¹ Muvuso wo ku iwulu u swaniswa mane iiri nfumwe inzuvo, waa fuma kakusasani ahulu ku ka saka vantu kuti ze va tende mu iwa lyaakwe lyo muwomba, cho ku ruwerwa. ² Mmi chiinga a mana ku zuminzana che ituwero yo upeeni izuva lyonse, cho ku vacho kuti va kwiya ku iwa. ³ Naa zwiira kunze che inako i woola ku wonda too utatwe, naa a ka waana vamwi vavereki ni va lyi zimaniiza vulyo ku mawuzikizo ni ku seena chi va kweete ku chita. ⁴ Mmi naa va cho kuti; naanwe mu kwiya ku luwa,mane chimwi ne chimwi chi shiyeeme mu ni chi muhe.Ni vaa a ya ku musevezi. ⁵ Hape naa yenda che inako yo ku mana iyanza ne kaamwina mane ni yo ku mana iyaanza ne toonne, cho ku ka chita chi swana. ⁶ Hape mane ne che inako yo vu ikumi ne kaamwiina naa a zwa, cho ku ka waana vamwi va lyizimaniize vulyo, cho ku ka va cho kuti chinzi ha mu woola ku ikala vulyo vuti aaha izuva lyonse ni ku seena zi mu chita? ⁷ Ni va mu cho kuti, ' 'Mu kuti ka kwiina muntu yo u tu heere musevezi.' Naa va cho kuti, 'Mu kwiya naanwe ku luwa.' ⁸ Chitengwaana chinga chaa sika, nfumwe o luwa cho ku cho muhitizi wo misevezi yaakwe, ' Sumpe vatendi cho ku va ruwera ituwero zaavo,u taange che wa mamanimani ku ya ku we ntaanzi. ⁹ Vatendi va vaa heerwa mutendo che inako ye ikumi ne kaamwiina chi va sika, umwi ne umwi waavo a vaa heewa idinariyasi ¹⁰ Mmi lyinu ve ntaanzi chinga e za, ni vaa nahana kuti mwendi aavo mu va heewa ku zamba; vamwi mmi naavo ni vaa ruwerwa idanariyasi imwiina umwi no umwi waavo. ¹¹ Mmi lyinu chiinga vaa taambula, cho ku taanga ni va kweete ku vireerera mfumwe iwa. ¹² Ni vaati, 'Aava va mamanimani vaa tenda vulyo chivaka chii mwiina vulyo mu inako yonse ye izuva,mmi uwe wa va lyikanyeza vulyo naaswe, uuswe twa ivala muziyo wonse we izuva ne kamwi ka valyite. ¹³ Mmi naa cho umwi waavo kuti, 'Mulyikani, ka kwiina vuvilaala vu ni ku chita.Nandi ka heena tu vaa zuminzani che idanariyasi i mwiina? ¹⁴ Hinde vulyo chaako u lyiyendere. Ni lyi salyira ku ha aava vamwi vatendi va mamanimani ku swana vulyo ni kwaako. ¹⁵ Aa ka niina iswanero yo ku chitahaza mu ni sakira che zintu zaangu? Nandi mu ni fwiira muna mukuti niina inkulo ye chisemo. ¹⁶ Lyinu ve ntaanzi ka va ve va mamanimani, va mamanimani cho kuva ve ntaanzi. ¹⁷ Jeeso cho u kaya kwa Jerusalema a va hiindiri he imbalyi varutwana vaakwe veena ikumi ne toovere, mmi mu nzira cho ku va cho kuti, ¹⁸ ''Mu vone, tu kaya kwa Jerusalema; mmi Mwaana wo Muntu u kaya ku ku heewa ku vapurisita vakando ne vangolyi. Ka va ka mu watwiire lufu ¹⁹ mane ka va ka muhe mu manza a vasazi kuti va ka mushende, cho ku mushimeha, ne ku mu vaambula, mmi luzuva lo vuutatu kaa vuuke hape. ²⁰ Mmi nnyina vaana va Zebedia ne vaane va va swiisu cho ku iza kwa Jeeso. A va mu sungamini naa mu kumbiira chimwi. ²¹ Jeeso naa mu cho kuti, U saka nzi? Cho ku mu cho kuti, chite kuti aava vaana vaangu va valombwaana va ikalye zumwi ku imbalyi ya malyo ne zumwi ku mbalyi lya mamonso, mu muvuso waako. ²² Mmi Jeeso ne itava naati, ka wiizi ne cho u kweete u kumbiira. Aa u woola ku nywa inkomoki i ni keeza ku nywa?Ni va mu cho kuti, ''Tu woola.'' ²³ Mane cho ku va cho kuti, ''Uuko kwiine inkomoki yaangu ka mu i nywe. Lyinu ku ikala ku iyanza lya malyo ni lya mamonso iizo ka zi heewa naame, mmi nji zaavo va zi vaakanyezwa ne Taayo.'' ²⁴ Veena ikumi ne voo uvere chinga vaa zuwa ni vaa manina chi vaa nyeerereerwa valombwaana voo uvere aavo. ²⁵ Mmi Jeeso naa va sumpira kwaalyi, naati, mu izi kuti vasimwiine va Vasazi va lyaatiriza vantu vaavo, mane ne vankosi va maziimo vaavo va va lawula toota. ²⁶ Mmi kweenu sanzi ne ku vi vulyo. mmi zumwi no zumwi yo saka ku va mukulwaana mweenu i ve iiye yoo u teendera vamwi. ²⁷ Mane ne zumwi ne zumwi yoo u saka ku va we intaanzi mukati keenu, a ve iiye muhikaana weenu. ²⁸ siina Mwaana wo Muntu haa sana a vee iziri ku chitirwa, mbwiiteeri ku chitira vulyo, mane ne ku iza ku ha vuhalo vwaakwe chitavero cho vunngi. ²⁹ Chiinga vaa zwa kwa Jeriko, vantu vaangi vaangi cho ku mushaala mu masulye. ³⁰ Hape, vone, vakwaame voo uvere va vee ikeere he imbalyi ye inzira, chiinga vaa zuwa kuti Jeeso njoo hita aaho, mpuva kuwiire a hulu ni vati, ''Simwiine, Mwaana wa Daafita tu zuwire inkulo vutuku. ³¹ Mmi vuungi vwa vantu ni vwa va kalyimera ni va va lwiira kuti va tontolye, mmi aavo ni vaa lyirira ku ahulu ku iwulu, , Simwiine, Mwaana wa Daafita, tu fwiire inse.'' ³² Mmi Jeeso cho ku shaala u ziimeene vulyo hantu ha mwiina, mmi cho ku va sumpa, cho kuti, ''Mu saka kuti, ni mupangire nzi? ³³ Ni va mu cho kuti, Simwiine, kuti meso eetu e iwulwa.'' ³⁴ Lyinu Jeeso, cho ku va fwiira inse, cho ku wonda menso aavo.Hohwaaho vulyo cho ku tambula ku vona kwaavo mane no ku mu ichirira