¹ Aneneli onyenga ewela ku banthu, na aphunzisi awenye akawele soti kwa mweo. akalete mwacisinsi viphunzisi vawenye na voononga, akakane Ambuye wao amene ebagula Oleta cionongeko pa beve beka mofolumijya. ² Anyinji akakonde vanyansi vao, kupyolela mwa ivi njila ya cendi ikacitiwe mwano. ³ Mu cogolo cao akakuyeseni na mau ya cinyengo. Ciweluzo cao cankhala cikuza kwa nthawi itali, na cionongeko cao cili lini lele. ⁴ Pakuti Mulungu aliyelekelele angelo becimwa. Koma ebatwala mu ndende kuti asungiwe mu unyolo mu malo a mfinzi kufikila ciweluzo. ⁵ Ciyakine soti, aliyelekelele ziko lapansi lakale koma esunga Noah elalikila cilungamo pamozi nabayakine benze seveni poleta vimanzi pa ziko la banthu osapembeza. ⁶ Mulungu esandusha mizinda ya Sodom na Gomora kuba milota na kubaweluza ku cionongeko kuti cibe cisanzo pa zatizikacitike kwa bala osapembeza. ⁷ Koma kwa olungama Loti, epondelejyewa na cikhalidwe conyansa ca banthu bayipa. ⁸ Lomba ula munthu ulungama, enzonkhala pakati pao siku na siku enzunzika mu cilangamo ca moyo wake kamba ka macitidwe yao yaipa. ⁹ Ambuye oziba mopulumushila banthu bake opembeza mu mayeso nakusunga banthu osalungama ku cilango pa siku la ciweluzo. ¹⁰ Ici ni cendi maka-maka kwa bala oyenda mwa cilako-lako ca thupi, nabala opepusha ulamulilo. Oyopa lini kanthu ndipo bali na cifunilo ca beve beka, baliye mantha ponyoza yeve waulemelelo. ¹¹ Angelo olo kuti bana mphamvu ikulene ngako, oleta lini ciweluzo ca manyozo cosushana nao kwa Ambuye. ¹² Koma aba banthu, monga nyama susaganiza, epangiwa kuti akakashiwe na kuonongeka. Ozibalini waku nyoza. Mu cionongeko nao akaonongeke. ¹³ Bakalandile mphoto pa viyipa vakucita. Oona ngati vokondwelesha mzuba ni vabwino. Nimabanga na vilema. Bakumvwa bwino pocita macitidwe bao ba cinyengo pamene bakulya namwe pamozi. ¹⁴ Bana meso ozula na cigololo, okuta lini kucita ucimo. Onyengelela bala osankhazikika mu kucita viyipa, mitima yao yephunzisiwa kunkhala na cigolo. Nibana otembelelewa. ¹⁵ Basiya njila zolunjika nakutayika kukonkha njila ya balamu mwana wa Beor, enzolandila malipilo yacosalungama. ¹⁶ Koma elandila cizuzulo pa macimo bake- bulu yusalabila yelabila na lizu la munthu kulesha kufuntha kwa mneneli. ¹⁷ Aba banthu ninyenje ziliye manzi ndipo ni mame yakuza na cimphepo cikulene. Cimfinzi cikulu ca sungikila beve. ¹⁸ Olabila na mau ozitukumula yaliye nchito. Onyengelela banthu na vokhumbwila thupi. Onyengelela bala banthu 0funa kuthaba kufuma kwa bala onkhala mu kuifya. ¹⁹ Obalonjeza ufulu, koma beve beka na kapolo ba ciphuphu. Pakuti munthu ni kapolo wa ciliconse cumuposa mphamvu. ²⁰ Ngati bautuka ciphuphu ca ziko lapansi kupitila mu cizibisho ca Ambuye na Mpulumusi Yeau Kristu koma okashiwa soti na kugonjeshewa cokonkhapo lomba cunkhala ciyipa kuposa coyambilila. ²¹ Sembe cenze cabwino kwa beve kusaziba njila ya cilungamo kuposa kuiziba nakufumamo mu malamulo ya tuba yepasiwa kwa beve. ²² Mwambi uyu niwacendi kwa beve: "Imbwa yuwelela kumalusi bake, ndipo nkhumba yasamba yuwelela mu matika."