¹ Lomba Petulo na Yohane enzo kuya mu kacisi pa nthawi yopemphera, ndiyo naini koloko. ² Lomba mwanalume enze olamara mwecibadwila kufuma mumala mwa anyina enzo nyamuliwa kumuthwala pa mulyango wa sunagoge zina yake wokongola. Benzo muika eve pala masiku onse kuti asenge vatyala kuli bala benzo laba mu kacisi. ³ Pamene peciona Petulo na Yohane kuti aloba mu kacisi, esenga catyala. ⁴ Petulo emulanganishisha eve, pamozi na Yohane eciti, tilange seo." ⁵ Mwanalume olemala ula ebalanga beve, noyembekeza kuti alondele kanthu kwao. ⁶ Koma Petulo eciti," Siliva na golide niliye, koma canilinaco, nikupe weo. mu zina la yesu khrisitu waku Nazareti, yenda." ⁷ Emukata eve na kwanja ya makwendi, Petulo nomunyamula eve, ndipo mofulumira mwanalume ula mendo na majoini yake elimbikishiwa. ⁸ Ejoba mululu, olemara ula epanama na kuyamba kuyenda, na kuloba nao pamozi Petulo na Yohane mu kacisi eyenda , elumpha na kuyamika mulungu. ⁹ Banthu onse bemuonaeve oyenda na kuyamika mulungu. ¹⁰ Beziba kuli niula mwanalume enzo senga banthu vatyala pa mulyango wokongola wa kacisi, ndipo bepaka malingililo na kudabwa kamba ka cinthu cemucitikira eve. ¹¹ Peenzokatilire Petulo na Yohane, banthu onse ebautukira beve ku chikonjo ca solomo, oabwa mphera. ¹² Koma Petulo peciona ici, ebayankha banthu, mweo madoda a israyeli, cifukwa mudabwa? cifukwa muti langishisha seo, monga ni seo tapanga kuti eve ayende mwa mphavu zasu o mwau mulungu wasu? ¹³ Mulungu wa Abrahamu, na isaki, na Yakobo , mulungu makolo basu, elemekeza kapolo wake yesu. Ndiye wamene ula, wemwethwala nomukana pa meso pa Pilato, peenzofuna kuti ammasula eve. ¹⁴ Mweo mwe kana mutuba na olungama wala, ndipo mwesenga kuti mweo akumasulileni opaya. ¹⁵ Mwepaya mwine moyo, amene mulungu emuukisha kuli akufwa ndipo seo ndise mboni pa izi. ¹⁶ Pa cikhazikiso ca chikhulupiliro mu zina lake, zina lake yepangisha lidoda ili yamuona noziba, kulimbikishiwa. cikhulupiliro camene ciri copitira mwa yesu campasa eve kupola pa maso pa mweo monse. ¹⁷ Lomba, anekwasu, nuziba kuti mwecita mkusaziba, monga becitasoti olamula. ¹⁸ Koma vinthu vonse vamene mulungu elalikiratu mukamwa mwa onse aneneri, kuti khrisitu akauzunzike, eve wakwanilisha lomba. ¹⁹ Lapani, cifukwa caici, na kutembenuka, kuti macimo banu afafaniziwe, ndiye kuti zikawele nthawi zosisimusha vofuma pa menso pa ambuye. ²⁰ Ndipo kuti atumizye epasiwa kuli mweo, christu yesu. ²¹ Ndiye wamene ofunika kumulondera kululu mpaka nthawi yokenzewa soti vinthu vons, vamene mulungu erabila ku nthawi zakale mkamwa mwa aneneri bake atuba. ²² Mose cendi elabila kuti, ambuye mulungu akaukishe mneneri monga neo muli anekwanu. mukamumvwere vilivonse vati akalabire namwe. ²³ Cikacitike cakuti munthu aliense wati akaleke kumvwa mneneri uyo akaonengewe kosilirathu pakati pa banthu. ²⁴ Ee, ndipo onse aneneri kufuma pa samueli na beve bewera pavuli pake, elabira na kumemeza za masiku awa. ²⁵ Mweo nimwe bana ba aneneri na ba pangono la mulungu yecipanga namakolo banu, mwecilabilira na Abrahamu, mu mbuto yako mabanja bako onse pa calo akabalisiwe , ²⁶ Mulungu pavuli pa ukisha otumiwa wake, emutuma eve kwa mweo poyamba, kuti akakudaliseni mweo mwa kukutembenulani kuti aliense wa mweo afume kuvoipa vake.