¹ Kamba ka ici neo, Paulo nine kaidi wa Kristu Yesu wa mweo ba Mitundu. ² Nuganiza kuti mwecimvwa za udindo wa cisomo ca Mulungu ceppasiwa kwa neo koma canu. ³ Nulemba monga mwavumbuluso lezibishiwa kwa neo. Ici ni coona cobisika cinekulembeleni mwa patontho tyala. ⁴ Mukabelenga za ici, mumvwishishe vili mwa neo mucisinsi ici za Kristu. ⁵ Mibadwo iyakine cisinsi ici ciliye zibishiwe ku bana ba banthu. Koma lomba cavumbulusiwa mwa mzimu utuba kwa otumiwa bake na aneneri bake atuba bepatuliwa kucita nchito yake. ⁶ Cisinsi ici cobisika nicakuti bamitundu nao niotolako cuma cake, navibalo vamumubili, ndipo ogabana nao lonjezo mwa Kristu Yesu mwa uthega wake. ⁷ Pakuti nunkhala mtumiki wa uthenga uyu mwa mphaso ya cisomo ca Mulungu cepasiwa kwa neo mwakugwira nchito mwa mphamvu yake. ⁸ Kwa neo- olo nine osilizhyila pa banthu atuba ba Mulungu- cisomo ici cepasiwa, kulalikila kwa bamitundu cuma cosakonkheka ca Kristu, ⁹ Nakuleta patuba kwa aliyense ndondomeko- cisinci cobisika mwanthawi mwa Mulungu, elenga vinthu vonse. ¹⁰ Ndondomeko iyi yecizozibishiwa mwa machalichi koteto ukulu na ulamuliro wa malo ya kululu akazibe mbali zinyinji za nzeru ya Mulungu. ¹¹ Ici cecitika mwa ndondomeko yacinkhalile yecikwanilisha mwa Kristu Yesu Ambuye wasu. ¹² Pakuti mwa Kristu tilinako kulimbika na umwai na cisimikizhyo kamba ka cikhulupililo casu mwa eve. ¹³ Mwaici nusenga mweo kuti musawelere vuli kamba ka kusaushiwa kwangu kamba ka mweo wamene uli ulemelero wanu. ¹⁴ Pa cifukwa ici nupeteka nkhokola zangu kwa atata, ¹⁵ wamene mwa eve banja lililonse kululu na pa calo oitiwa zina lake. ¹⁶ Nupemphera kuti akupaseni, monga mwa kulemera kwake mu ulemelero wake, akulimbikiseni na mphamvu mwa mzimu wake, mu umunthu wa mkati mwanu. ¹⁷ Nupemphera kkuti Kristu ankhale mumtima mwanu mwa cikhulupililo, na mizhyu yanu na maziko mu cikondi cake ¹⁸ Kuti mukakwanishe kumvwishisha, pamozi na banthu bonse batuba ba Mulungu, mukupingasha, mkutalimpha, mumsinkhu, na mkunoka, ¹⁹ nakuziba cikondi ca Kristu, cikuya kupilila cizibisho, koteto kuti mukazuzhiwe na kuzula konse kwa Mulungu. ²⁰ Lomba kwa eve okwanilisha kucita mopitilila vonse vatukonsha olo kuganiza, monga mwa mphamvu yake yugwira nchito mwa seo, ²¹ kwa eve kube ulemelero mchalichi na mwa Kristu Yesuku mibadwo yonse kwa nthawi za nthawi. Amen.