¹ Onani cikondi cimene Atata atipasa, kuti tikoitiwa bana ba Mulungu, ndipo ndiye mutilili. Pa cifukwa ici, ziko yutiziba lini seo, cifukwa iliye muzibe yeve. ² Okondewa, nise bana ba Mulungu lomba, ndipo cikaliye vumbulushiwa mwati tikabele. Tuziba kuti pamene Kristu okoyoonekera, tikabe monga yeve, pakuti tikamuone mwamene alili. ³ Aliyense ali na ciyembekezo ici muli yeve oziyelesa eka monga mwalili oyela yeve. ⁴ Aliyense ocimwa ocita macitidwe osaweluzika, ndipo cimo nikusaweluzika. ⁵ Muziba kuti Kristu evumbulushiwa kuti atole macimo, ndipo muli yeve muliye cimo. ⁶ Aliyense onkhala mwa yeve sangapitilijye kucimwa. Aliyense opitilijya kucimwa omuona lini kapena kumuziba. ⁷ Bana, musalole aliyense kukusokonejyani. Ula ocita cilungamo ni olungama, monga Kristu ni olungama. ⁸ Ula ocita ucimo ocokela kwa mudyelekezi, pakuti mudyelekezi ecimwa kufumila poyamba. Pacifukwa ici Mwana wa Mulungu evumbulushiwa, kuti aononge zincito za mudyelekezi. ⁹ Aliyense obadwa kufumila kwa Mulungu opitilijya lini ku cimwa, cifukwa mbeu ya Mulungu yunkhala mwa yeve. Sangapitilijye kucimwa cifukwa abadwa mwa Mulungu. ¹⁰ Mwaici bana ba Mulungu na bana ba mudyelekezi baonekela: aliyense osacita cilungamo ocokela lini kwa Mulungu, olo ula osakonda mbale wake. ¹¹ Pakuti uyu niuthenga wemwecimvwa kufumila poyamba: tikokondana wina na muyake. ¹² Sitifunika kunkhala monga Kaini, ecokela kumuipa ndipo epaya mbale wake. Ni cifukwa cinji emupaya? Cifukwa zincito zake zenze zoipa ndipo zambale wake zolungama. ¹³ Osadabwa, anekwasu, ngati ziko yukuzondani. ¹⁴ Tuziba kuti tapita kufuma ku imfwa kuloba m'moyo, cifukwa tukonda anekwasu. Aliyense osakonda onkhalilila mu imfwa. ¹⁵ Aliyense osakonda mbale wake ni opaya. Muziba kuti opaya aliye moyo wosatha kunkhala mwa yeve. ¹⁶ Mwaici tuziba cikondi, cifukwa Kristu epeleka moyo wake kamba ka seo. Tufunika nase tipeleke miyoyo yasu cifukwa ca anekwasu. ¹⁷ Koma aliyense ali na zabwino za ziko, oona mbale wake osoba, novala mtima wake wacifundo kwa yeve, nanga cikondi ca Mulungu cingankhale tyani mwa yeve? ¹⁸ Bana bangu, tisakonde mu mau kapena mu lilime, koma mumacitidwe na mucoonadi. ¹⁹ Nimwaici tuziba kuti tucokela ku coonadi, ndipo tusimikijya mitima yasu pameso pake. ²⁰ Pakuti ngati mitima yasu yutishusha seo, Mulungu nimukulu kupambana mitima yasu, ndipo oziba vinthu vonse. ²¹ Okondewa, ngati mitima yasu yutishusha lini, tilinaco cisimikijyo kwa Mulungu. ²² Ciliconse citingapemphe tilandile kufumila kwa yeve, cifukwa tusunga malamulo bake ndipo tucita vinthu vumukondwelesha pameso pake. ²³ Iyi ndiye lamulo yake: kuti tikokhulupilila mu zina ya Mwana wake Yesu Kristu nakukondana wina na muyake, monga mwetipasila lamulo iyi. ²⁴ Eve osunga malamulo ya Mulungu onkhala mwa yeve, ndipo Mulungu onkhala mwa yeve. Mwaici tuziba kuti onkhala mwa seo, kucokela M'mzimu wetipasa seo.