¹ Ndipo neona mngelo oseluka kufumila kululu. Enze na makiyi yaku cimulindi ciliye polekezyela, ndipo enze na unyolo ukulu ku kwanja. ² Ndipo ekata cinjoka, cinjoka cakale-kale wamene ali mdyelekezi, olo satana, nakummanga kwa zaka sauzande. ³ Emuponya mu cimulindi ciliye polekezyela. Evalapo na kusinkhapo palulu pake. Ecita teto kuti asanyenge soti maiko mpaka zaka sauzande zikasile. Kucoka yapo, akamumasule kwa nthawi itontho tyala. ⁴ Ndipo neona mipando ya cifumu, enzenkhalapo ni bala bepasiwa ulamulilo kuweluza neona soti miyoyo ya bala betendewa mitu kamba ka umboni wa Yesu na kamba ka mau a Mulungu. Baliyepembeze cinyama kapena fano lake, ndipo bekana kulandila cizindikilo pamphumi pao kapena pakwanja. Benkahla na moyo, nocita ufumu na Kristu kwa zaka sauzande. ⁵ Osalila bakufwa baluyenkhale na moyo mpaka zaka sauzande zisile. Uku ndiye kuukishiwa kwa akufwa koyamba. ⁶ Odala na mtuba ni aliyense etolako mbali ku kuukishiwa kwa akufwa koyamba! Kwa aba imfwa yacibili iliye mphamvu. Bakankhale bansembe ba Mulungu na bansembe ba Kristu ndipo bakacite ufumu naye kwa zaka sauzande. ⁷ Ndipo zaka sauzande zikayosiya, satana akamasuliwe mjele mwake. ⁸ Akalute kuyonyenga maiko ku ngondya zonse za ziko-Gogo na magogo-kubaleta pamozi kuti bacote nkhondo. Bakabe banyinji monga mcenga waku nyanja. ⁹ Ndipo beluta na kufalikila ziko lonse na kuzungulila khamba la banthu atuba ba Mulungu-mzinda wokondewa. Koma mulilo weseluka kufumila kululu na kubashoka onse. ¹⁰ Mdyelekezi, wamene ebanyenga, eponyewa munyanja yoyaka sulufule, mwamene cinyama na mneneli wawenye beponyewa. Bakanzunzike usiku na mzuba ku nthawi za nthawi. ¹¹ Ndipo neona mpando wacifumu ukulu na utuba na wamene onkhalapo. Ziko na kululu veutuka pamenso pake, koma kwenzeve malo akuti vingalute. ¹² Ndipo neona bakufwa-bamphamvu na batontho-baimilila pa mpando wa cifumu, na mabuku bevuliwa. Ndipo buku liyakine levuliwa-buku la moyo. Akufwa beweluziwa kulingana na velembewa mu mabuku, monga mwa vocitika vao. ¹³ Ndipo nyanja yeleta bakufwa benze mwamene. Imfwa na Hade beleta akufwa benze mwamene, na bakufwa beweluziwa monga mwa ncito. ¹⁴ Imfwa na Hade beponyewa mu nyanja ya mulilo. Iyi ni imfwa yacibili-nyanja ya mulilo. ¹⁵ Ngati muyakine zina lake liliyopezeke lolembewa mu buku lamoyo, eponyewa mnyanja ya mulilo.