé na jobó tóg ka jã. ¹¹ Hã, tõ klãby óg klẽ ti mẽ kabág óg dén ko nódẽ, ¹² Dén jógdẽn te vu ẽntxó a mõ vẽ nã kũ:"klãgby óg to ẽn jog nã, ẽntxó óg ki la jé. ¹³ Jug tõ Aglẽnẽ ti óg to vanh mõ. dẽn jógdẽn ku ta dẽg ku klag by óg ki lá mũ. Klaby kabág ta vẽ ta vẽ, txó ti klán óg lén mũ, kũ óg vũ goj kógtá óg mũ. ¹⁴ Ũ tõ klagby óg jag gé ke mũ tẽ, óg dé vẽ ti, mẽ kabén mũ mũ, ẽn kyty ble gó plũl bág ti mẽ. Ag lẽl ti óg lálá dén jogzé jó te vẽjé ka mũ mũ. ¹⁵ Óg to Aglẽnẽ ji, ki ti jul, ku og vu konh kóg ti veg og mũ, mũ ja ló há ta nẽ kũ óg vẽ kũ, ti kó mõg mu. ¹⁶ Ũ óg tõ dén jógzẽ vég mũ tẽ dég jógdẽn tó kónhgág ti nẽ ku kél mũ tẽ, ũ like ku ti jogzẽn mũ, te tu óg mũ, ti jógzẽn jó ti blé klagby jógzẽn jó ti blé. kabén mũ. ¹⁷ Kũ óg Aglẽnẽ ji ti mõ haba tóg ti ka ma kita dẽn. ¹⁸ Ti tó kanũ bág ki lá mũ jãg ló, kánh kág tó Aglẽnẽ ji tõ lẽn mũ te, ti blé tẽ txul mũ. ¹⁹ Aglẽnẽ ji vũ mõ, i tẽ ki ma tẽ:" a ja ló to ti nõ: va ti ka mó a nẽjó lo tẽ a kanhka te óg to tẽ, ku ma óg mã ẽn txó a mã dén han mũ te óg mõ kabén, ẽn txó jagzõ jó tẽ ble mã óg mõ kabén". ²⁰ Ku kónhgág ti vũ tẽ mũ, te ku ẽn kyty do de Decápolis ti me ta. aglẽnẽ ji tõ ti mõ dén han me kabén mũ kũ óg nãli ũ mõg kũ vanh kãgzén mũ. ²¹ Aglẽnẽ ji, ti vũ ka nũ bág ki la, kũ ta, vã txi ka ta klélãn bág mũ, ti tõ goj vanh. zyl ka ja ti ka kó mũ óg ti pejẽn nõ dẽ mũ. ²² Mũ jagló pa'i tõ ẽn bág tõ lẽl gé ke mũ tẽ, ki ta tavig mũ, ti jyjy Jairogé ke mũ, ti tõ ti vẽ kũ, ti klãg ta mũ. ²³ Tógké kũ to ti ma:" ẽntxo a mõ vẽ ti mã kũ, ẽn zi kógó jóg ki kũ no. ẽntxó a mõ vẽ te kũ, ẽn blé kũ ma zy klé a nẽga ti zi, ku zy mã ku lẽlẽ há ka na te tẽ". ²⁴ Ku Aglẽnẽ ji ti vũ ti blé tẽ mũ, ũ kabág ta vẽ óg ti dũ mũ mũ, ku ti jóg jõ mũ mũ. ²⁵ Tá ũ zi kávén zi tá pó ké ke mũ txi vã. ²⁶ Ũ to óg kagtág ke mũ te, lo zi tẽ ké ke mũ, jãgló ta a mã ku zi ki jóggy ké ke mũ, ku zi vãtxẽj po ki m e tũg tã tẽ mũ. ²⁷ Óg tõ Aglẽnẽ ji ti tõ vẽ mãg jã zi ũ kabág djin ta zi katẽg, kũ zi ti kul ka zi katxug ke mũ. ²⁸ Kũ zi tǵ ge mũ:" jé nũ pi va jõ ti kul a ki nũ ẽ nẽga tó txug ke ni, ku nũ lẽl tẽ". ²⁹ Hã ta like mũ jãgló zi kóngó mẽ tũ tẽ mũ zi kávéj tẽ vũ hug ke mũ, ku zi kujãn te vũ nãli hã jã mũ. ³⁰ Mũ jagló Aglẽnẽ ẽ jógỹ ẽ ki ku ta den ti ta mãg ta mũ, ũ kabág óg jélẽn ku ta óg jãg klẽ ta mu, "A ũ nũ ẽ kul katxug ké nũ?". ³¹ Ti tõ ũ óg jéky mũ tẽ, ti mõ óg "ũ kabág tó ti óg vé ló óg tó a kujagdjun nodẽ tóg ti vé ló:' A like kũ ma a ũ to a kaẽ nẽga a kató txug ke mãg mũ?". ³² Aglẽnẽ ji vanh pẽ jé ta a vanh mũ ũ tó ẽ ni vin mũ te ve jé. ³³ Tá zi ẽ tõ mõg te ku zi kómãg kũ zi zũnge zi mũ.Ku zi Aglẽnẽ ti ji to zi ka tẽ mũ, ku zi ti klãn zi ẽ zóklẽn zag mũ. ku zi ti mũ ẽ jógzẽg jó tẽ kabén. ³⁴ Kũ ta zi mõ:" ẽn dji a ta to vãnhvẽ ta vẽ ku a lẽn vã. tẽn ló ló kũ ma zógdẽn mo mã tẽ". ³⁵ Ti vẽ mũ jagló, ũ óg vũ pa'i nẽjó tá ka mũ, ka mũ ku óg vũ tog ke kũ: "A jyzi tel kũ nõ, jãgló ma ũn bág tá ti vũg gé ke mũ?" ³⁶ "Aglẽnẽ ji" óg vẽ nódẽ ti móg: Ta mũ: pa'i to "(ẽn bág tõ sinagoga) tól ke mũ te mõ ta: komãg tũg tõ vanhvẽn". ³⁷ Ta vũ ũ to ẽn ble tẽ kómãg mũ, tõ õg vũ ẽn blé tẽ tẽ Pedro,Tiago,João tõ Tiago nujén ã ta vũ tẽ te. ³⁸ Õg tõ, Jairo ẽn ki ta vig mũ jagló jó mãli óg vaklal nõdẽ, ku óg veg mũ. ³⁹ Ẽn lá ta la mũ, ku ta óg mõ ta:" dé jé mẽ a vaklal nõdẽ nũ vã? ty tũ gẽl zi tẽ vájo zi nũl vã". ⁴⁰ Aglẽnẽ ji ti dyn óg mũ, kũ ta na li tól tá óg lẽn mũ, ku ta gẽl zi jug tẽ óg gŕg ku ta, ẽn ka te lá te mũ, ũ kũ ki ti blé nódẽ, ũ ka gẽl zi nõ tẽ, to óg mũ. ⁴¹ Gẽl zi nẽga ki kagmẽ, ku ta zi mo: "Talita cumi" tóg ge vã "nẽgõj ẽn txó a mõ vẽ ku jãgda ló". ⁴² Mũ jagló gẽl zi jãgdã ku ka na tẽ mũ ( Zi klẽplóg te vu zõ tó léglê, ku jã) vẽ ku óg nã li lug ke óg mũ. ⁴³ Aglẽnẽ ji tá lálá ku ũ to mã kó mãg mu dé ũ gẽl zi mõ nẽn jé zi kó.