¹ Mulungu watiyesa olungama ndaba tumukhulupilila Ambuye Yesu Kristu. Lomba tili mu mtendele na Mulungu. ² Kamba ka va wacita Kristu kwa seo, cili monga Mulungu watisegulila ciseko kuluta kwa yeve kwati akaticitle vabwino. Ndipo tusangalala ndaba tuyembekezela Mulungu kugabana nase vabwino. ³ Putuvutika ndaba tankhala mwa Kristu, tusangalala soti ndaba tuziba kuti putuvutika, tuphunzila kupilila. ⁴ Ndipo tuziba kuti ngati tapilila, Mulungu osankha seo. Lomba ngati taziba kuti Mulungu watisankha tuyembekeza kuti aticitile vabwino. ⁵ Ndipo tusimikijya kuti tikuyolandila kwa Mulungu vinthu vutuyembekezela, ndaba Mulungu otikonda ngako. Mzimu wake Utuba, wetipasa yeve ulengesha kuti seo tizindikile mwa kutikondela Mulungu. ⁶ Petekangiwa kuzipulumusha teka, enze ni Kristu, pa nthawi iyo wesankha Mulungu, efwela seo banthu, ngankhale kuti tenzomulemekeza lini yayi. ⁷ Nica patali munthu kufwila muyake, ngankhale kuti ndaba uyu munthu enze olungama, kamba ka kukuti ni olungama ndipo munthu muyakine wa limba mtima kuti amufwele. ⁸ Mulungu eonesha kuti otikonda Kristu petifwela ngankhale kuti tenze kumucimwila. ⁹ Ndipo ni cozibikilathu kuti Kristu akatipulumushe ku ukali wa Mulungu kamba ka cimo ndaba lomba nise olungama mwa Mulungu pakuti Kristu etifwela nocosa ngazi yake kwa seo. ¹⁰ Ngankhale petenze adani bake, Mulungu eleta mtendele pa seo kupitila mu imfwa ya mwana wake. Lomba pakuti tili namtendele na Mulungu, cili patuba kuti Kristu atipulumushe ndaba niwa moyo pamene enze wa kufwa. ¹¹ Siyapopeka! Lomba tusangalala pakuti Mulungu waika mtendele pakati pa seo na yeve kupitila mu imfwa ya mwana wake. ¹² Banthu onse nibaucima kamba Adamu, munthu oyamba weumba Mulungu, ecimwa kale-kale. Ndaba ecimwa, ecifwa. Banthu onse bankhala ocimwa kucokela pamene apo ndipo onse ecifwa. ¹³ Banthu pa ziko becimwa Mulungu akaliye mupasa lamulo Mose koma cenze cosatheka kuziba cimo kulingana na lamulo. ¹⁴ Koma tuziba kuti kucokela pa nthawi ya Adamu kufikila nthawi ya Mose, banthu becimwa, ndipo becifwa kamba kacimo, Aliyense ecifwa, nabala aliye phwanye lamulo monga mwecitila Adamu. Cimo la Adamu yekhuza aliyense, monga mwecitila Kristu, yeve ewela pavuli pake, okhuza liyense. ¹⁵ Koma mphaso yakuti pasa Mulungu yulingana lini na cimo ya Adamu. Kamba kakuti Admu ecimwa eliyense akufwa. Koma ndaba munthu umozi, Yesu Kristu, etifwela tonse, Mulungu otipasa mphaso iyi ya moyo osasila nanga kuti utuyenela lini. ¹⁶ Ndipo pali soti njila iyakine yuonesha kusiyana kwa mphaso ya Mulungu na cimo ya Adamu. Ndaba pakuti Adamu ecimwa, onse banthu pavuli pake becimwa., ndipo Mulungu elabila kuti banthu onse oyenela kulandila cilango. Koma mphaso ya bwino, Mulungu opasa seo kunkhala olungama mwa yeve. ¹⁷ Banthu onse akufwa kamba ka cecita munthu umozi, Adamu. Koma lomba anyinji aseo tusimikijya kuti Mulungu watipasa mphaso ikulene ngako- yutiyenela lini- ndipo atiika olungama mwa yeve. Cili soti patuba kuti tikuyolamulila na Kristu kululu, ¹⁸ Kamba ka lidoda imozi, Adamu, aliye mvwilile lamulo la Mulungu, banthu onse oyenela kupasiwa cilango. Cimozi-mozi, kamba ka lidoda imozi, Yesu, ecita cilungamo pomvwila Mulungu penze moyo nakuzokufwa, Mulungu opeleka aliyense kunkhala olungama mwa yeve, kuti bakankhale ba moyo kosasila. ¹⁹ Ni kamba ka lidoda imozi, Adamu kuti banthu anyinji benkhala ocimwa. Ni cimozi-mozi, ndaba lidoda imozi, Yesu emvwila Mulungu pecifwa kuti akaike anyinji mucilungamo mwa yeve. ²⁰ Mulungu epasa lamulo yake kwa Mose kuti banthu bazindikile kukula kwa cimo yabacimwa; koma banthu pebenzocimwila-cimwila, Mulungu epitilijya kubacitila cifundo ngankhale kuti benze osayenela. ²¹ Pakuti banthu akufwa ku thupi kamba ka mphamvu ya cimo pa mathupi yao, kuleta imfwa, cimozi-mozi, mphaso yake yacifundo ili na mphamvu yobaika kunkhala olungama pameso pa Mulungu ndipo mphamvu iyi yubapasa moyo osasila kamba ka cecita kwa beve Yesu Kristu Ambuye.