¹ Tamin'andra izegny Jesosy nandaiha nibôaka tragno aviô nipaitraka tamin'ny sisin'ny dranomasigny. ² Nisy vahoaka maro nagnôdidigny Izy, kay niditry tao amin'ny sambohely Izy aviô nipaitraka tamin'izegny, izikoa nitsangana tiô amin'ny sisin-dranomasigny koa irô vahoaka jiaby. ³ Abaka aviô Jesosy nivôlagna zaka maro tamin'ndrô tamin'ny alalan'ny fanôharagna. Nivôlagna izy nagnano hoe: "Igny fa, nisy mpambôly araiky nandaiha nibôaka hamafy voa. ⁴ Izikoa izy namafy igny, nisy voa sasany latsaka tamin'ny sisin-dalagna, aviô navy irô vôrôgno kay nandrapaka irô. ⁵ Irô voa hafa ndraiky lasaka tagny amin'ny tany be vato, zay tsy nahazahoan'ndrô nofin-tany tsara. Avy directy naniry irô, satria tsy laligny tany. ⁶ Fa izikoa fa nitsiriky masoandro, maigna irô satria tsisy fakany, aviô nalazo. ⁷ Nilatsaka tiô amin'ny fatsiky irô voa hafa. Nitsiry irô fatsiky aviô nangenja irô. ⁸ Irô voa hafa nilatsaka tamin'ny tany tsara aviô namoa voany, sasany avo zato heny, sasany tsaota polo, aviô sasany telo-polo. ⁹ Zay manan-tsofigny, aoka izy hitandregny." ¹⁰ Navy irô mpianatra aviô nivôlagna tamin'i Jesosy nagnano hoe: "Nagnino anao mikôragna amin'ndrô vahoaka amin'ny alalan'ny fagnôharagna?" ¹¹ Namaly Jesosy aviô nivôlagna irô nagnano hoe: "Anarô namiagna tombony hahaizagna irô zaka miafign'ny fanjakan'ny lagnitry, fa nindrô tsy namiagna izegny. ¹² Satria na azôvy na azôvy managna, kay ho bebe kokoa aza hagnamia. Fa na azôvy na azôvy kosa tsy managna, na zay hanagnany aby adosiny aminany. ¹³ Izegny mahatônga zaha mikôragna amin'ndrô amin'ny alalan'ny fagnôharagna: Nata mizaha aby irô, tsy mahita; aviô nata mitandregny aby irô, na mahazo. ¹⁴ Amin'ndrô faminaniagnan'Isaia tantairaka, zay mivôlagna magnano hoe: 'Izikoa mitandregny, haregny anarô, kanaifa ndraiky ty hahazo fekiny; izikoa mizaha hahita anarô, kanaifa ndraiky tsy hahatakatra. ¹⁵ Fa lôso dônto fôn'ity vahoaka ty, aviô mafy sofigny irô, aviô nafodin'ndrô masony, mbaika ty hahita amin'ny mason'ndrô, na haregny amin'ny sofign'ndrô, na hahazo amin'ny fon'ndrô, kay hibaibaka ndraiky irô, aviô hagnajanga irô Zaha.' ¹⁶ Fa sambatra masonarô satria mahita; aviô sofigninarô satria maregny. ¹⁷ Ambarako marigny aminarô fa mpaminany ndraiky olo marigny maro nagniry hahita irô zaka zay hitanarô, kanaifa tsy nahita izegny arô. Nagniry haregny irô zaka zay regninarô irô, kanaifa tsy naregny irô. ¹⁸ Izikoa mitandregny aviô fanoharagna amin'ny mpitsabo araiky zay nagnamafy voany. ¹⁹ Izikoa misy maregny volagnan'ny fanjakana kanaifa tsy mahazo izegny, avy directy lay ratsy aviô magnôngotro zay nafafy tao am-pony. Iô voany nafafy tamin'ny sisin-dalagna. ²⁰ Araiky nafafy tamin'ny tany be vato olo zay maregny vôlagna aviô directy mandray izy am-pifaliagna, ²¹ fa kanaifa ndraiky mbola tsy miorim-paka ao agnatinany izy aviô maharitry tsy aila. Izikoa fa navy fahôriagna na fagnejehana noho amin'ny vôlagna, malaky tafintohina