¹ "Kwa mngelo waku kacisi yaku Efeso lemba: 'Mau ya wamene okata nyenyezi seveni mkwanja kwake kwendi na oyenda pakati pa voikalo nyali seveni ya golide. ² Nuziba ncito zake, na ncito yako yokosa na kupilila kwako, nakuti suuvomelezyana nao bala ocita viipa, koma wabayesa bala oziita beka kuti otumiwa koma niteto lini, ndipo wapeza kuti ni bawenye. ³ Koma upilira moteka mtima nakuvomela kamba ka zina langu, nakuti uliyebebe. ⁴ Koma nili naco cosushana nawe kuti wasiya cikondi cako coyamba. ⁵ Mwa ici kumbukula kwawaponela. Lapa nakucita vinthu viwenzecita poyamba. Peka-peka ukalapa, nikawele kwako nakufumyapo coikapo nyali pamalo pake. ⁶ Koma uli na ici: utinkha ncito za aNikolai zamene nane nutinkha. ⁷ Lekani wamene ali na matu amvwe cakulabila mzimu ku makacisii. Kwa wamene ati akapambane nikampase ulamuliro wakulya ku cimuti ca moyo, camene cili mu Paradaiso wa Mulungu.'" ⁸ Kwa mngelo wa kacisi yaku Simuna lemba: 'Mau yawamene ali woyamba na wosilizya, wanene enze wakufwa nokuzonkhala na moyo. ⁹ "Nuziba kuvutika kwako na kusauka kwako, koma niwe olemela. Nuziba mwano wabala onena kuti na Yuda, koma niteto lini. Ni Sinagoge wa Satana. ¹⁰ Osayopa vauli napafupi kuvutika navo. Ona Myerekezi ali pafupi kuponya bayakine mjele kuti mukayesewe, ndipo mukavutike masiku teni. Nkhala okhulupilika mpaka imfwa, ndipo nikakupaseni kolona wa moyo. ¹¹ Lekani wamene ali namatu amvwe camene mzimu olabilaku makacisi. Wamene ati akapambane wakacitiwa na imfwa yacibili.'" ¹² "Kwa mngelo wa kacisi yaku Pergamo lemba: Mau ya wamene ali na lupanga lakuthwa konse-konse: ¹³ "Nuziba kwaunkhala, kula kwamene mpando wa Satana uli. Koma weo wakatisha zina langu. Nuziba kuti uliyekane cikhulupiliro cake mwa neo, olo mumasiku ba Antipa mboni yangu, okhulupilika wangu, wamene epayiwa pakati panu, kwala kwamene Satana konkhala. ¹⁴ Koma nili navinthu vitontho vosushana nawe: uli nao uko bamene okatishisha kuciphunziso ca Balamu, wamene ephunzisa Balaki kuponya copunthwisha pamenso pa bana ba israeli kuti balye cakulya copelekewa ku mafano nakucita cigololo. ¹⁵ Mnjira yamene iyo, muli nao bayakine okotishusha ciphunziso ca a Nikolai. ¹⁶ Moteto lapani! Ngati simungacite teto nikawele kwa mweo msanga, nikabatile nkhondo beve na lupanga la mkamwa mwanga. ¹⁷ Lekani wamene ali na matu, amvwe camene mzimu onena ku makacisi kwa wamene opambana nikamupaseko manna obisika, ndipo nikamupase mwa utuba na zina lamene paliye oliziba lolembeka pamwala, zina lamene paliye oliziba koma wamene alilandira.'" ¹⁸ "Kwa mngelo wa kacisi yaku Tiyalira lemba: 'Aba ni mau a mwana wa Mulungu ali na menso monga malawi amulilo na mendo monga mkuwa wopukuta bwino. ¹⁹ Nuziba ncito zako: cikondi cako, cikhulupiliro cako, utumiki wako na kupilira kwako moteka mtima. Nuziba kuti vuwacita lomba vuposa vewenzecita poyamba. ²⁰ Koma nili na ici cosushana nawe: Walekelelra muzimai Yezebeli, oziita yekha meneneri, mwa ciphunziso cake onyenga atumiki bangu kucita cigololo nakulya vakulya vopelekewa ku mafano. ²¹ Nampasa nthawi kuti alape, koma ofuna lini, kulapa cigololo cake. ²² Ona! nimponye pabedi kuti alwale, nabala onse ocita naye cogololo nibaponye mmanzunzo akulu, peka-peka akalapa zincito zake. ²³ Nimpayire bana bake, na macalici onse azibe kuti nineo nusanthula maganizo na mitima. Nikupase kwa aliyense wa mweo monga mwa zincito zake. ²⁴ Koma kwa monse amu Tiyatira, kwa aliyense wamene sokata ciphunziso ici ndipo oziba lini vamene bayakine oita kuti zakuya za Satana- kwa mweo nikuti, sinizakutwikishani katundu uyakune. ²⁵ Mu njira iliyonse, katishishani mpaka nikawele. ²⁶ Wati akapambane nakusunga ncito zangu mpaka ku cisilizyiro, kwa eve nikamupase ulamuliro pa maiko. ²⁷ 'Akabalamulire na ndodo ya cisulo, monga vinthu vocitoumba na lito akabafye tuduswa-tuduswa.' ²⁸ Monga mwanalondela kwa Atata, nikampase soti nthanda ya kummawa. ²⁹ Lekani aliyense ali na matu, amvwe cakulabila mzimu ku makacisi.'"