¹ Mwaawo mazuva nni kweeza Johani yoo koloveza, nna kutaza mu inkaanda ya Judiya, ² Mmi naati, lyinyaanse uuwe: ka muvuso wee wulu chi wiina ha fwihi. ³ Yooyoozu njeeye yaava vaati naa waambwa chaakwe nne muporofita Isaya, nnati, Lyinzwi lya yoo lyira muchikwa, mu vaakanye inzira ya simwiine, mu tamalaze inzira zaakwe. ⁴ Mmi Johani yoo swana naava ku zwaata zizwaato zo vooza vwe kaamera, mane nne ibaanti lye ikavi mu imuunda yaakwe; mmi zilyo zaakwe I vaalyi izie[iziye] nne vuuchi. ⁵ Mmi nni kwaaya kwaalyi Jerusalema, nne Judiya yoonse mane nne ziraraanda zonse zi zimbulukite Jorodani, ⁶ Mmi nni vaa kolovezwa mwa Jorodani, nni valyi waamba zivi. ⁷ Mmi chinga vona vungi vwa Vafarasai nne Vasadukai nni veeza ku ikolovezo yaakwe, naa vacho kuti, Uunwe luzuvo lwe inzoka, njeeni yaava mu izivisa cho vukalyi vu keeza? ⁸ Mupange paaho misevezi ishupa kuti muva lyinyaasi: ⁹ Saanzi mulyi chengi mukati keenu cho kucho kuti, isikulweetu Aburahama nkweena; Aaho nni mulwiirite, cho kuti IREEZA u woola ku pangira Aburahama vaana kuzwa mwaa mavwe. ¹⁰ Nne suunu vuti ibewulye lyisii viikitwa ha mihisi ya masamu: Ku chitira kuti lyimwe nne lyimwe isamu lyi saahi zihantu zi shieemelyi temeewa choku wiiswa, choku soherwa mu mulyiro. ¹¹ Mmi iime nni mukoloveza cha menzi ha mulyi nyaansa, mmi iiye yoo keeza ha masulye angu u kolyete kuni zaamba, insaangu zaakwe zini lyemena: kaa mukoloveza cho luhuho lu jolola nne cho mulyiro: ¹² Iiye yoo chita kuti chibukuzo chaakwe uchi kweete mu iyaanza, mmi mane kaa kulye chivaka chaakwe , choku manina waa hiinda vuheke choku vu viika muchishete; mmi vuhuundu choku vusumika cho mulyiro u saa zimi. ¹³ Lyinu cho kuiiza Jeeso nnaa kazwa kwa Ghalaliya naaya kwa Jorodani kwa Johani kuti aka mukoloveza. ¹⁴ Mmi Johani choku mu kaanisa, nnaati, iime njini lukeere ku kolovezwa naawe, mmi lyinu uuwe u keeza kwaangu? ¹⁵ Mmi choku muitava Jeeso nnaati, siiye kuve voovulyo hanu: che ivaka lyo kuti kutu shiyameere ku pangahaza ku jolola: Lyinu nnaa chita cho kumu siya. ¹⁶ Hape Jeeso, chingaa kolovezwa, nnaa zwa mu menzi choku yeenda choku tamalala; hape, iwulu[mawulu] choku muiwukira, mane choku vona luhuho lwe IREEZA nni lu suuka mane iiri inkuva, choku muikala. ¹⁷ Hape, haa, lyinzwi choku zwa ku iwulu, nni lyaati, Uuzu nje mwaana waangu, uni lyi tumera chaakwe.