¹ Navy irô fariseo ndraiky Sadoseo aviô nitsapa Izy kay nangataka Izy mbaika agnaboaka irô famantaragna baka an-dagnitry. ² Fa Izy namaly aviô nivôlagna irô: "Izikoa fa hariva, nambaran'ndrô hoe: "Ho tsara andra, fa mena lagnitry.' ³ Izikoa fa marandraigny, nagnambara anaro: 'Ho ratsy andra, fa mena ndraiky manjognôno lagnitry,' fa anarô tsy afaka mandika irô famantaragna fotôagna. ⁴ Taranaka ratsy ndraiky mpijangajanga mitady famantaragna, fa tsisy famantaragna hamiagna izy ankoatra ny famantaran'i Jona." Abaka aviô Jesosy niala irô kay loso. ⁵ Izikoa fa navy tafy ampita irô mpianatra, adignan'ndrô nitôndra môfo. ⁶ Nambaran'i Jesosy tamin'ndrô: "Miambena aviô mitandraima amin'ny masirasiran'ndrô Fariseo ndraiky Sadoseo." ⁷ Niady hevitry irô mpianatra kay nagnambara: "Nohon'ny atsika ty nitôndra môfo." ⁸ Jesosy nahay izegny kay nivôlagna: "Anarô ry hely finôagna, nagnino mba anarô karaha miady hevitry samby anarô kay mivôlagna fa nohon'ny tsy nitôndranarô môfo izegny? ⁹ Mbola tsy hainarô na tsaroanarô mba môfo dimy ho an'ndrô dimy arivo, aviô tanty firy navorin'ndrô? ¹⁰ Na irô mofo fito hoan'drô efatra arivo, aviô tanty firy nalainarô? ¹¹ Amin'ny fomba akôry tsy azahoanarô fa tsy momban'ny môfo agnambarako anarô? Miambena aviô mitandraima amin'ny masirasiran'ndrô Fariseo ndraiky Sodoseo." ¹² Abaka aviô azon'ndrô fa tsy hitandregny amin'ny masirasira môfo nambarany irô, fa hitandrigny amin'ny fampianaragnan'ndrô Fariseo ndraiky Sadoseo. ¹³ Izikoa fa navy tagny amin'ny faritra marikitry kaisaria-filipo Jesosy, nagontany irô mpianatranany Izy, magnano hoe: "Ataon'ny olo ho azôvy mba Zanak'olôgno?" ¹⁴ Nambaran'ndrô: "Sasany mivôlagna fa Jaona mpagnano batisa; sasany, Elia; aviô irô hafa, Jeremia, na araiky amin'ndrô mpaminany." ¹⁵ Izy nagnambara tamin'ndrô: "Fa anarô ndraiky mba magnano Zaha azôvy?" ¹⁶ Namaly, Simona, Petera nagnano hoe: "Anao mba Kristy, zanaka dRagnahary velôgno." ¹⁷ Namaly Jesosy kay nagnano hoe taminany: "Sambatra anao, ry Simona Bar-Jona, fa tsy nofotro ndraiky lio nagnaboaka zegny taminao, fa Babako zay agny an-dagnitry. ¹⁸ Ambarako aminao fo koa fa anao Petera, aviô agnambonin'ity vatolampy ity hagnôraignako fiangonanako. Varavaran'ny fasagna tsy haharesy izegny. ¹⁹ Hamiako anarô fagnalahidin'ny fanajakan'ny lagnitry. Na ino na ino fehezinao eto agnambonin'ny tany ho fehezigny agny an-dagnitry, aviô na ino na ino vahanao aty an-tany ho vahana agny an-dagnitry." ²⁰ Abaka aviô Jesosy nandidy irô mpianatra fa irô tsy tokony hivôlagna na amin'azôvy na azôvy fa Izy ny Kristy. ²¹ Tamin'ny fotoagna izegny Jesosy nanômboko nivôlagna irô mpianatranany fa tsy maintsy ho agny Jerosalema Izy, hizaka fijaliagna maro iô an-tanagnan'ny lohologno ndraiky lohan'ny mpisoro-dalàgna, ho vonoina, ndraiky hatsangana indraiky amin'ny andro fahatelo. ²² Abaka avio Petera nangala Izy kay nivôlagna Izy mare, nagnano hoe: "Enga anie ho lavitra anao izegny, ry Tompo; tsy hitranga aminao fekiny izegny." ²³ Fa Jesosy nitodiky kay nivôlagna tamin'ny Petera: "Mialà agny ivohoko, ry satana! Anao fanafintohinana Zaha, noho anao tsy miarahaba irô zaka dRagnahary, fa irô zakan'olôgno." ²⁴ Abaka aviô Jesosy nivôlagna tamin'ndrô mpianatranany nagnano hoe: "Izikoa misy tia hagnaraka Zaha, tsy maintsy mandà tegnany izy, hitôndra hazofijaliagna, aviô magnaraka Zaha. ²⁵ Fa na azôvy na azôvy ho very aigny nohon'ny aminaka, hahazo izegny. ²⁶ Fa ino mba ny tsara ho azon'olo izikoa mahazo donia ty kanaifa very aigny? Ino mba raha amian'olo ho takolan'ny aigny? ²⁷ Fa ny Zakan'olôgno ho avy amin'ny voninahitry Babany miaraka amin'ndrô anjelinany. Abaka aviô Izy namaly tsara tsy araiky araiky araka zay vitany. ²⁸ Ambarako marigny aminarô, fa misy sasany aminarô zay mitsangana eto tsy hitsapa fahafatesagna mandrapahitan'ndrô Zakan'olôgno avy baka amin'ny fanjakany."