¹ Dra namaly Joba dra nanao ho: ² " Hafiria gny hapizaliandrareo anahy vo hanorotoroandrareo anahy amin'gny zaka? ³ Tamin'izay nandasandrareo anahy ipolo zay; sy bo magnasy napahory anahy andrareo. ⁴ No tena mary vatany fa nania zaho, dra hizano ho anahy raiky gny fahadisoako. ⁵ No hanondrosy gny vatandrareo ho amboniko vatany andrareo vo hapiasa gny fahafam-barakako hanohisy anahy, ⁶ dra tokony ha fatandrareo fa Zagnahary fa nanao gny sy nety taminahy dra nahatrasy anahy tamin'gny haratony. ⁷ Ingo,mitaray zaho ho: " Herisetra!" fe sy mahazo valiny zaho. Nitoka vozeo fatrasy zaho, fe sy nahazo rariny. ⁸ Nasiany rindry gny lalako ba sy hahafahako mandeha, sady nametraky ezy teo amin'gny lalako Izy. ⁹ nalany taminahy gny voninahisiko, vo fa nanaisotry gny satro-boninahisiko tamin'gny lohako Izy. ¹⁰ Fa namotiky anahy tamin'gny zorony aby Izy, dra lasa zaho, nombotany manahaky gny hazo gny fanatenako. ¹¹ Napirehetiny taminahy avo kaoa gny fahoriany; rambesiny manahaky gny raiky amin'ireo fahavalony zaho. ¹² Mindray avy reo tafiny; managa dongon-tany hanafiha anahy ereo ka mitoby magnodidy gny laiko. ¹³ Nanaisotra reo rahalahiko lavisy anahy Izy; nihafahafa taminahy tateraky reo olo fatasiko. ¹⁴ Nahafo anahy reo havako; fa nagnaligno anahy reo namako mariny. ¹⁵ Reo ze nizano ba ho vahiny tao an-tranoko fahizay vo reo panopo vaviko dra mandramby anahy manahaky gny sy olom-patasy; vahiny zaho eo amazon'ereo. ¹⁶ Mitoka gny panopoko zaho, fe sy namaly anahy izy ndre dra mengavy anazy amin'gny vavako aza zaho. ¹⁷ magnafitohina gny valiko gny fofognaiko; magnelakelaky reo ze nateraky gny tronin'gny reniko mihisy aza zaho. ¹⁸ Ndre reo zaza aza manao sinosino anahy; no misanga hizaka zaho, dra mizaka manohisy anahy ereo. ¹⁹ Reo namako nahazasy avy dra nalay anahy; nivaliky taminahy reo ze tiako. ²⁰ Mirekisy amin'gny holisiko vo gny nofoko gny tolako; gny hany ivelomako dra amin'gny holisy gny nifiko. ²¹ Managna famindram-po aminahy, managna famindram-po aminahy, ry namako, akory gny tagnan'Agnahary dra fa nikasiky anahy. ²² Nagnino andrareo gny magnitriky anahy manahaky gny hoe andrareo gny Zagnahary? Nagnino gny sy afa-po amin'gny fandevogna gny nofoko andrareo? ²³ Eh, enga anie ka ho voasorasy gny zakako amizao! Eh, enga anie ka ho voarakisy ao agnaty boky regny! ²⁴ Eh, enga anie ka ho voasokisy amin'gny penina vy vo firaky eo ain'gny vatolapy mandrakizay regny! ²⁵ Fe no gny aminahy, fatako fa velo gny Pagnavosy anahy, vo ²⁶ agny am-parany dra hisanga eo amin'gny tany Izy;afaran'izay gny holisisko, izay ho, itiho vata itio, dra toro, vo dra ao amin'gny nofoko gny hahitako an'Agnahary. ²⁷ Hahita Anazy amin'gny masoko mihisy zahi---Zaho, fa sy olo-kafa. Fa rokaky miamby anizay gny foko ato agnatiko sto. ²⁸ No ho andrareo ho: ' Akory gny hagnitrifasika anazy! Gny fotos'ireo fizaliany dra aminazy ao, ' ²⁹ dra matahora gny mesa, akory gny fahoria dra hahavy famaiza amin'gny mesa, ba hahafatarandrareo fa misy gny fisara.