¹ Masiku sikisi ikaliye fike siku la cisangalalo ca kupitilila makhomo, Yesu eciza ku Beteniya, kwenze Lazalo, weusha Yesu penze cifukwa. ² Bemkonzela cakulya ca mmazulo, Malita enzoika cakulya pa thebulo, koma Lazalo enze umozi enze kulya na Yesu pa thebulo. ³ Ndipo Maliya etola mafuta yonunkhula yopanguwa kufuma ku nadi, nopaka kumenzo ya Yesu kugwilishila ncito sisi yake. Ng'anda yenunkhila namnunkho wa mafuta ya nadi. ⁴ Yudasi Eskaliyoti, mmozi wa ophunzila bake, umozi we eciti akampeleke, eciti, ⁵ "Tyani osagulisa mafuta aba notwala ndalama yake kwa osauka?" ⁶ Lomba elabila izi, osati cifukwa enzosamala osauka, koma cifukwa enze kawalala. Enze na thumba ya ndalama nakuti enzoiba ndalama zenze ikiwamo. ⁷ Yesu eciti, "mumlole kuti asinge za alinazo kuti zikagwile ncito pa siku yoika malilo yangu. ⁸ Mukokuba na ozingwa nthawi zonse pakati panu. Koma simuti mukonkhala nane nthawi zonse." ⁹ Lomba gulu inyinji ya Ayuda eziba kuti Yesu enzeko, ndipo bewela, osati cifukwa ca Yesu tyala, koma kuti aone Lazalo, weukisha Yesu ku akufwa. ¹⁰ Akulu ansembe epangana pamozi kuti akapaye Lazalo: ¹¹ Pakuti nicifukwa ca eve cebefumila Ayuda anyinji na kumkhulupilila Yesu ¹² Siku yolondolapo gulu inyinji yewela ku cisangalalo. Pebecimvwa kuti Yesu akuza ku Yelusalemu, ¹³ betola mashashaya kanjeza nokuya kuyokumana naye nokuwa, "osana! Osalisika niwala akuza mzina la Ambuye, Mfumu ya Aisirayeli." ¹⁴ Yesu epeza bulu mtontho nokwelapo, monga mwekwelembewela. ¹⁵ "Osayopa, bana anakazi aku ziyoni onani, mfumu yanu ikuza, yonkhala pa mwana wa bulu." ¹⁶ Ophunzila bake aliyemvwishishe mau aba poyamba, koma Yesu pelemekezeka, bekumbukula kuti kwelembeka za eve nakuti becita ivi kwa eve. ¹⁷ Mzinda wecitila umboni kuti benze naye penzoita Lazalo kufuma mmanda naku muusha ku imfwa. ¹⁸ Nicifukwa cake gulu yeluta nakokumana naye, cifukwa yecimvwa kuti ecita codabwisa ici. ¹⁹ Afalisi eciti mwabeve beka, "onani, mungacite lini kanthu: Ziko lamulondola." ²⁰ Lomba amitundu mwa bala benzokuya kuyopemphela ku cikondwelelo. ²¹ Aba eciya kwa Filipo, enze waku Betisida mu Galileya, emkonsha kuti, "Akulu, tufuma kuona Yesu." ²² Filipo eciyanakouzya Andulu; Andulu eciya na Filipo, nouzya Yesu. ²³ Yesu eyankha kuti, "nthawi yakwana yakuti mwana wa munthu alemekezeke. ²⁴ Zoona, zoona, nulabila na mweo, peka peka kambeu ka tiligu kapone pa nthaka na kufwa, konkhala pakeka; koma ngati kafwa, kovyala vipaso vinyinji. ²⁵ Wala okonda moyo wake akautaye; koma wala onyanya moyo wake akausunge nthawi yonse. ²⁶ Ngati aliyense otumikila neo, anilondole, nakuti kwaningabe, otumikila neo akabe kwamene uko. Ngati muyake otumikila neo, Atata akamupe ulemelelo. ²⁷ Lomba mtima wangu niovutika, nilabile cinji? 'Atata nilondesheni pa nthawi ino?' Koma pa cifukwa ici nawela pa nthawi iyi. ²⁸ Atata, kwezani zina lanu, "kufuma apo mau efuma kululu nakuti, "Nali lemekeza ndipo nili lemekeza soti." ²⁹ Ndipo gulu lepanamapo nakumvwa leciti kwagunda. Bayake beciti, "mngelo walabila naye." ³⁰ Yesu enkhala nakuti, "mau aba aliyewele cifukwa ca neo koma cifukwa ca mweo. ³¹ Lomba ninthawi ya ciweluzo ca ziko lino: Lomba olamulila a ziko lino akataiwe kunja. ³² Patinika nyamuliwe kufuma pa ziko nikaziunjikile onse kuwela kuti neo." ³³ Elabila teto kuonesha imfwa yake mwati ikabele. ³⁴ Gulu yemuyankha, "Tecimvwa mulamulo kuti Kristu akankhale wamuyayaya. Ungalabile tyani kuti, "mwana wa munthu ofunika kunyamuliwa? Nibani uyu mwana wa munthu?" ³⁵ Yesu eciti, "Nyale inkhale na mweo kwa kanthawi katontho tyala. Yendani pamukali na nyale, kuti mdima usakupezeni wala oyenda mumduma oziba lini kwakuya. ³⁶ Pamkali na nyale, khulupililani nyale kuti mube bana ba nyale." Yesu elabila mau aba nofumapo nakobisala. ³⁷ Olo kuti Yesu ecita vodabwisa vinyinji pakati pao baliye mukhulupilile ³⁸ kuti mau ba Yesaya mneneli yakwanishike, yeciti: "Ambuye, nikwabani kwayatambulukila kwanja la ambuye?" ³⁹ Cifukwa ca izi baliye khulupilile. Yesaya naye eciti, ⁴⁰ "wabavala menso yao,nakukosesha mitima yao; kuti angaone namenso yao nomvwishisha namitima yao ⁴¹ Esaya enena izi zinthu cifukwa eona ulemelelo wa Yesu ndipo elabila za eve. ⁴² koma nangu zenze teti,banyinji asogoleli benkhulupilira mwa Yesu; koma cifukwa ca falisi, baliye zinenela patuba kuti banga fumye mu sinagogi. ⁴³ Benzo kondeshesha mayamiko ya banthu kupambana mayamiko yofuma kwa Mulungu. ⁴⁴ Yesu elila mokhuwa ndipo eciti, "Wala okhulupilira mwa neo, okhulupilira lini tyala mwa neo,koma mwaula enituma neo, ⁴⁵ ndipo naula oniona ona wala enituma. ⁴⁶ Nawela ngati kuunika mu ziko,kuti aliyense wati aka khulupilire mwaneo aka nkhalilire lini mumdima. ⁴⁷ Ngati muyake akamvwe mau yangu koma soyasunga,sunumuweruza; pakuti niliye wele kuweruza, koma kupulumusa ziko. ⁴⁸ Wamene onikana ndipo solandila mau yangu,alinaye wati akamu weluze. mau nalabila yaka mu weluza pa siku losiliza. ⁴⁹ pakuti niliye labila zaneo neka, koma ni Atata enituma, beni pasa lamulo zati nika labile ndipo zati nika labile. ⁵⁰ Nuziba lamulo lake ni ya moyo,ndiye canulabila_monga atata enenela kwa neo,nu labila."