^{1 2} Zokhuzana na utumiki wa banthu batuba a Mulungu, nicosafunikila kuti neo nikulembeleni neo. Nuziba za kufunishisha kwanu, kunuzitamandila nako ku banthu baku Makedonya. Nebaujya kuti Akaya niokonzeka kufuma caka catha.Nikufunishisha kwanu ndiye kwetuntha anyinji kuyamba kucita vinthu. ³ Lomba natuma anekwasu kuti kuzitamandila kwasu za mweo kusankhale kwa tyala- tyala, kuti mukankhale okonzekelatu. ⁴ Mwina mwake ngati ba ku Makidoniya nawela nao ndipo apeza kuti ndimwe osakonzeka, tikamvwishiwe soni-paliye vunulabila va mweo - pakuti nucetekelani ngako. ⁵ Teto neganiza kuti cenze cofunikila ku kulimbikisha anekwasu kuwela kwa mweo nakuzokonzekelatu mphaso zimwelonjeza. Ici cili teto kuti cinkhale monga mdalio, osati monga cinthu coyumilijya. ⁶ Mfundo ni iyi: wala ocala patontho akawejye patontho, na wala ocala na colinga ca madaliso akawejye madaliso. ⁷ Lekani aliyense apase monga muwaganizila mumtima mwake, kunkhla osamasuka kapena kukakamijyiwa, poti Mulungu okonda opasa mokondwela. ⁸ Ndipo Mulungu niokonzeka kupanga cisomo conse kutaikila pa mweo, kuti, nthawi zonse, muvinthu vonse, mungankhale navo vonse vumufuna. Ici cinkhale teto kuti mukapakishe vonse vocita vabwino. ⁹ Cili monga mucelembewela. " Eganisha cuma cake ndipo epasa osauka. Ciyelo cake cosasila. ¹⁰ Amene opasa mbeu ku mulimi ocala na buledi ya kulya akapase soti na kupakisha mbeu zanu zocala. Akapakishe vowejya va cilungamo canu. ¹¹ Mukalemeleshewe munjila iliyonse kuti munkhale opasa momasuka. Ici cikapangishe coyamikila kwa Mulungu kupitila mwa seo. ¹² Pakuti nchito iyi yuthandiza lini tyala vosoba va banthu atuba a Mulungu, koma soti cutaikila mumacitidwe anyinji a coyamikila kwa Mulungu. ¹³ Cifukwa ca kuyeswa kwanu na kusimijyila kwa utumiki uyu, mukalemejye soti Mulungu pomvwilila kuvomelejya kwanu uthenga wa Kristu. Mukalemejye soti Mulungu mwa kupasa momasuka kwa beve na kwa aliyense. ¹⁴ Okufunishishani, ndipo okupemphelelani. Ocita ici cifukwa ca cisomo cikulu ca Mulungu cili pa mweo. ¹⁵ Mayamiko ankhale kwa Mulungu cifukwa ca mphaso yosalabilika.