izy. ²² Zay nafafy tamin'ny fatsiky, zaigny olo zay naharegny volagna, fa kanaifa ndraiky fiahiahiagny donia ity ndraiky fitaky ny haregna mangeja volagna, aviô mivadiky tsy mamoa izy. ²³ Zay nafafy tamin'ny tany tsara, iô olo zay maregny vôlagna aviô mahazo izegny. Mamoa voankazo izy avio mahatonga voa araiky hagnamia avo zato heny mihoata zay nitsabôagna, sasany avo telo polo heny." ²⁴ Nagnaboaka fagnôharagna araiky hafa tamin'ndrô Jesosy. Izy nagnambara nagnano hoe: ''Ny fanjakany lagnitry karaha lelahy araiky zay namafy voa tsara tao amin'ny sahany. ²⁵ Fa izikoa fa nandry olo igny, directy navy fahavalony aviô namafy voam-tsimparifary fo koa tao amin'ndrô vary aviô nandaiha. ²⁶ Izikoa fa nitsiry irô vary iô abaka aviô namôkatra irô voany, nibôaka fo koa irô voam-tsimparifary. ²⁷ Navy irô mpanômpon'ny tompon-tany aviô nivôlagna taminany nagnano hoe: 'Tompoko, tsy namafy voa tsara tao amin'ny sahanao mba anao? Nagnino izy niany ty misy voam-tsimparifary? ²⁸ Nivôlagna izy tamin'ndrô: 'Nisy fahavalo nagnano izegny.' Nivôlagna irô mpanompo taminany nagnano hoe: 'Tianao mba handihananay magnôngôtro irô?' ²⁹ Lay tompon-tany nivôlagna nagnano hoe: 'Tsy marigny. Satria izikoa mangnôngôtro irô tsimparifary anarô, mety hagnôngôtro faikany irô vary miaraka amin'ndrô koa. ³⁰ Ambila hiaraka haniry irô aroé ziska fijinjagna. Amin'ny fotoam-pijinjagna hivôlagna amin'ny mpijinja zaha magnano hoe: "Adsoaha akendriky iro ahitsy ratsy avio fihaiza maromaro mbaika handôrôagna irô, fa avôry ao amin'ny toeram-bôkatra fo koa irô vary."" ³¹ Abaka aviô Jesosy nagnano fagnôharagna araiky hafa tamin'ndrô. Nivôlagna izy nagnano hoe: "Fanjakan'ny lagnitry karaha voatsinampy zay nalain'ny lelahy araiky aviô nafafiny tiô amin'ny saha. ³² Iô voa iô tegnan'ny voa hely amin'ny voa afa jiaby. Fa izikoa fa nitsiry izegny, maventy noho irô zaka maniry ao amin'ny saha. Mivadika kakazo izegny, mbaika hiavian'ndrô vôrôgno habakabaka aviô hagnano tragnôn'ndrô amin'ndrô rantsagna." ³³ Abaka aviô Jesosy nagnambara fagnôharagna araiky hafa. Fanjakan'ny lagnitry karaha lalivay zay nalain'ny viavy araiky aviô nafangarony tamin'ny lafariny intelo famarana ziska izy miakatra amin'ny foto-koba jiaby." ³⁴ Fagnoharana nagnambaran'i Jesosy irô zaka jiaby tamin'ny vahoaka; aviô tsy nivôlagna na ino na ino tamin'ndrô afa-tsy tamin'ny fagnôharagna Izy. ³⁵ Izegny mbaika hatantairaka zay nambarany tamin'ny alalan'ny mpaminany, izikoa nivôlagna Izy nagnano hoe: "Zaho hiloa-bava amin'ny alalan'ny fagnôharagna. Hagnambara zaka zay nasitriny hatrizay nagnorenagna zao tontolo zao Zaha." ³⁶ Abaka aviô Jesosy niala irô vahoaka aviô nandaiha tan-tragno. Nagnatôgno irô mpaminany aviô nivôlagna nagnano hoe: "Azavao aminay fagnôharagna momba tsimparifari'ny saha." ³⁷ Namaly Jesosy aviô nivôlagna nagnano hoe: "Zay mamafy voa tsara, dikan'izegny Zanak'olo. ³⁸ Ny saha mitovy amin'ny tontolo ty; aviô