¹ Mmi nni kweeza ku pangahala kuti Jeeso chiinga mana ku waamba zoonse iizi, choku katuka nna kaya kwa Galaliya, nna keeza che ingolo za Judiya ku zaamba lwiizi lwa Jorodani; ² Mmi vantu vaangi nni vaa mushaala mu masulye, mmi nnaa va hoza kookooko. ³ Mmi nne Vafarasayi nni veeza kwaalyi, choku mulyika, nni va mucho kuti, ''Aa mmi ku shiyeeme kuti mukwaame u woola ku kaanina muihaavwe chimwe nne chimwe vulyo? ⁴ Jeeso naa vee tava nnaati, ''ka mwiini ku vala kuti iiye yaava vapangi ku intaanzi ava vapangi nni yilyi mukwaame nne mukulwaakazi? ⁵ Mane iye yaava vapangi ava cho kuti, chaa mavaka mukwaame kaa siye veesi nne vaanyina mmi kaa ngambasire muihaavwe, mmi aavo voovere ka vave inyama yii mwiina'? ⁶ Chiingi ku zwaaho kava siri voovere, mmi che inyama yii mwiina. Mpaaho lyiinu kuti chaava kopanya Ireeza haamwiina, saanzi nni kuvi yeeti nnaa chi kauhanya [patalaza].'' ⁷ Nni va mucho kuti, ''Chiinzi lyiinu Mushe haava pangi mungolo we ikawuhano [kawuhano] nne woku mu viikira hee imbalyi?'' ⁸ Iiye nnaa vacho kuti, ''Mushe che ivaka lye inkulo zeenu zi zuminiine chiingi ava mu zuminini kuti mu woolye kuva ku kawuhanaanga nne va muihenwaanwe, mmi ku intaanzi ka heena ku veena vulyo. ⁹ Mmi nni mucho kuti, zumwe nne zumwe yeeti nna kaane muihaavwe vulyo, kwaanda kuti koto panga vuhuulye, mane choku ka sesa zumwe, u panga vuhuulye [vulyiyeenzi/mulaandu]. Nne yoo ka sesa mukulwakazi yaa va kaaniinwa u panga vuhuulye.'' ¹⁰ Varutwana vaakwe choku cho kuti kwa Jeeso ,'' Haiva kuti njo zweezi nje indava ziina ha teni ku mukwaame nne muihaavwe, kaku shiyeme lyaaho kusesa.'' ¹¹ Mmi Jeeso choku vacho kuti,ku ''Ka heena voonse va woola taambula izi indava, mbwiita kwaavo vaka zumininwa ku ilyi. ¹² Ka kuti kwiina vashaaroondo vavaa zaalwa vovulyo nni vanyinaavo ku kazwa mu ivumu. Mmi kwiina vamwe vashaaroondo vavaa pangwa vulyo nne vantu. Mane kwiina vashaaroondo va valyi pangi vashaaroondo aavo veene che ivaka lyo muvuso wo ku iwulu. Iiye yoo woola ku taambula izi indava, aa zi taambulye.'' ¹³ Lyiinu nni kwa ka lyeetwa kwaalyi tuhwiirezana kuti a woolye kutu viika maanza choku rapera, mmi varutwana vaakwe choku va kalyimera. ¹⁴ Mmi Jeeso nnacho kuti, ''mu siye vahwiirezana, mu siye kuva kanera kwiiza kwaangu, ka kuti muvuso wo kuiwulu ngu vava swana nnaavo.'' ¹⁵ Mmi nnaava viika maanza, choku zwaho. ¹⁶ Mmi vone, mukwame ava iza kwa Jeeso cho ku mucho kuti,'' Moruti, nni woola ku pangaanzi [chitaanzi] chilotu [chishiyeeme] kuti nni woolye kuva nne vuhalo vu saamani? '' ¹⁷ Jeeso nna mucho kuti,'' Chiinzi hoo nni vuza kuti chinzi chi shiyeeme? mbwiita wu mwiina vulyo nju shiyeme, mmi vulyo haiva u saka ku injira mu vuhalo, woonde milao kamba pangahaze milawo. ¹⁸ Choku muvuza kuti,'' nje yihi milawo?'' Jeeso nnaati, saanzi wii hayi , saanzi u pangi vuhuulye, saanzi u yivi, saanzi u shupi zintu zi salyi njuzu, ¹⁹ Kuteke veeso nne vaanyoko, mane hape sune zumwe siina moo lyi suni. ²⁰ Mulombwaana choku mucho kuti,'' zoonse iizi zintu kuzwa vuhwiire nni valyi kuzi chita kuiiza nne suunu. Nni sii tayera che chiinzi chimwi?'' ²¹ Jeeso choku mucho kuti, ''Haiva u saka ku jolola toota, kwiiya, ndouka wuza zoonse zo wiina nnaazo, u kahe vahumanehi, mmi koo kwiina zaako ku iwulu; mmi wiize, nni shaalye mu masulye.'' ²² Mmi mpaaha mulombwaana chiinga zuwa Jeeso ku waamba [kwaamba] kwakwe, nnaa lyi zwiira choku yeenda che inkulo yi sasamite: ka kuti a veena ziyva ziingi. ²³ Lyiinu Jeeso nnacho varutwana vaakwe, ''aaho nni mulwiirite, kuti kaku lyemene [kavuhalyire] muntu muhumi kuti naa ke njire mu muvuso we iwuulo. ²⁴ Mane hape nnisi mucho kuti, ka kuve kuhuva ku ikaamera ku injira che lyiinso lye inalyiti kwaanda kuti muhumi naa ke njire cho muvuso we Ireeza.'' ²⁵ Mmi lyiinu varutwana vaakwe chiinga vaa zuwa, choku tiya [komokwa] a hulu maaswe cho kuti, lyiinu njeeni yoo woola ku vulukwa [ku hazwa]?'' ²⁶ Jeeso choku valola choku vacho kuti, ''ku muntu vulyo ka ku woolyeki, mmi che Ireeza zintu zoonse zi woolyeka/ zi huva.'' ²⁷ Lyiinu Pitorosi nna muitava nnaati, ''vone, tuka siyite [sheeza] zoonse, choku ku ichirira. Katu voolyerwaanzi mwa teni?'' ²⁸ Jeeso choku vacho kuti , ''Cho kuiizula nni mulwiirite, kuti uunwe, muvaa nni shaalyi mu masulye, zintu chini zaati chizi pangwa chihiya, mwaana wo mukwaame chini aati cho wii kala chipura chaakwe cho muvuso wu jolola, nnaanwe ka muikalye mu zipura ziina ikumi nne zoovere, nni mukweete ku watula vaana va Isiraere. ²⁹ Zumwe nne zumwe yaava ka siyi mazuvo, vanaswiisu kunine, vaanakazana kunine, veesi, vaanyina, vaana, naandi inkaanda, che ivaka lye izina lyaangu, ka va taambulye vuungi vu woonda miyaanda mane ka va wane vuhalo vu saa mani. ³⁰ Mmi vaangi va vaalyi ve intaanzi ka vave va mamanimani, mane va ma manimani ka vave ve intaanzi.