¹ Okondewa, iyi lomba ni kalata yacibili yanakulembelani mweo, ndipo mu yonse yabili nukukumbushani na kukusisimushani ku maganizo yanu yoona ² kuti mukumbukile mau yelabilika kuvuli na aneneli atuba na lamulo ya Ambuye wasu na Mpulumusi yepasiwa kwa mweo kupitila mwa atumwi. ³ Ziwani ici poyamba, kuti opepusha aka wele mu masiku osilijya. Akapepushe na kupitilijya kulingana na vilako-lako vao. ⁴ Akanene kuti, "Ili kuni lonjezo la kuwela kwake mwecifwela makolo basu, vinthu vili cimozi-mozi, mweciyambila cilengedwe." ⁵ Oluwila dala kuti kale-kale mwa mau ya Mulungu kululu na pansi vecizonkhalako kufumila mu manzi na kupitila mu manzi. ⁶ kupitila mwa ici ziko pa nthawi ila lecenekeka, nakuzula manzi. ⁷ Mwa mau yamene yala kululu na ziko lapansi vusingiwila kuyopita mu moto, kusungukila siku la ciweluzo na kucenekeka kwa banthu osapembeza. ⁸ Musaluwe, okondewa, kuti siku limozi kwa Ambuye lili ngati zaka sauzande, ndipo zaka sauzande zili ngati siku limozi. ⁹ Ambuye ocelwa lini na lonjezo lake, monga mwakuganizila bayakine kuti ocelwa. Koma ni odekha mtima na mweo, ofuna lini kuti liyense wa mweo kuyocenekeka, koma kuti aliyense akapeze mpata olapa. ¹⁰ Moteto, siku la Ambuye likawele ngati kawalala: kululu kukafumepo na zungo likulu. vonse vikapye na moto, na ziko lapansi na vocititka mkati mwake vikaonekele patuba. ¹¹ Lomba pakuti vonse vikapye munjila iyi, mweo mufunika kuba banthu otyani? Mufunika kuba atuba na moyo wa umulungu. ¹² Mufunika kuyembekeza na kufulumijya kuwela ku siku la Ambuye. Pa siku lila kululu kukacenekeke na moto, na vonse vamululu vikasungunuke na kuphya kululu. ¹³ Koma mwa lonjezo lake tulindila kululu kwa nyowani na ziko lapansi la nyowani kwamene kwati cilungamo cikankhale. ¹⁴ Mwa ici, okondewa, pakuti muyembekeza ivi vinthu, yesesani kuti mukapezeke baliye dontho na cilema pa meso pake, mwa mtendele. ¹⁵ Soti, ciyakine muyese ku kudekha mtima kwa Ambuye wasu kuba cipulumuso. Monga mwamene okondewa mnekwasu Paulo ekulembelani, monga mwa nzelu zepasiwa kwa yeve. ¹⁶ Paulo olabila za ivi vinthu mu makalata yake yonse, mwamene muli vinthu vovuta kumvwisha. Banthu osaziba kanthu na osankhazikika opotoza ivi vinthu, mwakucitila malemba yayakine, kucionongeko ca beve beka. ¹⁷ Mwa ici, okondewa, pakuti mwavizibilathu ivi vinthu, muziyang'anile mweka kuti musasoceleshewe na cinyengo ca banthu osasunga lamulo, nakutaya cikhulupililo canu. ¹⁸ Koma kulani mu cisomo na mciziwisho ca Ambuye na Mpulumusi wasu Yesu Kristu. Ulemelelo unkhale kwa yeve kuyambila lomba mpaka ku siku ya ku nthawi yonse.Ame.