¹ Lomba Agripa eciti kwa Paulo, "Ungazikambile weka." Paulo etambasula kwanja yake noyamba kulabila mozicinjilijya. ² " Nankhala okondwela, Mfumu Agripa, poleta mulandu wangu kwa mweo lelo, kuti nilabile pa milandu yonse yakunipasa Ayuda, ³ maka-maka ndimwe akaswili pa midauko yonse ya ciyuda na mafunso. Nukupemphani kuti munimve modekha mtima. ⁴ Zoona, Ayuda onse oziba mwenezonkhalila pa unyamata wangu mu ziko mwangu na ku Yerusalemu. ⁵ Oniziba kucokela poyamba ndipo ofunika kuti bavumele kuti nezonkhala ngati mu Falisi, gulu lozama lacipembezo. ⁶ Lomba napanama pano kuweluziwa kamba ka chiyembekezo mwa lonjezo lepangika na Mulungu kwa makolo yasu. ⁷ Ni lonjezo iyi yamene mitundu twelufu yuyembekezera kulandira pakupembeza Mulungu mwa khama usiku na muzuba, ndipo ni mwa chiyembekezo ici, Mfumu. kuti Ayuda oniimba mulandu. ⁸ Ni chifukwa canji kuti munthu pali mweo anga ganize kuti nicosatheka kwa Mulungu kuusha akufwa? ⁹ Lomba zoona, neo nenzoganiza kuti nicite vinyinji viipa pa zina la Yesu waku Nazareti. ¹⁰ Necita izi mu Yerusalemu. Nekhomela mu ndende anyinji oyela banthu ba Mulungu mwa ulamulilo wenelandila kufumuka kwa akulu ansembe; ndipo akapaiwa, nenzo bakana. ¹¹ Nenzo bapasa cilango kanyinji mu ma sinagoge yonse ndipo nenzo yesa kubakakamijya kucitila mwano. Nenzokalipa mokwana cakuti nenzo manga ngankhale bali mu mizinda yakunja. ¹² Nikaliucita teto, neluta ku Damasiko na ulamulilo na mpamvu kucokela ku akulu ansembe. ¹³ Penenze pa ulendo, pakati pa siku, Mfumu, neona kuwala kucokela kululu kuwala kopambana na zuba,kusanika pali neo na pa madoda benenze nao pa ulendo. ¹⁴ Petepona pansi tonse, necimvwa lizu lukamba naneo mu citundu ca Aheberi, ''Saulo, Saulo, ni cifukwa canji unilonda-londa? Ni covuta kunyata pa volumata.' ¹⁵ Ndipo neciti, ' Nimwe bani, Ambuye?' Ambuye eyankha, 'Nine Yesu uulonda-londa. ¹⁶ Lomba nyamuka panama; kamba ka colinga naonekela kwa weo, kuti nikusankhe unkhale wa nchito na mboni yangu pa zinthu zuziba pa neo lomba ndipo na zinthu ziti nikuoneshe ku sogolo uku; ¹⁷ ndipo nikupulumushe ku banthu na kwa amitundu kwa nukutuma, ¹⁸ kusegula meso yao ndipo kuti batembenuke kucoka ku mudima kuwela ku nyale naku mphamvu ya satana kuza kwa Mulungu, kuti bakalandile kucokela kwa Mulungu chikhulukililo ca macimo ndipo nakuti akalandile coloba cunupasa awo eyelesewa mwacikhulupililo mwa neo.' ¹⁹ Mwa ici, Mfumu Agripa, niliye citile mwano mesomphenya yaku lulu; ²⁰ koma, coyamba kwa bala bamu Damasiko, ndipo ku Yerusalemu, ndipo naku zungulila ziko lonse la Yudeya ndipo naku ba mitundu, nebapasa uthenga kuti balape nakutembenukila kwa Mulungu, kucita zinthu zoonesha kulapa. ²¹ Kamba ka ici Ayuda enikata mu chalichi nofuna kuti banipaye. ²² Mulungu wanithandiza kufika lomba, napanama ndipo nupeleka umboni ku banthu tyala na kubanthu opambana pa vinthu viyake lini kupambana zekamba aneneli na Mose kuti zikacitike - ²³ kuti Kristu ayenera kuzunziwa ndipo kuti akankhale oyamba kuuka kwa akufwa, nakuzo lalikila nyale ku banthu basu ndipo na kwa Amitundu." ²⁴ Paulo pesilijya kuzicinjilijya, Fesito eciti mokweza mau, "Paulo niwe wa videde; kuphunzila ngako kwako kwakucitisha videde." ²⁵ Koma Paulo eciti, "Niliye videde, olemekezeka Fesito, koma cunulabila nicacendi ndipo nicomvwika. ²⁶ Pakati Amfumu oziba za ivi vinthu; ndipo, nukamba momasuka kwa beve, ndaba nulimbikisika kuti paliye kanthu kobisika kwa beve; pakuti viliye citikile ku mbali. ²⁷ Mukhulupilila aneneli, Mfumu Agripa? Nuziba kuti mukhulupilila." ²⁸ Agripa eciti kwa Paulo, "Mwakanthawi patontho unganinyengelele ndipo nakunipanga kuti ninkhale mu Kristu?" ²⁹ Paulo eciti, " Nupemphela kwa Mulungu, kuti kwa nthawi itontho kapena nthawi ikulene, osati mweo mweka, koma aliyense onimvwa neo lelo, munkhale ngati neo, koma osati na vingwe vamu ndende teti." ³⁰ Ndipo Amfumu ecizopanama, na kazembe, na Benisi naye ndipo nabala benze nkhenzi nao pamozi; ³¹ pebefuma mukati, beyamba kukambilana nakuti, "Uyu munthu paliye cawacita coyenela imfwa kapena kumangiwa." ³² Agripa eciti, uyu munthu sembe wamasuliwa kuti aliyecite apilu kwa Kayisala."