voa tsara, irô ny zanaka fanjakana. ³⁹ Tsimparifary irô zanaka'lay ratsy, aviô fahavalo zay namafy irô ny devoly. Fijinjana fiafaran'izao tntolo izao, aviô ny mpijinja irô anjely. ⁴⁰ Noho izegny, karaha atao mamory ndraiky angnôrôagna irô tsimparifary amin'ny môtro, atao koa amin'ny fiafaran'ny donia ty. ⁴¹ Hagniraka irô anjelin'ny Zanak'Olo, aviô avôry irô hiala amin'ny fanjakagnanany irô zaka jiaby zay mahatonga fahotagna, ndraiky irô zay magnano ratsy. ⁴² Hatsipin'drô ao amin'ny lafaôro maventy mirehitry môtro irô, zay hisy fitômaniagna ndraiky fikitroha-nify. ⁴³ Abaka aviô hamaritra karaha masôandro ao amin'ny fanjakan'ny Baban'drô olo marigny. Zay manan-tsôfigny, aoka izy hitandregny. ⁴⁴ Fanjakan'ny lagnitry karaha zay misitriky amin'ny saha araiky. Nisy lelahy nahita zegny aviô nasitriny. Nandeha tamin'ny hafaliagna izy, nivarôtro zay raha jiaby nanagnany, aviô nivanga iô saha iô. ⁴⁵ Aviô koa, ny fanjakagnan'ny lagnitry karaha lelahy zay mpivarôtro mitady tsô lafo vanga. ⁴⁶ Izy koa fa nahita tsô araiky zegny tegna lafo vanga izy, nandeha kay nivarôtro zay raha jiaby nanagnany kay nivanga izegny. ⁴⁷ Baka iô koa, ny fanajakan'ny lagnitry karaha harato zay natsipy agny an-dranomasigny, baka iô namory irô karazan-draha-manan'aigny jiaby. ⁴⁸ Izikoa fa feno zegny, nantsoritin-drô mpagnarato iô amin'ny sisin-dranomasigny. Aviô irô nipetraka kai namory irô raha tsara amin'ny placeny, fa zegny raha tsy ilaigny draiky nariandrô. ⁴⁹ Ho karaha izegny koa amin'ny fiafaran'ny donia ty. Ho avy irô anjely aviô hagnasaraka irô ratsy fagnahy amin'olo marigny. ⁵⁰ Hatsipin'drô amin'ny fandôrôagna maventy amin'ny môtro mirehitry mijôalajôala, zay hahitagna fitômaniagna ndraiky fikitroha-nify. ⁵¹ Azonarô tsara zaka jiaby izegny?" Nivôlagnin'ndrô mpianatranany taminany: "Ia." ⁵² Abaka aviô Jesosy nivôlagna tamin'ndrô nagnanao hoe: "Noho izegny irô mpanaôratra lalagna jiaby zay lôso mpianatra amin'ny fanjakan'ny lagnitry mitôvy irô lelahy tompon-tragno araiky, zay magnabôaka irô iô zaka tranaigny ndraiky ndraiky irô vaovao baka ao amin'ny fanagnany." ⁵³ Abaka avio izikoa fa nahavita iô fagnôharagna iô Jesosy, niala tamin'izegny toeragna izegny Izy. ⁵⁴ Abaka aviô Jesosy niditry tao amin'ny taninany zaraiky aviô nampianatra irô vahoaka tao amin'ny synagogan'ndrô. Vokatr'izegny talanjogno irô aviô nivôlagna nagnano hoe: "Avy baka aia ahazahoany lelahy ty fahendregna ndraiky irô fahagagagna aby io? ⁵⁵ Tsy iô mba lelahy zanaka lay mpandrafitra igny? ⁵⁶ Tsy Maria mba fikahiagna reniny? Tsy Jakoba, Josefa, simona, aviô Jodasy mba ralahiny? Tsy miaraka amintsika mba irô anabaviny? Baka aia nazahoany irô zaka jiaby iô?" ⁵⁷ Gaga nohon'ny aminany irô. Fa nambaran'i Jesosy tamin'ndrô: "Tsary nisy mpaminany tsiisy hajany izegny izikoa tsy ao amin'ny firenena ndraiky amin'ny fianakaviagnanany fo." ⁵⁸ Tsy dia nagnano fahagagagna be tao Izy nohon'ny tsy finôagnan'ndrô.