¹ Tamin'ny fotôagna izegny, i Heroda mpanapaka naregny vaovao momba Jesosy. ² Nivôlagna izy tamin'ndrô mpanomponany: "I Jaona mpagnano batisa mba izegny; nitsangana tamin'ny maty mba izy. Noho izegny, miasa amin'ndrô irô hery iô." ³ Fa i Heroda nanambotra Jaona, salakady namehy izy, aviô nandaifa izy tamin'ny tragno maiizigny noho i Herodiasy, vadin'i Filipo ralahiny. ⁴ Fa i Jaona nagnamabara taminany: "Tsy ara-dalagna ho anao managna izy ho vadinao." ⁵ Nagniry hamono izy i Heroda, fa kanaifa ndraiky navôzo irô vahoaka izy, satria niraisin'ndrô karaha mpaminany izy. ⁶ Fa izikoa fa navy fitsingeran'ny andra nahaterahan'i Heroda, nitsinjaka tiô agnivon'ndrô vahiny ni-inviteny zanaka vavin'i Herodiasy kay naharavôravo i Heroda izegny. ⁷ Ho setrin'izegny, nampagnantaigana tamin'ny fianaianany izy salakady nagnamia zay hangatahiny na ino na ino. ⁸ Izikoa fa baka nitôrôan'reniny marika izy, izy nivôlagna nagnano hoe: "Amiha zaha eto, agnambonin'ny kapila naka eto, lohan'i Jaona mpagnano batisa." ⁹ Nalahelo be izy nohon'ny fangatahany mpanjaka, fa kanaifa ndraiky nohon'ny voadiny ndraiky nohon'irô jiaby niaraka nihinagna taminany, nagnamia baiko izy fa tokony ho vitan'izegny. ¹⁰ Nagniraka kay nanapaka lohan'i Jaona tao amin'ny prison izy. ¹¹ Abaka aviô nandesiny tamin'ny kapila lohanany aviô namiany zazaviavy aviô nandesiny tamin'ny reniny izegny. ¹² Abaka aviô, navy irô mpianatranany, nangala faty, salakady nandevigny izegny. Tafaran' izegny, nandaiha irô aviô nivôlagna tamin'i Jesosy. ¹³ Izikoa fa naregny izegny Jesosy, niala tiô tamin'ny sambohely araiky Izy handaiha amin'ny toeragna araiky mitôkana. Izikoa fa naregny izegny irô vahoaka, nagnaraka Izy tamin'ny dihavity baka tagny amin'tanàna maventy. ¹⁴ Abaka aviô Jesosy nagnantogno talohan'ndrô aviô nahita irô vahoaka maro be. Izy nangoraka irô ndraiky nagnajanga aretign'ndrô. ¹⁵ Izikoa fa hariva andra, nagnantôgno taminany irô mpianatra sady nivôlagna nagnano hoe: "Ity dia toeragna foana, aviô efa tapitra directy andra. Halefaso irô vahoaka baika hahafan'ndrô mandaiha agny amin'ndrô tanàna aviô hividy hanigny ho amin'ny taignan'ndrô." ¹⁶ Fa Jesosy nagnamabara irô: "Tsy mila mandaiha lavitra irô. Amaizanarô zaka hoanigny irô." ¹⁷ Nambaran'ndrô taminany: ''Mofo dimy ndraiky hazandrano aroe fo hanagnanay eto." ¹⁸ Nambaran'i Jesosy: "Andaisa aty aminaka izegny." ¹⁹ Abaka aviô Jesosy nibaiko irô vahoaka mbaika hipaitraka amin'ny bozaka. Nalainy irô môfo dimy ndraiky laoko aroé. Niandra andra tagny an-dagnitry, kay nisaotra Izy aviô nanapaka irô môfo Kay namiany irô mpianatra, aviô irô mpianatra nagnamia izegny tamin'ndrô vahoaka. ²⁰ Nihinagna aby irô jiaby salakady voky. Abaka aviô navorin'ndrô ambin'ndrô hanigny Kay nahafeno roambinifolo harogno. ²¹ Tiô amin'ny dimy arivo lahy tiô irô nihinagna, ankoatran'ndrô tsaiky aman-bihiavy. ²² Directy nirahiny nandaiha amin'ny sambohely aviô handaiha haloha Izy amin'ny ampita irô mpianatranany, izikoa mbola nandaifa irô vahoaka Izy. ²³ Tafaran'ny nandefasany irô vahoaka, nandaiha niakatra tamin'ny bongo Izy mba hivavaka. Izikoa fa hariva andra, jejerigny tiô Izy. ²⁴ Abaka aviô sambo efa lasagna lavitry ny tanety, nitopatopaka onja, satria nitsoka nanohitry irô tsiko. ²⁵ Tamin'ny fiambaisagna aligny fahaifatra nagnantogno irô Jesosy, nandaiha tagny agnambony ranomasigny. ²⁶ Izikoa fa nahita Izy nandaiha tagnambony ranomasigny irô mpianatra, kay navozo aviô nivôlagna nagnano hoe: "Lolo io eee," aviô nikiakiaka tamin'ny fahavozôragna irô. ²⁷ Fa Jesosy namabara irô directy: "Mahereza! Fa Zaha ty! Aza mavozo." ²⁸ I Petera namaly Izy nagnano hoe: "Tompo, izikoa anao iô, mba asaivo magnantogno Anao amin'ny agnambonin'ny rano zaha." ²⁹ Navalin'i Jesosy: "Magnatogna." Kay niala baka tao amin'ny sambohely Petera aviô nandaiha tiô agnambony rano hagnantôgno Jesosy. ³⁰ Fa Izikoa fa nahita tsiko Petera, nivadiky navôzo ndraiky koa izy. Izikoa fa tiô fo izy nanômboko nilentiky igny, kay nikiakiaka mare izy salakady nivôlagna nagnano hoe: "Tompo, vonjeo zaha ô!" ³¹ Directy Jesosy, nanôndro tagnanany, nandaiha tamin'ny Petera, aviô nivôlagna taminany nagnano hoe: "Ô ry hely finoagna, fa magnino anao karaha miahiahy? ³² Abaka aviô Jesosy ndraiky Petera nandaiha hagnantôgno sambohely, abaka aviô nitsahatra nitsoaka directy tsiko. ³³ Abaka aviô irô mpianatra tao agnaty sambohely nidera Jesosy aviô nivôlagna nagnano hoe: "Anao marigny Zanaka Zagnahary." ³⁴ Izikoa fa baka niampita irô, kay navy tà tanety tao Genesareta. ³⁵ Izikoa fa nahay Jesosy irô lelahy tao amin'ny toeragna izegny, nandaifa hafatra tagny amin'ny faritra magnôdidigny jiaby, aviô nandesin'ndrô tiô Aminany zay olo narary jiaby. ³⁶ Nangataka taminany irô mbaika hafan'ndrô mikasiky tapany akanjonany fo, aviô maro irô nikasiky izegny kay janga.