¹ Nulabila kuti oloba cokolo, malinga ngati akali mwana, osiyana lini na kopolo, ngankhale kuti ni mwine wa malo onse. ² Koma akali pansi paulamulilo wa omusunga na oyanganila mpaka siku yekonzewa na awisi. ³ Cimozi-mozi, petenze bana atontho, tenze omangiwa ukapolo ku vinthu va ziko. ⁴ Koma nthawi peyekwana, Mulungu etuma Mwana wake, obadwa mwa mwanakazi, obadwa pansi pa lamulo. ⁵ Ecita ici kuti akaobole bala ali pansi pa lamulo, kuti tingatolewe ngati bana bake. ⁶ Nakuti cifukwa nimwe bana, Mulungu watuma mumitima yasu Mzimu wa Mwana, oita, ''Abba, Atata.'' ⁷ Teto nimwe lini akapolo soti, koma mwana, ngati mwana, nimwe oloba cokolo kupitila muli Mulungu. ⁸ Koma pa nthawi ila, pemwenze osaziba Mulungu, mwenze pangiwa akapolo kubala ali, na mphavu za cilengedwe, koma sali milungu nakuba. ⁹ Koma lomba pakuti mwamuziba Mulungu, olo kapena mwazibika kuli Mulungu, zili tyani kuti muwelela kuzofoka na ziliye phindu? Mufuna kuikiwa soti mu ukapolo kowelezela. ¹⁰ Mwenzo konkha ma siku na mwezi ukacoka na nyengo na zaka! ¹¹ Mwanicitisha mantha mweo kuti payakine ncito yangu na mweo yenzevye phindu. ¹² Nuku sengani, anekwasu, nkhalani ngati neo, ndaba nane nankhala ngati mweo. Muliye nicitile ciipa. ¹³ Koma muziba kuti cenze cifukwa ca matenda ya muthupi kuti nelalikila uthenga wa bwino kwa mweo nthawi yoyamba. ¹⁴ Olo kuti zinthu zenze lini bwino pa mubili wangu ziliye kuikeni pa muyeso, muliye nizonde olo kunikana. Koma mwenilandila ngati nenze mungelo wa Mulungu, monga nenze Kristu Yesu yeve. ¹⁵ Yali kuni madaliso lomba? Pakuti nucitila uboni kwa mweo, kuti kwenze kotheka, sembe mwecosa menso yanu na kunipasa neo. ¹⁶ Ko lomba, nankhala mudani wanu cifukwa ca kukuujyani zoona? ¹⁷ Ali na cangu kufuna kukukokani, koma paliye cilingo cabwino. Ofuna akuvalizeni kuti munkhale cangu nabeve. ¹⁸ Nicokondwelesa kunkhala na cangu pa zifukwa zambwino, osati pala peka panili pamozi namwe. ¹⁹ Bana bangu, soti nili na vobaba va popapa cifukwa ca mweo mpaka Kristu apangike mwa mweo. ²⁰ Nulaka-laka kuba na mweo lomba nosintha lilime langu, cifukwa nadabwisika namwe. ²¹ Niujyeni, mweo mufuna kuba pansi pa lamulo, muvwila lini lamulo? ²² Pakuti celembeka kuti Abrahamu enze na bana analume abili, umozi enze mumwanakazi kapolo na umozi muyake mumwanakazi omasuka. ²³ Umozi ebadwa mwa mwanakazi kapolo monga mwa thupi, koma muyake ebadwe mwa muzimai omasuka kupitila mwa lonjezo. ²⁴ Ivi vinthu vinga tanthauziliwe mokulubika, pakuti aba azimai oimilila mapangano abili. Umozi wabeve efuma ku lupili ya Sinai ndipo obala bana ba ukapolo. Uyu ni Hagara. ²⁵ Lomba Hagara opanamila lupili la Sinai ku Arabiya; ndipo opanamila Yelusalemu wa lomba, cifukwa ali mukapolo na bana bake. ²⁶ Koma Yerusalemu ali kululu ni omasuliwa, ndipo niye amama basu. ²⁷ Pakuti celembeka. ''Kondwela, weo osabala ukaliye balepo; lila mokuwa ndipo kweza mau acimwemwe, weo usavutika na vobaba vobala mwana; cifukwa bana ba mwanakazi okaniwa nibanyinji kupambana ba mwanakazi ali na mwanalume.'' ²⁸ Koma mweo, anekwasu, monga Isake, nimwe bana ba lonjezo. ²⁹ Panthawi ila bala ebadwa mwa thupi enzuza bala ebadwa mwa Muzimu. Nicimozi mozi na lomba. ³⁰ Koma malemba akuti tyani? ''Pitikishani mwanakazi wacikapolo na mwana wake. Cifukwa mwana wa mwanakazi wa kapolo sangagabane coloba na mwana wa mwanakazi omasuka.'' ³¹ Lomba apa, anekwasu, ndise lini bana ba mwanakazi wa kapolo, koma mwanakazi omasuka.