¹ Pizepita izi, Necimvwa cenzomvweka monga lizu likulu la banthu banyinji mululu oita, "Haleluya. Cipulumuso, ulemelelo na mphamvu niva Mulungu wasu. ² Maweluzo bake ni oona na olungama, Pakuti waweluza wacigololo mkulu. Eifya ziko na cigololo cake. Wawezyela magazi ba banchito bake kufuma mmanja mwake." ³ Belabila kacibili: "Haleluya! Cusi cukwela kufumila kwake ku nthawi za nthawi. ⁴ Akulu twenti folo na vamoyo folo vepona pansi na kupembeza Mulungu, wamene enzonkhala pa mpando wacifumu. Benzonena kuti, "Amen. Haleluya!" ⁵ Ndipo lizu lefuma ku mpando wacifumu, lechiti, lemekezani Mulungu wasu, monse mweo bancito bake. Mweo bamene mumuyopa. Bonse atontho na bamphamvu." ⁶ Ndipo necimvwa cenzomvweka ngati cibelengelo cikulu ca banthu, ngati mkokomo wa manzi anyinji, monga soti kugunda kululu, kweciti, "Haleluya! Pakuti Ambuye ocita ufumu, Mulungu wasu, wamphamvu yonse. ⁷ Tiyeni tisangalale na kukondwela na kumpasa ulemelelo. Pakuti cisangalalo caukwati wa mwana wa mbelele cafwika. Na mkwati wazikonzekela. ⁸ Epasiwa ulamulilo kuti avwalikiwe na bafuta wang'animila (pakuti bafuta ni macitilo olungama ba banthu atuma ba Mulungu). ⁹ Ndipo mngelo eciti kwa neo, "Lemba ici: odala ni amene oitiwa ku malyelelo a ukwati wa mwana wa mbelele." Elabila soti kwa neo, "Aba ni mau oona a Mulungu." ¹⁰ Nepona pamendo yake kumupembeza, koma eciti kwa neo, "osacita teti! Nine wancito muyako na mnekwanu wokatilila umboni wa Yesu. Pembeza Mulungu. Pakuti umboni wa Yesu ni mzimu wa uneneli." ¹¹ Ndipo neona kululu kwaseguka, ndipo nelanga, neona hosi ituba. Na wamene ekwelapo zina lake enze wokhulupilika na oona. Oweliza mwacilungamo nakucita nkhondo. ¹² Menso bake bali ngati mulilo oyaka, napamutu pake pali makolona anyinji. Enze na zina lolembewa pa eve lamene kuliye oliziba koma eve. ¹³ Ovwala mkanjo wozubikiwa mu magazi, na zina lake ni mau a Mulungu. ¹⁴ Magulu a nkhondo akululu benzomkonkha pa mahosi yatuba, ovwala bafuta, mtuba kuti mbuu. ¹⁵ Mkamwa mwake mwenzofuma lupanga yamene yenzopayila mitundu ya banthu, ndipo akabaweluza na ndodo ya cisulo. Ndipo okanda mofinyila mpesa mwa vinyu wa ukali wa Mulungu wamphamvu yonse. ¹⁶ Ali na zina lolembewa pa mkango wake napa ncafu: "Nfumu ya mafumu na Mbuye wa Ambuye." ¹⁷ Neona mngelo wapanama pa zuba. Ekuwa na lizu likulu ku nyoni zonse zenzombululuka pa mutu pake, "wela, sonkhanani pamozi kumalyelelo a Mulungu. ¹⁸ Welani, mulye mnyofu wa mafumu, mnyofu wa akulu bankhondo, mnyofu wa banthu ba mphamvu, mnyofu wa mahosi na okwelapo bake, na mnyofu wa banthu bonse, onse afulu na akapolo. atontho na bamphamvu." ¹⁹ Neona cinyama na mafumu a pa ziko na magulu a nkhondo bao. Enzosonthana kuti bacite nkhondo na wamene enzekwela pa hosi na gulu lake lankhondo. ²⁰ Cinyama cekatiwa na mneneli wawenye ecita vodabwisa pamenso pake, na vizindikilo ivi, enamizya bala belandila cizindikilo ca cinyama nakupembeza fano lake. onse babili beponyewa bamoyo mu nyanja ya mulilo yakupya na sulufule. ²¹ Osalila onse epayiwa na lupanga lefuma mkamwa mwa ula enzekwela pa hosi. Nyoni zonse zicilya mnyofu wao.