¹ Umu niye mufunikila kuti banthu akotionela, ngati atumiki na osunga coonadi cobisika ca Mulungu. ² Lomba cufunuka kwa osunga nicakuti apezeke kuti niokhulupilika. ³ Koma kwa neo nikanthu katontho ngako kuti ningaweluziwe na mweo olo mphala ya milandu ya banthu. Ndaba neo neka nuziweluza lini. ⁴ Nuzibalini mulundu ulionse wanuiyimba, koma cutanthauzalini kuti nayesewa kale olungama. Na Ambuye oweluza neo. ⁵ Mwa ici osagamula ciweluza ciliconse nthawi ikaliye kwane, akaliye wela Ambuye. Akuzoika patuba vinthu vobisika vamumfinzi novumbulusha volinga mtima. Basi aliyense akalandile cithokozo kufumila kwa Mulungu. ⁶ Lomba, anekwasu, nasebenzesha ndondomeko iyi kwa neoneka na Apolo kamba ka mweo, kuti kwa seo muphunzileko tanthauzo lunena kuti, "Osaluta kupitilila vila volembewa." Ici cili teti kuti pakati panu pasapezeke ozitukumulila muyake. ⁷ Lomba oona kusiyana kulikonse pakati pamweo na bayakine nibani? Muna cinji cimuliyecitolandila? Ngati mwecitalondila, muzitukumulilani monga muliyecitolandila? ⁸ Vonse vumwenzofuna mulinavo kale-kale! Mwankhala kale olemela! Mweyamba kulamulila mweka- ndipo kucosako seo tyala! Inde, kuti zoona mwenzolamulila, sembe tilamulile namwe pamozi. ⁹ Pakuti nuganiza kuti Mulungu watiyika poonekela pamzela othela monga otumiwa, monga madoda oweluziwa ku imfwa. Tankhala coonelela ca ziko- ca angelo, na ca banthu. ¹⁰ Nise opusa kamba ka Kristu, koma nimwe anzelu mwa Kristu, nise ofoka, koma mweo nimwe okosa. Mulemekezeka, koma seo tupepushika. ¹¹ Mpaka pa nthawi ino tinanjala na njota, tuvwala lini na volongosoka, tunyatiwa mwa nkhanza, tiliye na ponkhala. ¹² Tusebenza na mphamvu, kusebenza na manja yasu. Pala putunenewa, tudalisa. Pala pututamanishiwa tupilila. ¹³ Pala pakuti namijyila, tulabila modekha. Tankhala, monga vinyaswa va ziko, vinthu vonyanyisa pa vintho vonse. ¹⁴ Nulemba lini ivi vinthu kuti nimumvwisheni soni koma kukucenjejyani ngati bana bangu okondewa. ¹⁵ Pakuti olo kuti mube na okusangani okwana teni sauzande mwa Kristu, muliye ausuwanu anyinji. Ndaba nenkhala usuwanu mwa Kristu Yesu kupyolela mu uthenga wabwino. ¹⁶ Teti nukulimbikashani kuti mutoleko khalidwe langu. ¹⁷ Ni cifukwa cake nukutumijyilani Timoti, mwana wangu mwa Ambuye okondewa ndipo okhulupilika. Akukumbusheni za njila zangu mwa Kristu, monga munuphunzisila kulikonse na mu chalichi iliyonse. ¹⁸ Lomba bayakine amweo ankhala ozitukumula, monga nenzokuza lini kwanu mweo. ¹⁹ Koma nikuza kwanu lombapano, ngati Ambuye avumejye. Nakuti nikazibe osati mau yao tyala bala ozitukumula koma nikaone na mphamvu zao. ²⁰ Pakuti ufumu wa Mulungu uli lini mukulabila koma mu mphamvu. ²¹ Ko Mufunanji? Nikawele kwanu na mukwapu kapena na cikondi na mzimu wa wofasa?